Read efik 1 PETER 5 Bible Online

1 PETER 5 - efik bible

1 PETER 5

¹AMI nsɔŋɔ nnɔ mbiowo emi edude ke otu mbufo uyo, kpa ami emi ke idem mi nsaŋade ye mmɔ ndi ebiowo,

²nnyuŋ ndide ntiense ndutuhɔ Christ, nnyuŋ ndide abuana ke ubɔŋ emi ediya-rarede, nte, Ekpeme udim-erɔŋ Abasi emi odude ke otu mbufo; ese ebaŋa mmɔ ke ima esit nte Abasi oyomde, ekuyak etie nte enyenyik mbufo; ekunam emi ebaŋa mbukpo udori, edi enam ke erinyime esit;

³ekunyuŋ ebre odudu ye mmɔ emi ekeyakde esin mbufo ke ubɔk, edi enim idem nte uwut-ŋkpɔ enɔ mme erɔŋ.

⁴Ndien ke adaŋemi Akwa Andikpemerɔŋ ediyararede idem, mbufo eyebɔ anyanya ubɔŋ eke midibiarake.

⁵Kpasuk ntre, mbufo mkparawa, esuk idem enɔ mbiowo. Kpukpru mbufo enyuŋ ebɔbɔ nsukidem ke idem nte mbɔbɔ, enam ŋkpɔ enɔ kiet eken: koro Abasi aŋwaŋwana ye mbon iseri, edi ɔfɔn ido ye mbon nsukidem.

⁶Esuhɔre idem ndien ke idak ɔkpɔsɔŋ ubɔk Abasi, man Enye ekpemenere mbufo onim ke enyɔŋ ke edikem ini.

⁷Etop kpukpru ɔkpɔsɔŋ ekikere eke otimerede mbufo esit eduɔk edori Enye, koro Enye ke ekere mbufo.

⁸Efara ke idem enyuŋ ekpeme; asua mbufo, kpa, Satan, ke oyoyo nte

⁹lion eke okunide, oyom se editade. Esɔŋɔ eda ke mbuɔtidem eŋwana ye enye, ke efiɔkde ete kpa utɔ ndutuhɔ emi ke ɔyɔyɔhɔ ke otu nditɔ-ete mbufo emi edude ke ererimbot.

¹⁰Ndien Abasi kpukpru mfɔn, emi okokotde mbufo ete ediduk ke nsinsi ubɔŋ Imɔ ke Christ, ke ini mbufo ema ekut ukut ke ekpri ini, eyenam mbufo efɔn ema, enyuŋ esɔŋɔ eda, enyuŋ ekop idem.

¹¹Yak edi Enye edi Andikara ke nsinsi-nsinsi. Amen.

¹²Ŋwet ŋwed emi ibio-ibio nnɔ esɔk mbufo ke ubɔk silvanus, emi ndade nte eyen-ete emi anamde akpanikɔ; man nsɔŋɔ mbufo esit, nnyuŋ ŋwut mbufo nte, emi edi ata mfɔn Abasi. Esɔŋɔ eda ke esit.

¹³Ufɔk Abasi emi odude ke Babylon, emi Abasi emekde ntre ye mbufo, ete ekɔm mbufo; Mark eyen mi onyuŋ ɔnɔ ekɔm.

¹⁴Ekɔm kiet eken ke ntim-inua eke otode ima. Emem akpakam etiene kpukpru mbufo emi edude ke Christ.