Read efik JUDGES 15 Bible Online

JUDGES 15 - efik bible

JUDGES 15

¹EDIKEM, ke ini ama ebe, osim ke ini ukpeŋe wheat, ndien Samson ada eyen ebot aka ndise ŋwan esie; ndien enye ɔdɔhɔ ete, Mmɔŋ nduk ke ubet aŋwan mi. Edi ete aŋwan iyakke enye oduk.

²Ete aŋwan onyuŋ ɔdɔhɔ ete, Ŋkese nte afo asasua enye; ndien mmen enye nnɔ nsaŋa fo: nte ekpri eyen-eka esie aŋwan iyehe ikan enye? Mbɔk, yak enye edi okuo ke ibuot enye eken.

³Ndien Samson ɔdɔhɔ mmɔ, ete, Ke emi ikɔ idibiomke mi ibaŋa mme Philistine edieke ami nnamde mmɔ idiɔk ŋkpɔ.

⁴Ndien Samson aka okomum jackal ikie ita, onyuŋ ada nsaraŋikaŋ, akabare mmɔ adian isim ye isim, ndien ada nsaraŋikaŋ kiet ɔbɔp ke ufɔt isim mbiba.

⁵Ndien enye odomo ikaŋ ke nsaraŋikaŋ, ndien ebin mmɔ esin ke ibokpot mme Philistine eke mikpeŋeke, onyuŋ ɔfɔp otu ebek ibokpot, ye se mikpeŋeke, ye mme iŋwaŋ olive.

⁶Ndien mme Philistine ebup ete, Anie owo anam emi? Ndien ebɔrɔ ete, Samson ukot eyen Timnah: koro enye akadade ŋwan esie ɔnɔ nsaŋa esie. Ndien mme Philistine edɔk ekefɔp ŋwan ye ete esie ke ikaŋ.

⁷Ndien Samson ɔdɔhɔ mmɔ, ete, Sia mbufo ekenam oruk ŋkpɔ emi ntem, nditreke ndisio usiene ye mbufo, ndien mma nnam ntre ndidahado.

⁸Ndien enye okpok mmɔ ukot ye ifuhi edehe. Ndien enye ɔsuhɔre aka eketie ke aba akwa itiat Etam.

⁹Ekem mme Philistine edɔk ekenam nna-ekɔŋ ke Judah, ndien ebono ke Lehi.

¹⁰Ndien nditɔ Judah ebup ete, Mbufo emedɔk ndinam ikɔ ye nnyin ebaŋa nso? Ndien mmɔ ebɔrɔ ete, Nnyin idɔk idi ndibɔp Samson, man inam enye kpa nte enye akanamde nnyin.

¹¹Ndien tɔsin owo Judah ita esuhɔre eka ke aba akwa itiat Etam, ekedɔhɔ Samson, ete, Nte afo ufiɔkke ete ke mme Philistine edi mme etubom nnyin? Nso ke afo anam emi ye nnyin? Ndien enye ɔdɔhɔ mmɔ, ete, Kpa nte mmɔ ekenamde mi, kpa ntre ke ami ŋkonyuŋ nnam mmɔ.

¹²Ndien mmɔ edɔhɔ enye, ete, Nnyin imesuhɔre idi ndibɔp fi, man ida fi isin mme Philistine ke ubɔk. Ndien Samson ɔdɔhɔ mmɔ, ete, Mbufo eŋwɔŋɔ enɔ mi ete ke mbufo ke idem mbufo iditukke mi.

¹³Ndien mmɔ edɔhɔ enye, ete, Ihih, ŋkɔm nnyin iyetim ibɔp fi, inyuŋ ida fi isin mmɔ ke ubɔk: edi nnyin idiwotke fi. Ndien mmɔ eda mbufa uruk iba ebɔp enye, enyuŋ eda enye eto ke itiat oro edɔk.

¹⁴Enye oto edisim Lehi, ndien mme Philistine ekpɔk ukube ke ini ekutde enye: ndien spirit Jehovah oduk enye ke idem, ndien uruk emi ɔbɔbɔde enye ke ubɔk, akabare etie nte mfibe eke ɔfɔpde ke ikaŋ, ndien uruk ɔkpɔhɔ enye ke ubɔk.

¹⁵Ndien enye okut obufa mbaŋ ass, onyuŋ anyan ubɔk esie emen enye ada owot tɔsin owo.

¹⁶Ndien Samson ɔdɔhɔ ete, Mmada mbaŋ ass ŋkubi otu, otu iba: mmada mbaŋ ass ŋwot tɔsin owo.

¹⁷Edikem ke enye ama ɔkɔdɔhɔ ama, enye ayak mbaŋ oro ke ubɔk esie ɔduɔk, ndien osio ebiet oro enyiŋ Ramath-lehi.

¹⁸Ndien ke ini itɔŋ asatde enye eti-eti, enye eseme ɔnɔ Jehovah, ete, Afo ama ada akwa erinyaŋa emi esin owo fo ke ubɔk: ndien ke emi mmɔŋ nyom ndikpa nsat-itɔŋ nyeyuŋ nduɔ ke ubɔk mbon edut emi.

¹⁹Ndien Abasi asiak odudu emi odude ke Lehi, mmɔŋ onyuŋ ɔwɔrɔ ke esit; ndien adaŋemi enye ɔŋwɔŋde, spirit esie afiak edi, enye onyuŋ eset: mmɔdo enye osiode enye enyiŋ En-hakkore, emi odude ke Lehi tutu osim mfin emi.

²⁰Ndien enye ekpe ikpe Israel ke eyo mme Philistine, ke isua edip.