Read efik JUDGES 1 Bible Online

JUDGES 1 - efik bible

JUDGES 1

¹EDIKEM adaŋemi Joshua ama akakpa, nditɔ Israel ebup Jehovah, ete, Anie edibem iso ɔdɔk akaŋwana ekɔŋ ye mme Canaanite ɔnɔ nnyin?

²Ndien Jehovah ɔbɔrɔ ete, Judah eyedɔk: sese, mmada isɔŋ emi nsin enye ke ubɔk.

³Ndien Judah ɔdɔhɔ Simeon eyen-ete esie, ete, Tiene mi dɔk ke udeme mi, man nnyin ikeŋwana ekɔŋ ye mme Canaanite, ndien ami ŋko nyetiene fi ŋka ke udeme fo. Ndien Simeon etiene enye aka.

⁴Ntre Judah ɔdɔk; ndien Jehovah ada mme Canaanite ye mme Perizzite esin mmɔ ke ubɔk: ndien mmɔ ewot mmɔ tɔsin owo duop ke Bezek.

⁵Mmɔ enyuŋ ekut Adoni-bezek ke Bezek; ndien eŋwana ekɔŋ ye enye, enyuŋ ewot mme Canaanite ye mme Perizzite.

⁶Ndien Adoni-bezek efehe; ndien mmɔ ebine enye emum, ndien ekpok enye obodom nnuenubɔk ye obodom nnuenukot.

⁷Ndien Adoni-bezek ɔdɔhɔ, ete, Ndidem ata ye duop, emi ekekpokde mmɔ obodom nnuenubɔk ye obodom nnuenukot etetaŋ ŋkpɔ ke idak okpokoro mi: kpa nte ŋkanamde, kpa ntre ke Abasi onyuŋ anam mi usiene. Ndien mmɔ eda enye edi ke Jerusalem, ndien enye akpa do.

⁸Ndien nditɔ Judah eŋwana ekɔŋ ye Jerusalem, enyuŋ eda enye, enyuŋ esuan enye ke iso ofut, ndien ekimikaŋ ke obio.

⁹Ndien, ekem, nditɔ Judah esuhɔre eka ndiŋwana ekɔŋ ke mme Canaanite emi eduŋde ke ikpɔ obot, ye ke usuk, ye ke una-isɔŋ edem inyaŋ.

¹⁰Ndien Judah aka ekɔŋ ye mme Canaanite emi eduŋde ke Hebron: ndien enyiŋ Hebron ekebem iso ekere Kiriath-arba: ndien mmɔ ewot Sheshai, ye Ahimam, ye Talmai.

¹¹Ndien enye oto do aka ekɔŋ ye mme ndiduŋ Debir: ndien enyiŋ Debir ekebem iso ekere Kiriath-sepher (obio ŋwed).

¹²Ndien Caleb ɔdɔhɔ ete, Owo ama asuan Kiriath-sepher, onyuŋ ada enye, nyenɔ enye Achsah eyen mi aŋwan ɔdɔ.

¹³Ndien Othniel eyen Kenaz, ekpri eyen-ete Caleb, ada enye: ndien enye (Caleb) ada Achsah eyen esie aŋwan ɔnɔ enye ɔdɔ.

¹⁴Ndien edikem ke ini enye edide, enye onuk ebe, ete ebeŋe ete imɔ iŋwaŋ: ndien enye (ŋwan) odorore ke edem ass; ndien Caleb obup enye, ete, Afo oyom nso?

¹⁵Ndien enye ɔbɔrɔ enye, ete, Nɔ mi eti ŋkpɔ: koro afo ɔmɔnɔ mi edisat isɔŋ; nɔ mi idim mmɔŋ ŋko. Ndien Caleb ɔnɔ enye idim ke obot ye idim ke usuhɔre.

¹⁶Ekem, nditɔ mme Kenite, ukot Moses, eto ke obio eyop, esaŋa ye nditɔ Judah edɔk eka ke wilderness Judah, emi anade ke edem usuk-usuk Arad; ndien mmɔ eka ekeduŋ ye mbio oro.

¹⁷Ndien Judah etiene Simeon eyen-ete esie aka, ndien mmɔ esuan mme Canaanite emi eduŋde ke Zephath, enyuŋ esobo mmɔ fap.

¹⁸Ndien enyiŋ obio oro ekere Hormah. Ndien Judah ada Gaza ye adaŋa esie, ye Ashkelon ye adaŋa esie, ye Ekron ye adaŋa esie.

¹⁹Ndien Jehovah odu ye Judah; ndien enye ada edem obot enyene; koro enye mikwe nte osioŋode mme andiduŋ itihere efep, koro mmɔ enyenede chariot ukwak.

²⁰Ekem mmɔ eda Hebron enɔ Caleb, kpa nte Moses ɔkɔdɔhɔde: ndien enye osio nditɔ Anak ita efep ke esit.

²¹Edi nditɔ Benjamin ibinke mme Jebusite emi eduŋde ke Jerusalem, ifep; edi mme Jebusite eduŋ ke otu nditɔ Benjamin ke Jerusalem tutu osim mfin emi.

²²Ndien ufɔk Joseph ŋko edɔk eka ekɔŋ ye Bethel: Jehovah onyuŋ odu ye mmɔ.

²³Ndien ufɔk Joseph edɔŋ ekeyep Bethel: ndien enyiŋ obio oro ekebem iso ekere Luz.

²⁴Ndien mbon-uyep ekut owo ɔwɔrɔde ke obio, ndien mmɔ edɔhɔ enye, ete, Mbɔk, wut nnyin usuŋ uduk obio, ndien nnyin iyefɔn ido ye afo.

²⁵Ndien adaŋemi enye okowutde mmɔ usuŋ uduk obio, mmɔ esuan obio ke iso ofut; edi eyak owo oro ye ofuri ufɔk esie eka.

²⁶Ndien owo oro aka ke isɔŋ mme Hittite, ɔkɔbɔp obio, enyuŋ osio enye enyiŋ Luz: oro odi enyiŋ esie tutu osim mfin emi.

²⁷Ndien Manasseh ŋko idaha Beth-shean ye mme obio iŋwaŋ esie inyene, ye Taanach ye mme obio iŋwaŋ esie, inyuŋ isioho mme adiduŋ Dor ye mme obio iŋwaŋ esie, ye mme andiduŋ Ibleam ye mme obio iŋwaŋ esie, ye mme andiduŋ Megiddo ye mme obio iŋwaŋ esie; edi mme Canaanite ekeduak ndiduŋ ke isɔŋ oro.

²⁸Ndien, edikem, adaŋemi Israel esɔŋde odudu, mmɔ enam mme Canaanite, etomo utomo, edi ibɔhɔ mmɔ itie.

²⁹Ephraim inyuŋ isioŋoke mme Canaanite emi eduŋde ke Gezer ifep; edi mme Canaanite eduŋ ke Gezer ke otu mmɔ.

³⁰Zebulun inyuŋ isioŋoke mme adiduŋ Kitron, ye mme andiduŋ Nahalol ifep; edi mme Canaanite eduŋ ke otu mmɔ, enyuŋ ekabare edi mbon utomo.

³¹Asher inyuŋ isioŋoke mme andiduŋ Acco, ye mme andiduŋ Zidon, ye eke Ahlab, ye eke Achzib, ye eke Helbah, ye eke Aphik,

³²ye eke Rehob ifep; edi nditɔ Asher eduŋ ke otu mme Canaanite emi eduŋde ke isɔŋ oro: koro misioŋoke mmɔ ifep.

³³Naphtali inyuŋ isioŋoke mme andiduŋ Beth-shemesh, ye mme andiduŋ Beth-anath ifep; edi mɔ eduŋ ke otu mme Canaanite emi eduŋde ke isɔŋ oro: edi mme andiduŋ Beth-shemesh ye Beth-anath ekabare etomo mmɔ utomo.

³⁴Ekem mme Amorite efik nditɔ Dan esin ke obot: koro miyakke mmɔ esuhɔre ke itihere.

³⁵Mme Amorite enyuŋ eduak ndiduŋ ke obot Heres ke Aijalon, ye ke Shaalbim: edi ubɔk ufɔk Joseph odobi, ndien mmɔ oro ekabare etomo utomo.

³⁶Ndien adaŋa mme Amorite ɔtɔŋɔ ke obot Akrabbim, ke akwa itiat, ɔdɔdɔk.