Read efik 1 JOHN 3 Bible Online

1 JOHN 3 - efik bible

1 JOHN 3

¹ESE utɔ akwa ima emi Ete ɔkɔnɔde nnyin, ete nnyin ikpekere nditɔ Abasi: ndien oro ke nnyin inyuŋ idi. Ke ntak emi ererimbot ifiɔkke nnyin, koro mikɔfiɔkke Enye.

²Ndima, nnyin idi nditɔ Abasi ke emi; ndien iyarakere kaŋa iwut se nnyin ididide. Edi nnyin ifiɔk ite, edieke Enye ediwɔrɔde owut idem nnyin iyebiet Enye, koro nnyin iyekut Enye nte Enye edide.

³Kpukpru owo eke edoride enyin ke Enye ntem enam idem asana, kpa nte Enye asanade.

⁴Kpukpru owo eke enamde idiɔk-ŋkpɔ ebiat ibet ŋko; ndien idiɔk-ŋkpɔ edi eribiat ibet.

⁵Ndien mbufo efiɔk ete ekesio Enye enim, man emen mme idiɔk-ŋkpɔ efep; ndien idiɔk-ŋkpɔ iduhe Enye ke idem.

⁶Baba owo kiet eke oduŋde ke Enye inamke idiɔk-ŋkpɔ. Kpukpru owo eke enamde idiɔk-ŋkpɔ ikekwe Enye, inyuŋ ifiɔkke Enye.

⁷Ŋkpri nditɔ mi, ekuyak baba owo kiet ada mbufo awaha ɔŋkpɔŋ usuŋ: owo eke anamde edinen ido edi edinen, kpa nte Enye edide edinen;

⁸owo eke anamde idiɔk-ŋkpɔ edi eke Satan, koro Satan ananam idiɔk-ŋkpɔ toto ke eritɔŋɔ. Ema esio Eyen Abasi enim ke ntak emi, man Enye akpabiat utom Satan.

⁹Baba owo kiet eke Abasi okobonde inamke idiɔk-ŋkpɔ, koro se Abasi adade obon enye nte eyen oduŋde enye ke idem; enye inyuŋ ikemeke ndinam idiɔk-ŋkpɔ, sia edide Abasi okobon enye.

¹⁰Eda emi eyarare efiɔk nditɔ Abasi ye nditɔ Satan; baba owo kiet eke minamke edinen ido idige eke Abasi, ndien edi ntre ye owo emi mimaŋa eyen-ete esie.

¹¹Koro emi edi etop emi mbufo ekekopde toto ke eritɔŋɔ, ete, nnyin ikpama kiet eken;

¹²ikubiet Cain, emi ekedide eke andidiɔk, onyuŋ owotde eyen-ete esie. Ndien ntak owotde enye? Koro utom esiemɔ ɔdiɔkde, edi eke eyen-ete esie enende.

¹³Ekuyak idem akpa mbufo, nditɔ-ete, edieke ererimbot asuade mbufo.

¹⁴Nnyin imɔfiɔk ite imɔwɔrɔ ke mkpa ibe iduk ke uwem, ke emi nnyin imade nditɔ-ete. Owo eke mimaŋa-ma osuk odu ke mkpa.

¹⁵Kpukpru owo eke asuade eyen-ete esie edi obom: ndien mbufo efiɔk ete, baba obom kiet inyeneke nsinsi uwem ke esit esie.

¹⁶Nnyin ida emi ifiɔk ima, koro Enye akayakde uwem Esie ɔnɔ kabaŋa nnyin: nnyin nde ikponyuŋ iyak uwem nnyin inɔ kabaŋa nditɔ-ete.

¹⁷Edi owo eke enyenede inyene ererimbot emi, onyuŋ okutde eyen-ete esie ke unana, onyuŋ eberide mbɔm abaha enye, ima Abasi ekeme didie ndiduŋ owo oro ke esit?

¹⁸Ŋkpri nditɔ mi, eyak nnyin ikuma ke ikɔ-inua ye ke edeme, edi eyak nnyin ima ke erinanam ye ke akpanikɔ.

¹⁹Nnyin iyeda emi ifiɔk ite ida ye akpanikɔ, inyuŋ isɔŋɔ esit ke iso Esie ke ŋkpɔ eke esit obiomde nnyin:

²⁰koro Abasi okponde akan esit nnyin, onyuŋ ɔfiɔkde kpukpru ŋkpɔ.

²¹Ndima, edieke esit nnyin mibiomke nnyin

²²nnyin inyene uko ye Abasi; iyenyuŋ ibɔ se ededi eke ibeŋede ke ubɔk Esie, sia nnyin inimde mbet Esie, inyuŋ inamde se inemde Enye esit.

²³Ndien mbet Esie edi ntem, ete, nnyin ibuɔt idem ke enyiŋ Eyen Imɔ Jesus Christ, inyuŋ ima kiet eken, kpa nte Enye ɔnɔde nnyin item.

²⁴Owo emi onimde mbet Esie oduŋ ke Enye, Enye onyuŋ oduŋ ke esit owo oro. Nnyin inyuŋ ida emi ifiɔk ite, Enye oduŋ nnyin ke idem, oto ke Spirit emi Enye ɔkɔnɔde nnyin.