Read efik MME HEBREW 2 Bible Online

MME HEBREW 2 - efik bible

MME HEBREW 2

¹MMƆDO ikpotim ikpaŋ utɔŋ ikan inɔ mme ŋkpɔ emi ikokopde, mbak nnyin idifiɔrɔ ikpɔŋ mmɔ.

²Koro edieke ikɔ eke ekedade mme angel etiŋ ɔsɔŋɔde ada, ndien kpukpru ndudue ye ntututɔŋ ebɔde ufen eke ekemde;

³Nnyin idinam didie ibɔhɔ edieke nnyin isinde erinyaŋa eke okponde ntem? eke Ɔbɔŋ ekebemde iso etiŋ, mmɔ emi ekekopde Enye enyuŋ esɔŋɔ ikɔ oro enɔ nnyin;

⁴Abasi onyuŋ ada mme idiɔŋɔ ye mme utibe ŋkpɔ, ye nsio-nsio ŋkpɔ odudu, ye erinɔ Edisana Spirit, nte Enye amade, etiene mmɔ etie ntiense.

⁵Koro idige mme angel ke Enye akada ererimbot eke edidide, eke nnyin itiŋde ibaŋa, adak mmɔ.

⁶Edi owo kiet ekedi ntiense ke ebiet kiet ete, Owo edi nso, eke afo etide enye? Eyen owo onyuŋ edi nso, eke afo edide edise enye?

⁷Afo amanam enye ekpri akan mme angel ke ini esisit kaŋa; afo amada ubɔŋ ye ukpono ayara enye ke ibuot,

⁸Afo omonim kpukpru ŋkpɔ ke idak ukot esie. Ke emi Enye okonimde kpukpru ŋkpɔ ke idak owo, isukke baba ŋkpɔ kiet eke minimke enye ke idak. Edi nnyin ikwe kaŋa nte enimde kpukpru ŋkpɔ ke idak owo.

⁹Edi nnyin ikut Enye, emi ekenamde Enye ekpri akan mme angel ke ini esisit kaŋa man Enye akpa mkpa, kpa Jesus, nte ayarade ubɔŋ ye ukpono man ke mfɔn Abasi Enye akpatabi mkpa ke ibuot kpukpru owo.

¹⁰Koro odotde Enye, emi kpukpru ŋkpɔ esuŋɔde ye Enye, kpukpru ŋkpɔ enyuŋ etode ke Enye, ke erida ediwak nditɔ nduk ubɔŋ ndinam asiakusuŋ eriyaŋa mmɔ asaŋa ke ndutuhɔ akabare ɔfɔn ama

¹¹Koro Andinam owo esana, ye mmɔ emi Enye anamde esana eto kiet: ntre ke inamke Jesus but ndikot mmɔ nditɔ-ete,

¹²ete, Nyetaŋa enyiŋ Fo nnɔ nditɔete Mi, Nyekwɔ itoro Fo ke otu mbon esop.

¹³Enye onyuŋ ɔdɔhɔ ete, Nyebuɔt idem ye Enye. Onyuŋ ɔdɔhɔ ete, Sese, Ami ye nditɔ emi Abasi ɔkɔnɔde Mi.

¹⁴Sia nditɔ ebuanade ndien ke iyip ye obuk, Jesus ke Idem Esie ŋko etiene ada iyip ye obuk kpa ntre; man Enye akpasaŋa ke mkpa osobo enye emi akamade odudu mkpa,

¹⁵oro edi Satan, onyuŋ emen ubɔhɔ ɔnɔ mmɔ emi ema edu ke itie ufin ke ofuri uwem mmɔ ɔnɔ ndik mkpa.

¹⁶Koro ke akpanikɔ Enye ikomumke mme angel ete inyaŋa mmɔ, edi edi nditɔ Abraham ke Enye omum.

¹⁷Mmɔdo odotde nte enam Enye ebiet nditɔ-ete Esie kpukpru ŋkpɔ, man Enye ekpedi Akwa Oku emi atuade owo mbɔm, onyuŋ anamde akpanikɔ ke ŋkpɔ eke abaŋade Abasi, okponyuŋ osio isop abaŋa mme idiɔk-ŋkpɔ mbio-mbio.

¹⁸Koro sia Enye okokopde ndutuhɔ ke erikut idomo, Enye ekeme ndinyaŋa mmɔ emi edude ke idomo.