Read efik JUDGES 11 Bible Online

JUDGES 11 - efik bible

JUDGES 11

¹NDIEN Jephthah a Gilead edi owo uko, onyuŋ edi eyen akpara kiet: ndien edi Gilead okobon Jephthah.

²Ŋwan Gilead onyuŋ aman nditɔ-iren ɔnɔ enye: ndien adaŋemi nditɔ-iren ŋwan esie ekponide, mmɔ ebin Jephthah efep, enyuŋ edɔhɔ enye, ete, Afo ududiaha akpa ke ufɔk ete nnyin: koro edide eyen akpara.

³Ndien Jephthah efehe ɔkpɔŋ nditɔ-ete esie, aka ɔkɔduŋ ke isɔŋ Tob: mme oburobut owo enyuŋ edian idem ye Jephthah, enyuŋ esaŋa ye enye ewɔrɔ.

⁴Edikem adaŋemi ndusuk ini ebede, nditɔ Ammon eŋwana ekɔŋ ye Israel.

⁵Ndien edikem, adaŋemi nditɔ Ammon eŋwanade ekɔŋ ye Israel, mbiowo Gilead eka ndida Jephthah ke isɔŋ Tob ndi:

⁶ndien mmɔ edɔhɔ Jephthah, ete, Di, ndien afo eyekabare edi etubom nnyin, man iŋwana ekɔŋ ye nditɔ Ammon.

⁷Ndien Jephthah ɔdɔhɔ mbiowo Gilead, ete, Nte mbufo ikesuaha mi, ikenyuŋ ibinke mi ke ufɔk ete mi ifep? Nsinam mbufo etienede mi, ndien, ke emi ke mbufo etiede ke nnaneyin?

⁸Ndien mbiowo Gilead edɔhɔ Jephthah, ete, Oro esin nnyin ikabare itiene fi ke emi: kam saŋa ye nnyin, kaŋwana ye nditɔ Ammon, ndien afo eyedi etubom nnyin, ye eke kpukpru mme andiduŋ Gilead.

⁹Ndien Jephthah ɔdɔhɔ mbiowo Gilead, ete, Mbufo ema eda mi efiak ndiŋwana ekɔŋ ye nditɔ Ammon, ndien Jehovah ama onyuŋ ada mmɔ onim ke iso mi, nte ami nyedi etubom mbufo?

¹⁰Ndien mbiowo Gilead edɔhɔ Jephthah, ete, Jehovah edi ntiense ke ufɔt nnyin, edieke nnyin minamke ntre ke uyo fo.

¹¹Ndien Jephthah asaŋa ye mbiowo Gilead: ndien Jephthah etiŋ kpukpru ikɔ esie ke iso Jehovah ke Mizpah.

¹²Ekem Jephthah ɔdɔŋ mme isuŋ-utom ke ɔtɔ edidem nditɔ Ammon, ete, Mmenyene nso ikɔ ye afo, emi afo edide ndiŋwana ekɔŋ ye ami ke isɔŋ mi?

¹³Ndien edidem nditɔ Ammon ɔdɔhɔ mme isuŋ-utom Jephthah, ete, Koro Israel akadade isɔŋ mi, ke ini enye okotode ke Egypt ɔdɔk, ɔtɔŋɔde ke Arnon tutu osim ke Jabbok, ye ke Jordan: yak mmɔ ndien nɔ mi suŋ.

¹⁴Ndien Jephthah ɔtɔŋɔ ntak ɔdɔŋ mme isuŋ eŋwen utom ke ɔtɔ edidem nditɔ Ammon;

¹⁵onyuŋ ɔdɔhɔ enye, ete, Ntem ke Jephthah ɔdɔhɔ ete, Isreal ikadaha isɔŋ Moab, ikonyuŋ idaha isɔŋ nditɔ Ammon:

¹⁶edi adaŋemi Israel ewɔŋɔde ke Egypt edɔk, mmɔ esaŋa ke wilderness tutu esim ke Ididuot Inyaŋ, ndien esim Kadesh:

¹⁷ndien Israel ɔdɔŋ mme isuŋ utom ke ɔtɔ edidem Edom, ete, Mbɔk, yak nsaŋa ke isɔŋ fo mbe: edi edidem Edom ikopke. Ndien mmɔ enyuŋ edɔŋ utom ke ɔtɔ edidem Moab: edi enye inyuŋ inyimeke: ndien Israel etie ke Kadesh.

¹⁸Ndien mmɔ esaŋa ke wilderness ekabare ekan isɔŋ Edom, ye isɔŋ Moab ke edem, ndien ediwɔrɔ ke edem usiaha-utin isɔŋ Moab, ekenam nna ke edem Arnon oko, edi mmɔ idukke ke adaŋa Moab koro Arnon edide adaŋa Moab.

¹⁹Ndien Israel ɔdɔŋ mme isuŋ-utom ke ɔtɔ Sihon edidem mme Amorite, edidem Heshbon; Israel onyuŋ ɔdɔhɔ enye, ete, Mbɔk yak nsaŋa ke isɔŋ fo mbe ŋka ke ebiet mi.

²⁰Edi Sihon ibuɔtke idem esie ye Israel, inyuŋ iyakke mmɔ esaŋa ke esit adaŋa esie ebe: Sihon onyuŋ obon kpukpru ikɔt esie: ndien mmɔ enam nna-ekɔŋ ke Jahaz, enyuŋ eŋwana ye Israel.

²¹Ndien Jehovah Abasi Israel ada Sihon ye kpukpru ikɔt esie esin Israel ke ubɔk, ndien mmɔ esuan mmɔ: ntem ke Israel ekeda ofuri isɔŋ mme Amorite emi eduŋde ke edem oro.

²²Mmɔ enyuŋ eda ofuri adaŋa mme Amorite, ɔtɔŋɔde ke Arnon tutu osim ke Jabbok, onyuŋ ɔtɔŋɔde ke wilderness tutu osim ke Jordan.

²³Ntem ke Jehovah Abasi Israel ekebin mme Amorite ke iso ikɔt esie Israel efep, ndien afo oyom ndida enye.

²⁴Nte afo udaha se Chemosh abasi fo ɔnɔde fi enyene? Ntre ke nnyin idida kpukpru se Jehovah Abasi nnyin ebinde ke iso nnyin efep.

²⁵Nte afo ɔfɔn ndien akan Balak eyen Zippor, edidem Moab? Nte enye ama ɔtɔhɔ ye Israel, mme aŋwana ekɔŋ ye mmɔ?

²⁶Emi Israel eduŋde ke Heshbon ye ke mme obio iŋwaŋ esie, ye ke Aroer ye ke kpukpru mme obio emi edude edem Armon, ke ofuri isua ikie ita, nsinam mbufo ndien mikebɔhɔ mmɔ ke ofuri ini oro?

²⁷Ami nduehe fi ndien baba ŋkpɔ kiet, edi afo anam idiɔk ye ami ke eridi ndiŋwana ekɔŋ ye ami: yak Jehovah, Ebierikpe, ekpe ikpe ke ufɔt nditɔ Israel ye nditɔ Ammon mfin emi.

²⁸Edi edikem nditɔ Ammon ikopke uyo Jephthah oro enye ɔkɔdɔŋde ɔkɔdɔhɔ ye enye.

²⁹Ekem spirit Jehovah edidoro Jephthah ke idem, ndien enye asaŋa ke Gilead, ye Manasseh ebe, onyuŋ oto aka Mizpeh Gilead, ndien oto ke Mizpeh Gilead ebe aka okosim nditɔ Ammon.

³⁰Ndien Jephthah akaŋa ɔnɔ Jehovah, ete, Edieke afo edidade nditɔ Ammon

³¹esin mi ke ubɔk, ama ekem, andiwɔrɔ eke ediwɔrɔde ke enyin-usuŋ ufɔk mi, idi ndisobo ye ami, ke adaŋemi nditode ke ɔtɔ nditɔ Ammon mfiak ndi ke ifure, iditreke ndinyene Jehovah, ndien nyewa enye ke edifɔp uwa.

³²Ndien Jephthah ebe okosim nditɔ Ammon, akaŋwana ekɔŋ ye mmɔ; ndien Jehovah ada mmɔ esin enye ke ubɔk.

³³Ndien enye asuan mmɔ edehe, ɔtɔŋɔde ke Aroer, tutu osim ke Minnith, obio edip, tutu osim ke Abel-cheramim. Ntem ke nditɔ Ammon esuhɔre ke iso nditɔ Israel.

³⁴Ekem Jephthah edi ke Mizpah ke ufɔk esie, ndien sese, adiaha esie ada ekɔmɔ ye unek oto edi edisobo ye enye: ndien enye edi ikpɔŋ eyen esie: inyeneke efen ibɔhɔke enye, edide eren, onyuŋ edide ŋwan.

³⁵Edikem adaŋemi enye okutde eyen oro, enye awai ɔfɔŋidem esie, onyuŋ ɔdɔhɔ ete, Ah, eyen mi, afo anam mi nsuhɔre eti-eti, afo onyuŋ odu ke otu mme mmɔ emi edutuhɔde mi: koro mma ŋkubɔre inua mi nnɔ Jehovah, ndien ndikwe nte mfiakde edem.

³⁶Ndien eyen oro ɔdɔhɔ enye, ete, Ete mi, edieke afo ɔkɔkubɔrede inua fo ɔnɔ Jehovah, nam ye ami kpa nte ɔkɔwɔrɔde fi ke inua: koro Jehovah ama osio usiene ye mme asua fo, kpa nditɔ Ammon, ɔnɔ fi.

³⁷Ndien enye ɔdɔhɔ ete esie, ete, Yak enam ŋkpɔ emi ye ami: yak mi ntie ɔfiɔŋ iba, man nsuhɔre nsaŋa ke ikpɔ obot, nnyuŋ ntua emi mmendidɔhɔ ebe, ami ye mme nsaŋa mi.

³⁸Ndien enye (ete) ɔdɔhɔ enye, ete, Ka. Ndien enye ayak eyen oro aka ke ɔfiɔŋ iba; ndien enye asaŋa ke ikpɔ obot ye mme nsaŋa esie atua koro enye mididɔhɔ ebe.

³⁹Edikem ke ɔyɔhɔ ɔfiɔŋ iba, enye afiak ke ebiet ete esie, ndien ete ada enye anam akaŋa oro enye akakaŋade: ndien enye ifiɔkke eren-owo.

⁴⁰Ndien akabare edi ido ke Israel, ke nditɔ iban Israel ndika kpukpru isua ŋkatua eyen Jephthah a Gilead aŋwan ke usen inaŋ ke isua.