Read efik JUDGES 10 Bible Online

JUDGES 10 - efik bible

JUDGES 10

¹NDIEN Tola, eyen Puah, eyen Dodo, owo Isaachar, etiene Abimelech ke edem adaha ada anyaŋa Israel; ndien enye oduŋ ke Shamir ke obot Ephraim.

²Ndien enye ekpe ikpe Israel ke isua edip ye ita. Ekem enye akpa, onyuŋ ɔbuhɔ ke Shamir.

³Ndien Jair, eyen Gilead, etiene enye ke edem adaha ada, onyuŋ ekpe ikpe Israel ke isua edip ye iba.

⁴Enye onyuŋ enyene nditɔ-iren edip ye duop eke edorode ke ass edip ye duop, enyuŋ enyenede obio edip ye duop, emi ekerede Havvoth-jair, tutu osim mfin emi, ndien mmɔ edu ke isɔŋ Gilead.

⁵Ekem Jair akpa, onyuŋ ɔbuhɔ ke Kamon.

⁶Ndien nditɔ Israel etɔŋɔ ntak enam idiɔk ke iso Jehovah, enyuŋ enam ŋkpɔ Baalim ye eke Ashtaroth, ye eke ndem Syria, ye eke ndem Zidon, ye eke ndem Moab, ye eke ndem nditɔ Ammon, ye eke ndem mme Philistine; mmɔ enyuŋ ekpɔŋ Jehovah, inyuŋ inamke ŋkpɔ esie.

⁷Ndien Jehovah ayat esit ye Israel, onyuŋ anyam mmɔ ɔnɔ mme Philistine, ye nditɔ Ammɔn ke ubɔk.

⁸Ndien toto ke isua oro, mmɔ efik enyuŋ etuk nditɔ Israel ke ofuri isua efureta, idem kpukpru nditɔ Israel eke edude ke edem Jordan oko ke isɔŋ mme Amorite emi edude ke Gilead.

⁹Nditɔ Ammon ŋko enyuŋ ebe Jordan ekeŋwana ekɔŋ ye Judah, ye Benjamin, ye ufɔk Ephraim ŋko-ŋko: ndien Israel ekut ukut eti-eti.

¹⁰Ndien nditɔ Israel eseme enɔ Jehovah, ete, Nnyin ima inam idiɔk ido ye afo: koro nnyin ikɔkpɔŋde Abasi nnyin, inyuŋ inam ŋkpɔ Baalim.

¹¹Ndien Jehovah ɔdɔhɔ nditɔ Israel, ete, Nte ŋkanyaŋake mbufo nsio ke ubɔk nditɔ Egypt, ye eke mme Amorite, ye eke nditɔ Ammon, ye eke mme Philistine?

¹²Ndien mme Zidonian, ye Amalek, ye nditɔ Maon ekefik mbufo; ndien mbufo eseme enɔ mi, ndien ami nnyaŋa mbufo nsio ke ubɔk mmɔ.

¹³Edi mbufo emekpɔn mi, enyuŋ enam ŋkpɔ mme abasi efen: mmɔdo mmendinyaŋake aba mbufo.

¹⁴Mbufo eka ekeseme enɔ mme abasi emi mbufo emekde: yak mmɔ enyaŋa mbufo ke ini nnanenyin mbufo.

¹⁵Ndien nditɔ Israel edɔhɔ Jehovah, ete, Nnyin ima inam idiɔk ido: nam nnyin ŋkpɔ ekededi eke afo amade; edi, mbɔk, kam nyaŋa nnyin mfin emi.

¹⁶Mmɔ enyuŋ esioŋo isen abasi ke otu mmɔ efep, enyuŋ enam ŋkpɔ Jehovah: ndien mbɔm ukut Israel anam enye ukpɔŋ.

¹⁷Ekem ewuk nditɔ Ammon, ete ebono ɔtɔ kiet, ndien mmɔ enam nna-ekɔŋ ke Gilead. Nditɔ Israel enyuŋ esop idem enam nna-ekɔŋ ke Mizpah.

¹⁸Ndien kpukpru owo, idem mbɔŋ Gilead, edɔhɔ kiet ye kiet, ete, Edi anie owo edibem iso aŋwana ekɔŋ ye nditɔ Ammon? enye eyedi etubom kpukpru mme andiduŋ Gilead.