Read efik JAMES 1 Bible Online

JAMES 1 - efik bible

JAMES 1

¹JAMES, emi edide owo Abasi ye Ɔbɔŋ Jesus Christ, ewet ɔnɔ esɔk esien duopeba emi esuanade, ete ikɔm mmɔ.

²Enim ete edi ŋkpɔ ɔyɔhɔ idaresit, nditɔ-ete mi, ke ini nsio-nsio idomo esimde mbufo;

³ke efiɔkde ete mbuɔtidem mbufo emi ema edomo ewut anam ime ɔwɔrɔ.

⁴Edi yak ime anam utom esie ama, man mbufo efɔn ema enyuŋ esɔŋ ke ukpɔŋ, ekunana baba ŋkpɔ kiet.

⁵Edi edieke owo mbufo ekededi ananade eti ibuot, yak enye ebeŋe Abasi, emi ɔnɔde kpukpru owo ke ntarubɔk, minyuŋ itɔhɔke owo; ndien Abasi eyenɔ enye.

⁶Edi yak enye ebeŋe ke mbuɔtidem, okuyok; koro owo eke oyokde ebiet mbufut mmɔŋ, eke ofim eberide, emen, otop, ɔduɔk ko.

⁷Owo oro okuse ete, imɔ iyebɔ baba ŋkpɔ kiet ke ubɔk Ɔbɔŋ;

⁸enye edi owo esit iba, eke minyeneke nsɔŋɔ-nda ke kpukpru usuŋ esie.

⁹Yak eyen-ete eke odude ke usuhɔre-itie obure mbure ke akamba itie esie; yak owo inyene onyuŋ obure ke itie erisuhɔre esie;

¹⁰koro nte ndiye ikɔŋ-ikɔt ke owo inyene eyebe efep.

¹¹Koro utin asiahade asaŋa ye ufiop-ufiop ofim ɔfɔp mbiet; ndien ndiye ikɔŋ esie ekibe eduɔŋɔ, uyai mmɔ onyuŋ abiara: ntre ke owo inyene edinyuŋ eyemere ke mbubine esie.

¹²Ɔfɔn ye owo eke ɔsɔŋɔde ada ke idomo, koro ke ema ekedomo enye efiɔk ete ɔfɔn, eyenɔ enye anyanya uwem, emi Ɔbɔŋ ɔkɔ-ŋwɔŋɔde ndinɔ mmɔ emi emade Enye.

¹³Ke ini idomo iduɔ osimde owo, enye okudɔhɔ ete, ke edi Abasi odomo imɔ: koro idomo iduɔ ikemeke ndisim Abasi, Enye ke Idem Esie inyuŋ idomoke owo man enye ɔduɔ.

¹⁴Edi idomo iduɔ osim kpukpru owo ke adaŋemi idiɔk udɔŋ atapde enye odudi.

¹⁵Ekem idiɔk udɔŋ ama oyomo, aman idiɔk-ŋkpɔ; idiɔk-ŋkpɔ ama ɔkɔkɔri, osioŋo mkpa.

¹⁶Ekuyak ebiaŋa mbufo, ndima nditɔ-ete mi.

¹⁷Kpukpru eti erinɔ ye kpukpru enɔ eke efɔnde ema eto ke enyɔŋ, eto ke ubɔk Ete mme uŋwana esuhɔre edi; emi mikemeke ndikpuhɔre, ukpuhɔre itie minyuŋ ikemeke ndimen Enye nsin ke mfut.

¹⁸Oto ke uduak Esie ke Enye akada ikɔ akpanikɔ aman nnyin, man nnyin ikpetie nte akpa mbuŋwum ke otu mmɔ emi Enye okobotde.

¹⁹Mbufo efiɔk emi, ndima nditɔ-ete mi. Edi yak kpukpru owo esɔp ndikop ikɔ, ekusɔp nditiŋ ikɔ, ekusɔp ndiyat esit;

²⁰koro iyaresit owo miwɔrɔke edinen ido Abasi.

²¹Mmɔdo eduɔŋɔ kpukpru ndek-ndek ido ye nyɔhɔ-nsuhɔ udu, enyuŋ ebɔ ikɔ emi etɔde ke esit mbufo ke ododop, kpa ikɔ emi ekemede ndinyaŋa ukpɔŋ mbufo.

²²Yak mbufo edi mme anam-ikɔ, ekudi mme andikokop ikpɔŋ-ikpɔŋ, ebiaŋa idem.

²³Koro owo ekededi eke okopde ikɔ, edi minamke-nam ebiet owo eke esede obot iso esie ke ukut-iso:

²⁴koro enye esede idem esie, adaha onyuŋ efre oruk owo eke enye edide kpa idaha oro.

²⁵Edi owo eke owukde enyin ese ata edifɔn ibet Abasi emi anamde owo ɔwɔrɔ ufin, onyuŋ ɔsɔŋɔde ada ke esit, idige andikokop emi efrede, edi edi andinanam; owo emi eyekut eridiɔŋ ke erinam esie.

²⁶Edieke owo abatde idem ke owo Abasi, minyuŋ imumke edeme esie ikama, edi abiaŋade esit esie, erinim eke enye onimde ido Abasi ɔwɔrɔ ikpikpu.

²⁷Ido Abasi eke asanade, minyuŋ ideheke ke iso Abasi Ete nnyin edi, ndisaŋa nse nditɔ-akpa ye mme ebe-akpa ke ukut mmɔ, ndinyuŋ ŋkpeme idem ke idiɔk-ŋkpɔ emi odude ke ererimbot.