Read efik MME HEBREW 7 Bible Online

MME HEBREW 7 - efik bible

MME HEBREW 7

¹KORO Melchizedek emi-emi ekedide edidem Salem, ye oku Abasi Ibom, emi osobode ye Abraham ke ini enye otode ndiwot ndidem afiak edi onyuŋ ɔdiɔŋde enye:

²emi Abraham onyuŋ abaharede kpukpru ŋkpɔ ke itie duop osio ubak kiet ɔnɔ enye; (ebem iso ekot enye, ete, Edidem edinen ido, enyuŋ ekot enye, Edidem Salem ŋko, oro ɔwɔrɔ ete,

³Edidem emem; enye inyeneke ete, inyuŋ inyeneke eka, inyuŋ inyeneke oruk iman, inyuŋ inyeneke eritɔŋɔ eyo uwem ye utit uwem, edi enam enye ebiet Eyen Abasi) - osuk ada oku ke nsinsi.

⁴Ekere ndien adaŋa nte owo emi okponde, emi Abraham, akwa ete nnyin, okosiode ɔyɔhɔ ubak ŋkpɔ duop ke otu nti mbume ɔnɔ enye.

⁵Ke akpanikɔ ema enɔ nditɔ Levi, emi edade idaha oku, uyo, ete, ebɔ mbio-obio ŋkpɔ kiet ke itie duop, nte ibet etemede; oro ɔwɔrɔ ete, mmɔ ebɔ nditɔ-ete mmɔ, okposuk edi nte mmɔ oro etode Abraham:

⁶edi enye, emi mibatke ite ntak esie ɔkɔsuŋɔ Levi ke idem, ama ɔbɔ Abraham utomo, onyuŋ ɔdiɔŋ enye emi enyenede uŋwɔŋɔ.

⁷Edi owo inenike ite, edi akamba akam ɔdiɔŋ ekpri.

⁸Ndien ke ŋkaŋ emi, mmɔ emi edikpade ebɔ utomo; edi ke ŋkaŋ oko, edi enye emi edɔhɔde ete, enye ke odu uwem.

⁹Ntre ke owo ekeme ndidɔhɔ ete, kpa Levi emi ɔbɔde utomo, okonyuŋ ɔnɔ utomo ke idem Abraham;

¹⁰koro enye okodu adaŋoro ke idem ete esie, ke adaŋemi Melchizedek osobode ye enye.

¹¹Edi edieke mfɔn-mma okpotode ke idaha oku Levi (koro ekenɔ mbio-obio ibet ke idak idaha oku oro), ekpenam didie eyom oku efen adaha ada nte utɔ Melchizedek asaŋade, ekukɔm enye nte utɔ Aaron asaŋade?

¹²Koro ke adaŋemi ema ekpuhɔre idaha oku, ana nte ekpuhɔre ibet ŋko.

¹³Koro Enye, emi edɔhɔde mme ŋkpɔ emi edian Enye, oto ke esien efen, emi baba owo kiet mitoho ke esit ikada mbet ke itie-uwa.

¹⁴Koro aŋwaŋa ete Ɔbɔŋ nnyin okoto ke Judah; ndien akanam Moses itiŋke baba ŋkpɔ kiet eke abaŋade oku idian esien emi.

¹⁵Ndien se itiŋde ototim aŋwaŋa akan, edieke oku efen emi ebietde Melchizedek adahade ada;

¹⁶emi midaha item ibet obukidem inim Enye nte oku, edi edade odudu uwem eke midikemeke ndibiara, enim Enye;

¹⁷koro etiŋ ebaŋa Enye ete, Afo edi oku ke nsinsi Nte utɔ Melchizedek asaŋade.

¹⁸Koro ekpɔnɔre ibet emi okodude ke mbemiso enim ŋkaŋ kiet, sia enye edide mmeme, minyuŋ inamke ufɔn

¹⁹(koro ibet minamke baba ŋkpɔ kiet ɔfɔn ama), enyuŋ eda idori-enyin eke ɔfɔnde akan edian, emi nnyin isaŋade ke esit ikpere Abasi.

²⁰Ndien kpa nte ekedade uŋwɔŋɔ enim Enye ke oku

²¹(koro ikadaha uŋwɔŋɔ inam nditɔ Levi edi oku; edi Abasi, emi ɔkɔdɔhɔde abaŋa Enye ete, Jehovah omotomo Idem Esie, idinyuŋ ituaha mkpɔfiɔk ete, Afo edi oku ke nsinsi,

²²Ada uŋwɔŋɔ anam Enye edi oku); adaŋa ntre ŋko ke Jesus amakabare edi ubiɔŋ ediomi eke ɔfɔnde akan.

²³Ke akpanikɔ ekonyuŋ enam ediwak owo edi oku, koro mkpa miyakke mmɔ esuk edu uwem:

²⁴edi Enye, koro Enye odude uwem ke nsinsi, enyene idaha oku eke mikemeke ndikpuhɔre.

²⁵Ke ntak emi Enye onyuŋ ekeme ndinyaŋa mmɔ emi esaŋade ke Enye ekpere Abasi ɔyɔhɔ-ɔyɔhɔ, sia enye odude uwem ke nsinsi ndinam mkpe-ubɔk nnɔ mmɔ.

²⁶Emi edi oruk Akwa Oku emi ekemde ye nnyin, emi asanade, minyeneke ŋkari, minyuŋ iduehe, emi misaŋake ye mme anam-idiɔk, emi ema enyuŋ emen enim okoŋ akan mme heaven;

²⁷emi minyeneke ndiwa uwa kpukpru usen mbaŋa idiɔk-ŋkpɔ idem esie kaŋa, ndien enye ediwa abaŋa mme idiɔk-ŋkpɔ mbio obio, nte ikpɔ oku oro ekam enamde: koro Enye akanam emi ama ini kiet, ke adaŋemi Enye awade Idem Esie.

²⁸Koro ibet emekde mme owo, emi enyenede mmem-idem, onim ke ikpɔ oku; edi ikɔ uŋwɔŋɔ, eke etienede ibet ke edem, emek Eyen onim, emi ema enam Enye ɔfɔn ama ke nsinsi.