Read efik JUDGES 18 Bible Online

JUDGES 18 - efik bible

JUDGES 18

¹KE eyo oro edidem iduhe ke Israel. Ndien ke eyo oro, esien Dan eyom udeme ke idem mmɔ, ete iduŋ ke esit: koro udeme mika-iwɔrɔke inɔ mmɔ ke otu mme esien Israel, tutu osim usen oro.

²Ekem nditɔ Dan esio owo oruk mmɔ ition ke otu ofuri obio mmɔ, mbon uko, emi etode ke Zorah ye Eshtaol, edɔŋ mmɔ utom, ete eka ekeyep isɔŋ, enyuŋ etim ese enye: ndien edɔhɔ mmɔ, ete Mbufo eka eketim ese isɔŋ. Ndien mmɔ edi ke obot Ephraim, esim ufɔk Micah, ndien edaŋ do.

³Adaŋemi mmɔ edude ke ufɔk Micah, mmɔ ediɔŋɔ akparawa Levite oro uyo: ndien mmɔ ewaha do, ekedɔhɔ enye, ete, Anie akada fi edi mi? Afo onyuŋ anam nso ke ebiet emi?

⁴Onyuŋ enyene nso ŋkpɔ mi? Ndien enye ɔdɔhɔ mmɔ, ete, Ntem-ntem ke Micah anam ye ami, onyuŋ ekpe mi inyene, ami nnyuŋ ndi oku esie.

⁵Ndien mmɔ edɔhɔ enye, ete, Mbɔk, bup Abasi, man nnyin ifiɔk mme iso eyefɔn nnyin ke usuŋ emi nnyin isaŋade ke esit.

⁶Ndien oku oro ɔdɔhɔ mmɔ, ete, Mbufo eka ke ifure: usuŋ mbufo emi mbufo esaŋade ke esit odu ke iso Jehovah.

⁷Ndien owo ition oro eto eka ekesim ke Laish, enyuŋ ekut mmɔ eke edude ke esit, nte eduŋde ke ndue-idem, nte mme Zidonian ekam enamde, ke ifure ye ke ndue-idem; ndien baba owo kiet eke akadade ubɔŋ ke idem esie, onyuŋ anamde mmɔ idiɔk-ŋkpɔ ekededi, iduhe ke isɔŋ oro; mmɔ enyuŋ eyom usuŋ ye mme Zidonian, ndien isaŋake ŋkpɔ ye baba owo kiet.

⁸Ekem mmɔ oro edisim nditɔ-ete mmɔ ke Zorah ye Eshtaol: nditɔ-ete mmɔ enyuŋ edɔhɔ mmɔ, ete, Mbufo edɔhɔ didie?

⁹Ndien mmɔ edɔhɔ ete, Mbufo edaha ke enyɔŋ, nnyin idɔk ke ɔtɔ mmɔ: koro nnyin ikekutdeisɔŋ oro, ndien, sese enye ɔmɔfɔn eti: ndien mbufo ededop; ekubigi ndika ŋkoduk, man mbufo eda isɔŋ oro enyene.

¹⁰Adaŋemi mbufo ekade, eyesim mbio ndue-idem, isɔŋ onyuŋ okpon ke edem kpukpru: koro Abasi adade enye esin mbufo ke ubɔk; ebiet emi baba ŋkpɔ kiet eke odude ke edem emi minanake.

¹¹Ekem owo ikie itiokiet emi etode ke oruk mme Danite, ebɔbɔ mbɔbɔ ekɔŋ, eto ke Zorah ye Eshtaol eka.

¹²Ndien mmɔ edɔk ekenam nna mmɔ ke Kiriath-jearim ke Judah: mmɔdo ebiet oro ekerede Mahaneh-dan, tutu osim mfin emi: sese, enye odu Kiriath-jearim ke edem

¹³Ndien mmɔ eto do ebe eka ke obot Ephraim,

¹⁴ekesim ufɔk Micah. Ndien owo ition oro ekekade ndiyep edem Laish, edɔhɔ nditɔ-ete mmɔ ete, Nte mbufo efiɔk ete ke ephod, ye teraphim, ye edisɔi mbiet, ye editara mbiet edu ke ufɔk emi? Mbufo ekere ndien se mbufo edinamde.

¹⁵Ndien mmɔ ewaha do, eka ufɔk eyen Levite oro, ke ufɔk Micah, enyuŋ ekɔm enye.

¹⁶Ndien nditɔ Dan, owo ikie itiokiet oro ebɔbɔde mbɔbɔ ekɔŋ eda ke inua otop.

¹⁷Ndien owo ition oro ekekade ndiyep isɔŋ, edɔk eduk do, ekeda edisɔi mbiet oro, ye ephod, ye teraphim, ye editara mbiet: ndien oku ada ke inua-otop ye owo ikie itiokiet oro ebɔbɔde mbɔbɔ ekɔŋ.

¹⁸Ntre mme mmɔ emi eduk ke ufɔk Micah, esio edisɔi mbiet ephod oro, ye teraphim, ye editara mbiet. Ndien oku oro obup mmɔ, ete, Mbufo enam nso?

¹⁹Ndien mmɔ ebɔrɔ enye, ete, Dop uyo, da ubɔk kubi inua fo, nyuŋ saŋa ye nnyin, nyuŋ di ete nnyin, ye oku nnyin: afo ndidi oku ufɔk kiet, mme afo ndidi oku esien ye oruk ke Israel, ewe ɔfɔŋ akan?

²⁰Ndien esit adat oku oro, ndien enye emen ephod, ye teraphim, ye edisɔi mbiet, aka ke otu mbon oro.

²¹Ndien mmɔ ewɔŋɔre eka, enyuŋ enam nditɔwɔŋ, ye ufene, ye mbiomo ebem mmɔ iso.

²²Mmɔ oro ekpɔŋ ufɔk Micah anyan ebiet; ndien ewuk mmɔ eke edude ke mme ufɔk eke ekperede ufɔk Micah, ete esɔp idem ebine nditɔ Dan.

²³Ekem mmɔ efiori ekot nditɔ Dan. Ndien mmɔ ekabare iso, enyuŋ ebup Micah, ete, Nsitibe ye afo eke esinde mbufo esopde ntem?

²⁴Ndien enye ɔbɔrɔ, ete, Mbufo ema eda abasi mi emi ŋkanamde, ye oku, efep. Ndien nso ŋkpɔ efen ke ami nnyene? Mbufo enam didie ndien ebup mi, ete, Nsitibe ye afo?

²⁵Ndien nditɔ Dan edɔhɔ enye, ete, Kuyak ekop uyo fo ke otu nnyin, mbak mbon iyaresit edibumere mbufo, ndien afo ɔduɔk uwem fo, ye uwem ufɔk fo.

²⁶Ndien nditɔ Dan eka eke mmɔ; ndien ke ini Micah okutde ete ke mmɔ ekan imɔ ubɔk, enye akabare afiak ke ufɔk esiemɔ.

²⁷Ntre mmɔ eda se Micah akanamde, ye oku oro enye enyenede, edi ke Laish, ke obio ifure ye eke ndue-idem: ndien ewot mmɔ ke iso ofut, enyuŋ efɔp obio oro ke ikaŋ.

²⁸Owo baba kiet eke anyaŋade inyuŋ iduhe du: koro enye oyomde usuŋ ye Zidon, mmɔ inyuŋ isaŋake ŋkpɔ ye owo ndomo kiet; ndien enye odu ke itihere emi enyenede Bethrehob. Ndien mmɔ ediɔŋ obio oro, enyuŋ eduŋ ke esit.

²⁹Ndien mmɔ eda enyiŋ Dan ete mmɔ emi akamanade ɔnɔ Israel, esio obio oro, ekot enye, ete, Dan; edi enyiŋ obio oro ekebem iso ekere Laish.

³⁰Ndien nditɔ Dan eneŋere edisɔi mbiet oro enim ke idem mmɔ: ndien Jonathan eyen Gershom, eyen Moses, ye nditɔ esie, edi mme oku esien mme Danite, tutu osim ini emi etaŋde idut oro efep.

³¹Ntre ke mmɔ eda edisɔi mbiet Micah emi enye akanamde, enim enɔ idem mmɔ, ke ofuri ini oro ufɔk Abasi okodude ke Shiloh.