Read efik MME HEBREW 9 Bible Online

MME HEBREW 9 - efik bible

MME HEBREW 9

¹KE akpanikɔ akpa ediomi ŋko ekenyene ido erituak ibuot nnɔ Abasi, ye ufɔk Abasi emi edide eke ererimbot emi.

²Koro ekewuk Ataya, akpa Ataya, emi uwuk-utuenikaŋ, ye okpokoro, ye uyo-iso-Abasi edude ke esit: emi ekerede Edisana Ebiet.

³Ndien ke ebede udiana ukara, Ataya emi ekerede Ata Edisana Ebiet onyuŋ odu;

⁴emi enyenede ŋkpɔ ufɔp-incense o-gold, ye ekebe ediomi emi edade gold efuk ekanare ekuk, emi eso o-gold emi mana esinede ke esit,

⁵ye esaŋ Aaron emi esehede, ye mme itiat ŋwed ediomi edude ke esit; ndien ke enyɔŋ ekebe oro Cherubim ubɔŋ ekui itie usio-isop; edi nnyin ikemeke ndidɔhɔ mbaŋa ŋkpɔ emi kiet kiet ke emi.

⁶Edi ke ema ekotim mme ŋkpɔ emi ntem, mme oku edoduk ke akpa Ataya kpukpru ini edinam utom Abasi;

⁷edi akwa oku ikpɔŋ-ikpɔŋ akam esiduk ke udiana Ataya ini kiet ke isua; idukke ke misaŋake ye iyip, eke enye awade abaŋa idem esie ye ndudue mbio-obio:

⁸Edisana Spirit ada emi owut ete, iyarakere kaŋa usuŋ eke adade owo oduk ke Edisana Ebiet, adaŋa ini nte akpa ataya osuk odude.

⁹Emi onyuŋ edi ŋke ɔnɔ ini emi, eke ɔwɔrɔde ete, ewa enɔ ye uwa, eke mikemeke ndinam owo oro etuak ibuot enɔ Abasi efɔn ema ke eridori eke esit odoride mmɔ,

¹⁰sia mme uwa oro (mmɔ esaŋa ye udia ye eriŋwɔŋ-ŋkpɔ ye nsio-nsio uyere-mmɔŋ) edide enyɔŋ-enyɔŋ ido obukidem, emi enɔde owo enim tutu osim ini eke edidiɔŋde kpukpru ŋkpɔ.

¹¹Edi ke adaŋemi Christ ekedide nte Akwa Oku emi adade nti ŋkpɔ eke ediwɔrɔde edi, Enye asaŋa ebe Ataya eke okponde akan oro onyuŋ ɔfɔnde akan, eke midaha ubɔk inam, oro edi Ataya eke midige eke ererimbot emi;

¹²Enye inyuŋ idaha iyip ebot ye enaŋ isaŋa ibe iduk, edi ada iyip Esiemɔ oduk ke Edisana ebiet ini kiet kpɔt, ke Enye ama ɔkɔbɔ nsinsi ufak ɔnɔ owo.

¹³Koro edieke iyip ebot ye eke nyara enaŋ, ye ntɔŋ abak enaŋ edade esime mmɔ emi edehede, anamde mmɔ esana ke obukidem;

¹⁴ŋwaŋwaediso ke iyip Christ, emi ke odudu nsinsi Spirit akawade Idem esie ɔnɔ Abasi nte ata edisana uwa, ediyet esit mbufo, anam mbufo ebɔhɔ utom mkpa, enyuŋ enam ŋkpɔ enɔ Abasi uwem.

¹⁵Ke ntak emi Enye onyuŋ edi esine-ufɔt obufa ediomi, man, sia kiet ama akakpa ndifak owo nsio ke mme ndudue eke mmɔ ekesinede ke idak akpa ediomi edue, mmɔ emi ekekotde ekpɔbɔ uŋwɔŋɔ nsinsi udeme.

¹⁶Koro ɔtɔ nte ŋwed-adia-akpa odude, anam-ŋwed oro enyene ndibem iso ŋkpa.

¹⁷Koro ŋwed adiaakpa ɔsɔŋɔde ke adaŋemi owo ama akpa: akanam nte ŋwed oro enyene odudu, ke adaŋemi andinam enye odude uwem?

¹⁸Mmɔdo ikɔdiɔŋke akpa ediomi inim ke eriduɔk iyip miduhe.

¹⁹Koro adaŋemi Moses ama akataŋa kpukpru mbet ama ɔnɔ kpukpru mbio-obio, nte asaŋade ekekem ye ibet, enye ada iyip nditɔ-enaŋ ye iyip ebot abuak ye mmɔŋ, ye ididuot idet-erɔŋ, ye hyssop, osime ŋwed ye kpukpru mbio-obio, onyuŋ ɔdɔhɔ mmɔ ete, Emi edi iyip

²⁰Ediomi emi Abasi okowukde ete, enam enɔ mbufo.

²¹Enye onyuŋ ada iyip oro osime Ataya ye kpukpru mkpoduoho eke edade enam utom Abasi kpasuk ntre.

²²Ndien osuk esisit eda iyip enam kpukpru ŋkpɔ esana, nte ido ibet edide; ndien ke eriduɔk iyip miduhe, eridahado inyuŋ iduhe.

²³Mmɔdo ekenyene ndida mme-uwa emi nnam mbiet ŋkpɔ oro edude ke mme heaven esana; edi eda mme uwa emi efɔnde ekan emi enam idem mme ŋkpɔ eke edude ke heaven esana.

²⁴Koro Christ ikebehe iduk ke edisana ebiet emi edade ubɔk enam, emi onyuŋ edide mbiet ata Edisana Ebiet; edi ebe oduk ke ata heaven, man Enye ada ke iso Abasi ke emi kabaŋa nnyin.

²⁵Enye inyuŋ idukke man Enye awa Idem Esie ediwak ini, nte emi akwa oku adade iyip eke midige esiemɔ oduk ke Edisana Ebiet ke isua ke isua;

²⁶sia akpanade nte Enye akpa ediwak ini toto ke eritɔŋɔ ererimbot; edi ke emi, ke ukperedem eyo emi, emayarare Enye ini kiet kpɔt, man Enye emen mme idiɔk-ŋkpɔ efep ke eriwa emi Enye awade Idem Esie.

²⁷Ndien kpa nte ema enim enɔ owo ndikpa ini kiet, ndinyuŋ nda ke itie-ikpe ke oro ebede;

²⁸kpa ntre ŋko Christ, ke ekewade Enye ini kiet ete obiom idiɔk ŋkpɔ ediwak owo, eyetɔŋɔ ntak ɔbiɔŋɔre; edi Enye ididige ndinyene mbubehe ye idiɔk-ŋkpɔ, edi edidi ndinyaŋa mmɔ emi etiede ebet Enye.