Read efik MME HEBREW 6 Bible Online

MME HEBREW 6 - efik bible

MME HEBREW 6

¹EYAK nnyin ikpɔŋ ndien nditiŋ mbaŋa akpa eritɔŋɔ ukpep-ŋkpɔ Christ, isin idem ibine ifiɔk eke ɔfɔnde ama; ikutɔŋɔ ntak inim ukot ifiɔk ke erikpep mbaŋa erikabare-esit ke utom mkpa,

²ye eribuɔt idem ye Abasi, ye ukpep-ŋkpɔ mbaŋa uyere-mmɔŋ, ye eridori ubɔk ye eriset mme akpa-mkpa, ye nsinsi ikpe.

³Iyenyuŋ inam ntem, ke Abasi, onyimede.

⁴Koro ama edi mmɔ emi enyin ema ekaŋwaŋa mmɔ, emi ema eketabi enɔ emi otode ke heaven, ema enyuŋ ekabare ebuana ke Edisana Spirit,

⁵enyuŋ etabi eti ikɔ Abasi,

⁶ye mme odudu ererimbot emi edidide, ndien ekem mmɔ edifiak edem; ɔsɔŋ nte owo mikemeke ndikpuhɔre mmɔ ntɔŋɔ ntak nnam mmɔ ekabare esit; sia mmɔ etɔŋɔde ntak ewot Eyen Abasi ke cross enɔ idem mmɔ enyuŋ esuenede Enye ke aŋwa.

⁷Koro isɔŋ, emi ɔŋwɔŋde edim eke awakde ndidep ke esit, onyuŋ osioŋode ikɔŋ udia eke ɔfɔnde ye mmɔ emi efuŋde enye enɔ mmɔ, ɔbɔ eridiɔŋ ke ubɔk Abasi;

⁸Edi edieke isɔŋ oro osioŋode ŋkukim ye mbara-ekpe, esin enye, onyuŋ osuk esisit esuŋi enye; ndien ana nte efɔp enye ke ikaŋ ke ukperedem.

⁹Edi ndima, imonim ite ŋkpɔ efɔn ekan oro ye mbufo, eyenyuŋ ewɔrɔ erinyaŋa, okposuk edi nte itiŋde ntem.

¹⁰Koro Abasi ikwaŋake nte efrede utom mbufo ye ima enyiŋ Esie eke mbufo ewutde, ke emi mbufo ekenamde ŋkpɔ enɔ ikɔt Abasi, enyuŋ esuk enanam.

¹¹Edi ɔdɔŋ nnyin nte kpukpru mbufo ewut kpa oruk ifik oro, man enyene ɔyɔhɔ idorenyin tutu osim utit:

¹²man mbufo ekukop ifem, edi edi mendikpebe mmɔ emi ekesaŋade ke mbuɔtidem ye ime ebɔ mme uŋwɔŋɔ Abasi enyene.

¹³Koro ke adaŋemi Abasi ɔkɔŋwɔŋɔde uŋwɔŋɔ ɔnɔ Abraham, sia Enye mikemeke nditomo se ikponde ikan Idem Esie,

¹⁴Enye otomo Idem Esie, ete, Ke akpanikɔ nditreke tre ndidiɔŋ fi nnyuŋ nnam fi ɔtɔt.

¹⁵Ntre ke Abraham ɔkɔbɔ mme uŋwɔŋɔ Abasi ke enye ama ekeme anyan ime.

¹⁶Koro mme owo edade se ikponde ikan idem mmɔ eŋwɔŋɔ uŋwɔŋɔ: ke kpukpru eneni eke edude ke ufɔt mmɔ, uŋwɔŋɔ onyuŋ edi akpatre ŋkpɔ eke edade ebiere ikɔ.

¹⁷Ntre sia Abasi oyomde mmɔ emi edidade uŋwɔŋɔ enyene etim ekut ete Enye idikpuhɔkere uduak Esie, Enye ada uŋwɔŋɔ edisin:

¹⁸man okpoto ke ŋkpɔ iba emi mikemeke ndikpuhɔre, emi Abasi mikemeke ndisu nsu ke esit, nnyin ikpenyene akwa nsɔŋ-esit, kpa nnyin emi ima ifehe iyom ubɔhɔ ke erimum idori-enyin emi enimde nnyin ke iso:

¹⁹idori-enyin oro ke nnyin inyene nte ukwak ubom ukpɔŋ nnyin, eke midikpuhu nnyin, edi ɔsɔŋɔde omum isɔŋ, onyuŋ ebede oduk ekeyire ke se idude ke esit ukara;

²⁰ke ebiet emi Jesus ama ebe oduk ke esit nte Ebe-iso ɔnɔ nnyin, ke Enye ama akabare edi Akwa Oku ke nsinsi, nte utɔ Melchizedek asaŋade.