Read efik JUDGES 14 Bible Online

JUDGES 14 - efik bible

JUDGES 14

¹EKEM Samson ɔsuhɔre aka Timnah, okokut ŋwan kiet ke otu nditɔ mme Philistine iban ke Timnah.

²Ndien enye ɔdɔk eketiŋ ɔnɔ ete esie ye eka esie, ete, Mma ŋkut ŋwan kiet ke otu nditɔ mme Philistine iban ke Timnah: mbufo eda enye ndien enɔ mi ndɔ.

³Ndien ete esie ye eka esie edɔhɔ enye, ete, Nte baba ŋwan kiet iduhe ke otu nditɔ-iban nditɔ-ete fo, ye ke otu ofuri oruk nnyin, eke esinde fi aka ndida ŋwan ke otu mme Philistine edut? Edi Samson ɔdɔhɔ ete esie, ete, Da enye nɔ mi: koro enye enemde mi esit.

⁴Edi ete esie ye eka esie ifiɔkke ite ke emi oto Jehovah: koro enye oyomde usuŋ nte anamde mme Philistine: koro mme Philistine ekande Israel ke ini oro.

⁵Ekem Samson ye ete esie ye eka esie esuhɔre eka ke Timnah; ndien adaŋemi enye osimde ke iŋwaŋ vine Timnah, abak lion kiet ɔbiɔŋɔ enye okuni.

⁶Ndien spirit Jehovah oduk enye ke idem, ndien enye awai lion nte akpawaide eyen ebot, ŋkpɔ inyuŋ iduhe enye ke ubɔk: edi enye isianke ete esie ye eka esie se enye akanamde.

⁷Ndien enye ɔsuhɔre aka ɔkɔdɔhɔ ye ŋwan oro: enye onyuŋ enem Samson esit.

⁸Ekem ini ebe, ndien enye afiak aka ndidɔ ŋwan oro, ndien enye awaha, ete ise okpo lion oro: ndien, sese, otu ɔkwɔk ye aran ɔkwɔk odu ke esit okpo lion oro.

⁹Ndien enye ada enye ke ubɔk esie, asaŋa adia, edisim ete esie ye eka esie, onyuŋ ɔnɔ mmɔ edia: edi idɔhɔke mmɔ, ite ke imɔ ikosio aran-ɔkwɔk oro ke okpo lion oro.

¹⁰Ndien ete esie ɔsuhɔre aka ke ebiet ŋwan oro; Samson onyuŋ anam akamba udia do: koro ntem ke mkparawa ekam enam.

¹¹Edikem adaŋemi mmɔ ekekutde enye, mmɔ esio owo edip ye duop, ete edisaŋa ye enye.

¹²Ekem Samson ɔdɔhɔ mmɔ, ete, Yak ntop ŋke nnɔ mbufo, ndien: mbufo ema esiak enye enɔ mi ke usen udia itiaba, enyuŋ efiɔk enye, nyenɔ mbufo ndien shirt edip ye duop ye ukpuhɔ edisine-ŋkpɔ edip ye duop.

¹³Edi edieke mbufo mikemeke ndisiak enye nnɔ mi, mbufo eyenɔ mi shirt edip ye duop, ye ukpuhɔ edisine-ŋkpɔ edip ye duop. Ndien mmɔ edɔhɔ enye, ete, Top ŋke fo man nnyin ikop.

¹⁴Ndien enye ɔdɔhɔ mmɔ, ete, Udia okoto ke andidia, iniŋe okonyuŋ oto ke se idide ɔkpɔsɔŋ.

¹⁵Ndien mmɔ ikekemeke ndisiak ŋke oro ke usen ita. Edikem ke ɔyɔhɔ usen itiaba, mmɔ edɔhɔ ŋwan Samson, ete, Tap uberi, man enye asiak ŋke emi ɔnɔ nnyin, mbak nnyin idifɔp fi ye ufɔk usɔ ke ikaŋ: nte mbufo ekekot nnyin man ebɔ nnyin ŋkpɔ?

¹⁶Nte idige ntre? Ndien ŋwan Samson atua ɔnɔ enye, ete, Afo asasua mi, unyuŋ umaŋa mi: ama otop ŋke ɔnɔ nditɔ oruk mi, ndien ukasiakke unɔ mi. Ndien enye ɔdɔhɔ enye, ete, Sese, ŋkasiakke nnɔ ete mi ye eka mi, nte nditiŋ nnɔ fi ndien?

¹⁷Ndien ŋwan osuk atua eyet ɔnɔ enye ke ofuri usen itiaba emi mmɔ enimde udia oro: ndien edikem ke ɔyɔhɔ usen itiaba, enye etiŋ ɔnɔ ŋwan; koro ŋwan eyirede enye ntre: ndien ŋwan emen ŋke etiŋ ɔnɔ nditɔ oruk esie.

¹⁸Ekem mbio-obio edɔhɔ enye ke ɔyɔhɔ usen itiaba, ke eyo mika-ikutke kaŋa, ete, Nso ŋkpɔ eniŋe akan aran-ɔkwɔk? Nso ŋkpɔ onyuŋ ɔsɔŋ akan lion? Ndien enye ɔdɔhɔ mmɔ, ete, Ke mbufo mikpedaha uman enaŋ mi ifuŋ isɔŋ, ikpesiakke ŋke mi.

¹⁹Ndien spirit Jehovah oduk enye ke idem, ndien enye ɔsuhɔre aka ke Ashkelon, okowot owo mmɔ edip ye duop, onyuŋ ada mbume mmɔ, ndien emen ukpuhɔ edisine ŋkpɔ ɔnɔ mme andisiak ŋke. Esit onyuŋ ayat enye, ndien enye ɔdɔk aka ke ufɔk ete esie.

²⁰Ndien eda ŋwan Samson enɔ nsaŋa esie oro ekedide ufan esie.