Read efik JAMES 5 Bible Online

JAMES 5 - efik bible

JAMES 5

¹DA mbufo mbon inyene, etuaŋa, enyuŋ esio mkpo ebaŋa nditaha eke edisimde mbufo.

²Inyene mbufo amakabare mbiara, uta-ŋkpɔ ema eta edisine-ŋkpɔ mbufo.

³Ŋkarafaŋ ama ata gold ye silver mbufo; ŋkarafaŋ oro eyenyuŋ edi ntiense abaŋa mbufo, eyeta obukidem mbufo nte ikaŋ. Mbufo ekɔkɔ inyene enim enɔ idem ke ukperedem usen.

⁴Sese, utip mbio-utom emi edɔkde idɔk ke iŋwaŋ mbufo, eke mbufo emumde ekama ke ŋkanubɔk, ke ofofiori; eseme mbon-idɔk omonyuŋ oduk Ɔbɔŋ mme udim ke utɔŋ.

⁵Mbufo edu uwem, edia nti ŋkpɔ ke isɔŋ, enyuŋ ebine mbre; emebɔk esit mbufo ke usen afai.

⁶Mbufo emebiom edinen owo ikpe, emewot enye; enye iŋwanake ye mbufo.

⁷Eme ime ndien, nditɔ-ete tutu Ɔbɔŋ edi. Sese, ɔtɔ-iŋwaŋ etie ebet eti mbuŋwum isɔŋ, onyuŋ eme anyan ime, tutu enye okut akpa ye ukperedem edim.

⁸Mbufo eme anyan ime ntre ŋko; esɔŋɔ mbufo esit; koro eridi Ɔbɔŋ ke ekpere.

⁹Nditɔ-ete, ekusuk kiet eken uyo, mbak owo edikpe ikpe ye mbufo; sese, Ebiere-ikpe ke ada ke enyin-usuŋ.

¹⁰Nditɔ-ete, eda mme prophet, emi eketiŋde ŋkpɔ ke enyiŋ Jehovah, nte uwut-ŋkpɔ ke erisɔŋ esit mbiom ukut.

¹¹Sese, nnyin idɔhɔ ite, ɔfɔfɔn ye mmɔ emi ema ebiom ukut: mbufo emokop ebaŋa ime Job, emenyuŋ ekut se Ɔbɔŋ anamde enye ke akpatre, nte Ɔbɔŋ enyenede esit mbɔm, onyuŋ atuade owo mbɔm.

¹²Akpa-akpan, nditɔ-ete mi, ekutomo ŋkpɔ. Ekutomo enyɔŋ, mme isɔŋ mme baba ŋkpɔ efen.Edi yak Ih mbufo edi Ih, Ih mbufo onyuŋ edi Ih, mbak ikpe edibiom mbufo.

¹³Nte owo okut ukut ke otu mbufo? Yak enye ɔbɔŋ akam. Nte owo odu ke inemesit? yak enye ɔkwɔ ikwɔ itoro.

¹⁴Nte owo ɔd ɔŋɔ ke otu mbufo? yak enye okot mbiowo Ufɔk Abasi; mmɔ enyuŋ enuhɔ efuk enye ebɔŋ akam, eda aran eyet enye ke enyiŋ Ɔbɔŋ:

¹⁵ndien akam mbuɔtidem eyenyaŋa enye emi ɔdɔŋɔde, Ɔbɔŋ eyenyuŋ anam enye adaha ada; ndien edieke enye akanamde idiɔk-ŋkpɔ, eyefen enye.

¹⁶Mmɔdo eyarare idiɔk-ŋkpɔ mbufo enɔ kiet eken, enyuŋ ebɔŋ akam ebaŋa kiet eken, man ekɔk udɔŋɔ mbufo. Mkpe-ubɔk edinen owo enyene odudu eti-eti ndinam ŋkpɔ.

¹⁷Elijah ekedi owo emi enyenede mbiet uduot nnyin, enye onyuŋ ɔbɔŋ akam eti-eti, ete, edim okudep; ndien edim idepke ke isɔŋ ke isua ita ye ɔfiɔŋ itiokiet.

¹⁸Enye onyuŋ ɔtɔŋɔ ntak ɔbɔŋ akam: ndien enyɔŋ edidep edim, isɔŋ onyuŋ osioŋo mbuŋwum.

¹⁹Nditɔ-ete mi, edieke owo mbufo ekededi oyode ɔkpɔŋ akpanikɔ, ndien owo efen akabarede enye; efiɔk ete,

²⁰owo eke akabarede anam-idiɔk osio ke ndudue usuŋ esie, eyenyaŋa ukpɔŋ esie ke mkpa, onyuŋ ofuk ekese mme idiɔk-ŋkpɔ.