Read efik JUDGES 13 Bible Online

JUDGES 13 - efik bible

JUDGES 13

¹EKEM nditɔ Israel etɔŋɔ ntak enam idiɔk ke iso Jehovah; ndien Jehovah ada mmɔ ɔnɔ mme Philistine ke ubɔk ke ofuri isua aba.

²Ndien eyen Zorah kiet odu ekere Manoah, oto ke ubon Dan; ndien ŋwan esie edi ada, inyuŋ imanke eyen.

³Ekem angel Jehovah owut ŋwan oro idem, onyuŋ ɔdɔhɔ enye, ete, Sese, afo edi ada, uka-unyuŋ umanke eyen: edi afo eyeyomo, onyuŋ aman eyen eren.

⁴Mbɔk, tim kpeme idem fo, ndien, kunyuŋ uŋwɔŋ wine ye mmin; kunyuŋ udia edidehe ŋkpɔ baba kiet:

⁵koro, sese, afo eyeyomo, onyuŋ aman eyen-eren; baba akaraŋ kiet okunyuŋ otuk enye ibuot: koro eyen oro eyedi Nazarite Abasi toto ke emana esie: ndien enye eyetɔŋɔ ndinyaŋa Israel nsio mme Philistine ke ubɔk.

⁶Ndien ŋwan oro aka eketiŋ ɔnɔ ebe esie, ete, Owo Abasi kiet okosim mi, ndien iso esie ebiet iso angel Abasi, enyene ndik eti-eti: edi ŋkobupke enye ebiet emi enye okotode, enye inyuŋ isiakke enyiŋ esie inɔ mi:

⁷enye onyuŋ ɔdɔhɔ mi, ete, Sese, afo eyeyomo, onyuŋ aman eyen-eren; kuŋwɔŋ wine, ndien, ye mmin, kunyuŋ udia edidehe ŋkpɔ baba kiet: koro eyen oro eyedi Nazarite Abasi toto ke emana esie, tutu osim usen mkpa esie.

⁸Ndien Manoah ekpe Jehovah ubɔk, onyuŋ ɔdɔhɔ ete, O Ɔbɔŋ mi, mbɔk, yak owo Abasi oro afo ɔkɔdɔŋde utom, ɔtɔŋɔ ntak edi ke ɔtɔ nnyin, editeme nnyin se nnyin idinamde ye eyen emi edimanade.

⁹Ndien Abasi okop uyo Manoah; angel Abasi onyuŋ ɔtɔŋɔ ntak osim ŋwan oro, nte enye etiede ke iŋwaŋ: edi Manoah ebe esie iduhe ye enye.

¹⁰Ndien ŋwan ɔsɔp itɔk efehe eketiŋ ɔnɔ ebe esie, onyuŋ ɔdɔhɔ enye, ete, Sese, owo oro okosimde mi ke usen oro omowut mi idem.

¹¹Ndien Manoah adaha ke enyɔŋ, etiene ŋwan esie edem, okosim owo oro, onyuŋ obup enye, ete, Nte afo edi owo oro ɔkɔdɔhɔde ye ŋwan emi?

¹²Ndien enye ete, Edi ami. Ndien Manoah ɔdɔhɔ ete, Ama osu ke uyo fo, nso ididi ido eyen, ye se ekpenamde ye eyen?

¹³Ndien angel Jehovah ɔdɔhɔ Manoah, ete, Yak ŋwan osio idem esie efep ke kpukpru se ŋkɔdɔhɔde enye.

¹⁴Enye okudia baba ŋkpɔ kiet eke otode ke vine, okunyuŋ ɔŋwɔŋ wine ye mmin, okunyuŋ adia baba edidehe ŋkpɔ kiet: yak enye etiŋ enyin ke kpukpru se ŋketemede enye.

¹⁵Ndien Manoah ɔdɔhɔ angel Jehovah, ete, Mbɔk, yak nnyin inim fi mi esisit, tutu nnyin item eyen ebot idinim fi ke iso.

¹⁶Ndien angel Jehovah ɔdɔhɔ Manoah, ete, Afo okposuk ononim mi, nditaha uyo fo: edi ama awa edifɔp uwa, fɔp enye nɔ Jehovah. Koro Manoah mikɔfiɔkke ite ke enye edi angel Jehovah.

¹⁷Ndien Manoah ɔdɔhɔ angel Jehovah, ete, Enyiŋ fo ekere didie? Koro nnyin iyekpono fi, adaŋemi mme ikɔ fo ediwɔrɔde.

¹⁸Ndien angel Jehovah ɔdɔhɔ enye, ete, Nsinam afo obupde enyiŋ mi? ŋkɔm enye edi utibe.

¹⁹Ekem Manoah ada eyen ebot oro ye inuak-udia ɔfɔp ɔnɔ Jehovah ke enyɔŋ itiat oro: ndien enye anam utibe ŋkpɔ; ndien Manoah ye ŋwan esie ese.

²⁰Ndien edikem adaŋemi ikaŋ obuberede ke itie-uwa ɔdɔk ke enyɔŋ, angel Jehovah asaŋa ke edeme-ikaŋ itie-uwa ɔdɔk. Ndien Manoah ye ŋwan esie ese, ndien eduɔ ke isɔŋ ekubi iso mmɔ.

²¹Ndien Manoah ye ŋwan esie itɔŋɔke aba ntak ikut angel Jehovah, Ndien Manoah ɔfiɔk ete ke angel Jehovah edi oro.

²²Ndien Manoah ɔdɔhɔ ŋwan esie, ete, Nnyin iditreke ndikpa:

²³koro nnyin imokut Abasi. Edi ŋwan esie ɔdɔhɔ enye, ete, Ekpedi nte Jehovah akpamade ndiwot nnyin, enye ikpɔbɔhɔ nnyin edifɔp uwa ye inuak-udia ke ubɔk, ikponyuŋ iwutke nnyin kpukpru ŋkpɔ emi, ikponyuŋ isianke oruk ŋkpɔ ntem inɔ nnyin ke ini emi.

²⁴Edikem ŋwan esie aman eyen eren, onyuŋ osio enye enyiŋ Samson: eyen onyuŋ ɔkɔri, Jehovah onyuŋ ɔdiɔŋ enye ŋko.

²⁵Ndien spirit Jehovah ɔtɔŋɔ ndidemere enye ndien-ndien ke nna-ekɔŋ Dan ke ufɔt Zorah ye Eshtaol.