Read efik JUDGES 16 Bible Online

JUDGES 16 - efik bible

JUDGES 16

¹EKEM Samson aka Gaza okokut akpara kiet, onyuŋ aka ebiet esie.

²Ndien etiŋ enɔ mbio-obio Gaza, ete, Samson emedi ken. Ndien mmɔ ekan enye ekuk, ena ekpeme enye ofuri okoneyo ke inua-otop obio, enyuŋ edop ofuri okoneyo, ete, Eyo ama esiere ke usenubɔk nnyin iyewot enye.

³Edi Samson anana tutu osim ufɔt okoneyo, ndien edemere ke ufɔt okoneyo, aka okomum itim otop obio, ye obubɔk itim mbiba, edibere mmɔ, ye eto usin-usuŋ ŋko, emen mmɔ odori ke afara esiemmɔ, ndien obiom mmɔ ɔdɔk ke ibuot obot emi asakde iso ese Hebron.

⁴Edikem ke ŋkpɔ oro ema ekebe, enye aka akama ŋwan kiet, ekere Delilah,

⁵ke itihere Sorek. Ndien mbɔŋ mme Philistine edɔk eka ɔtɔ ŋwan oro, ekedɔhɔ enye, ete, Tap enye, nyuŋ fiɔk ebiet emi akwa odudu esie odude, ye usuŋ nte nnyin idikemde ubɔk ye enye, inyuŋ ibɔp enye, man ituhɔ enye: ndien kpukpru nnyin kiet kiet iyenɔ fi mbak silver ikie, ikie, ke itie duopekiet.

⁶Ekem Delilah ɔdɔhɔ Samson, ete, Mbɔk, sian mi ebiet akwa odudu fo, ye usuŋ nte ekpebɔpde fi, man etuhɔ fi.

⁷Ndien Samson ɔdɔhɔ ete, Ema eda mbufa uruk itiaba eke misatke, ebop mi, idem eyemem mi, nyenyuŋ ntie nte owo efen.

⁸Ndien mbɔŋ mme Philistine eda mbufa uruk itiaba eke misatke, edɔk ekesɔk ŋwan oro; ndien enye ada mmɔ ɔbɔp enye. Ndien mbon udibe etie ye enye ke ubet.

⁹Ekem ŋwan ɔdɔhɔ enye, ete, Mme Philistine emɔŋ emum fi, Samson. Ndien enye okibi uruk oro, kpa nte owo okibide ndidi uruese, adaŋemi enye okopde utebe ikaŋ. Ndien mmɔ ifiɔkke odudu esie.

¹⁰Ndien Delilah ɔdɔhɔ Samson, ete, Sese, afo ama abiaŋa mi, onyuŋ osu nsu ɔnɔ mi: mbɔk, kam sian mi usuŋ nte ekpebɔpde fi.

¹¹Ndien Samson ɔdɔhɔ enye, ete, Ema ebɔp mi ke mbufa mfiaha-mfiaha uruk eke mika-inamke utom ke esit, idem eyemem mi,

¹²nyenyuŋ mbiet owo efen. Ndien Delilah ada mbufa mfiaha-mfiaha uruk ɔbɔp enye ke esit, ndien ɔdɔhɔ enye, ete, Mme Philistine emɔŋ emum fi, Samson. Ndien mbon udibe etie ke ubet. Ndien enye okibi mmɔ ke ubɔk esie efep nte ndidi.

¹³Ndien Delilah ɔdɔhɔ Samson, ete, Afo ama abiaŋa mi tutu osim emi, onyuŋ osu nsu ɔnɔ mi: sian mi ŋkpɔ eke ekpedade ebɔp fi. Ndien Samson ɔdɔhɔ enye, ete, Afo ama ataŋ idet ibuot mi itiaba ɔdɔk esin ke ɔfɔŋ.

¹⁴Ndien ŋwan ada ɔkpɔhɔ owuk enye (idet), onyuŋ ɔdɔhɔ enye, ete, Mme Philistine emɔŋ emum fi, Samson. Ndien enye edemere ke idap, odibere ɔkpɔhɔ akpara ye ɔfɔŋ.

¹⁵Ndien ŋwan ɔdɔhɔ enye, ete, Afo anam didie ɔdɔhɔ, ete, ke amama mi, ke adaŋemi esit fo miduhe ye ami? Afo ama abiaŋa mi utim ikata emi, uka-unyuŋ usianke mi ebiet emi akamba odudu fo odude.

¹⁶Edikem, koro ŋwan ɔkɔbɔde enye kpukpru usen ke ikɔ esie, onyuŋ eyirede enye, onyuŋ ayat enye esit, tutu enye oyom ndikpa;

¹⁷ekem enye (Samson) ayarare ofuri esit esie ɔnɔ enye, onyuŋ ɔdɔhɔ enye, ete, Akaraŋ akanam itukke mi ke ibuot: koro ami ndide Nazirite Abasi toto nte ŋkamamana: ema ekporo mi idet, odudu mi eyekpɔŋ mi, ndien idem eyemem mi nte owo efen.

¹⁸Ndien adaŋemi Delilah okutde, ete ke enye ama ayarare ofuri esit esie ɔnɔ imɔ, enye ɔdɔŋ ekekot mbɔŋ mme Philistine, ete, “Mbufo edɔk edi ini kiet emi:” koro enye ama aka yarare ofuri esit esie ɔnɔ ŋwan oro. Ndien mbɔŋ mme Philistine edɔk eka ɔtɔ ŋwan oro, enyuŋ ekama silver ke ubɔk mmɔ edi.

¹⁹Ndien ŋwan anam enye ana enye ke edɔŋ ede idap, onyuŋ okot owo edikporo enye mfiaha idet ibuot itiaba: ndien ɔtɔŋɔ ndituhɔ enye, ndien odudu esie ɔkpɔŋ enye.

²⁰Ndien enye ɔdɔhɔ ete, Mme Philistine emɔŋ emum fi Samson. Ndien enye edemere ke idap, onyuŋ ɔdɔhɔ ete, Nyewɔrɔ nte ŋkam ŋwɔrɔde, nnyuŋ nnyeŋe idem mi. Edi enye ifiɔkke ite ke Jehovah ɔmɔkpɔŋ imɔ.

²¹Ndien mme Philistine emum enye, enyuŋ etibe enye enyin, enyuŋ eda enye esuhɔre ke Gaza, ndien ekɔbi enye ke ibuka okpoho, ndien enye etie ke ufɔk ŋkpɔkɔbi ɔkɔk.

²²Ekem idet ibuot esie ɔtɔŋɔ ndikɔri ntie nte ke ini oro ekekporode enye.

²³Ndien mbɔŋ mme Philistine esop idem ɔtɔ kiet, ete ewa akamba idiɔŋ enɔ Dagon abasi mmɔ, enyuŋ ebre mbre: ndien mmɔ edɔhɔ ete, Abasi nnyin ama ada Samson usua nnyin esin nnyin ke ubɔk.

²⁴Ndien adaŋemi mbio-obio ekutde enye, mmɔ ekɔm abasi mmɔ: koro mmɔ edɔhɔde ete, abasi nnyin ama ada usua nnyin, emi abiatde idut nnyin, onyuŋ owotde nnyin ediwak, esin nnyin ke ubɔk.

²⁵Edikem adaŋemi esit adatde mmɔ, mmɔ edɔhɔ ete, Ekot Samson edi edibre mbre ɔnɔ nnyin. Ndien mmɔ ekot Samson, ete enye oto ke ufɔk ŋkpɔkɔbi edi edibre mbre ke iso mmɔ: ndien mmɔ enim enye ke ufaŋ obubɔk.

²⁶Ndien Samson ɔdɔhɔ eyenɔwɔŋ emi omumde enye ubɔk, ete, Sana mi yak mfiɔŋɔ obubɔk emi ufɔk odorode ke esit, man mbere ke esit.

²⁷Ndien iren-owo ye iban eyɔhɔ ke ufɔk: kpukpru mbɔŋ mme Philistine enyuŋ edu do; iren ye iban tɔsin owo ita enyuŋ ebono ke enyɔŋ ufɔk, ese nte Samson ebrede mbre.

²⁸Ndien Samson okot Jehovah, ete, Ɔbɔŋ Jehovah, ti mi, mbɔk, nyuŋ sɔŋ mi idem, ini kiet emi, mbɔk Abasi, man nsio usiene ye mme Philistine mbaŋa enyin mi mbiba, ini kiet.

²⁹Ndien Samson afat ufɔt-ufɔt obubɔk mbiba emi ufɔk odorode ke esit, emi enye onyuŋ eberede ke esit, kiet ke ubɔk nnasia esie, kiet ke ubɔk ufien.

³⁰Ndien Samson ete, Yak mkpa mkpa ye mme Philistine. Ndien enye onuk ɔkpɔsɔŋ-ɔkpɔsɔŋ, ndien ufɔk ɔduɔ ofuk mbɔŋ, ye kpukpru owo oro edude ke esit. Ntre mme akpaŋa mkpa emi enye okowotde ke mkpa esie, ewak ekan mme mmɔ emi enye ekewotde ke uwem esie.

³¹Ndien nditɔ-ete esie ye ofuri ufɔk ete esie esuhɔre ekemen enye, eda edɔk, ndien ebuk enye ke ufɔt Zorah ye Eshtaol, ke udi Manoah ete esie. Ntre ke enye ekpe ikpe Israel ke isua edip.