Read efik JUDGES 19 Bible Online

JUDGES 19 - efik bible

JUDGES 19

¹EDIKEM ke eyo oro edidem mika - iduhe ke Israel, Levite kiet edi ediduŋ ke edem obot Ephraim, ndien enye ɔdɔ ŋwan kiet emi okotode ke Beth-lehem-judah.

²Ndien ŋwan esie oro ɔdiɔk ye enye, aka owo, onyuŋ ɔkpɔŋ enye, aka ufɔk ete esie ke Beth-lehem-judah, onyuŋ oduŋ do ke ofuri ɔfiɔŋ inaŋ.

³Ekem ebe esie adaha ke enyɔŋ ebine enye, ndidɔhɔ ikɔ ufan-ufan ye enye, nnyuŋ nda enye nnyɔŋ, asaŋa ye eyenɔwɔŋ esie, ye ass iba: ndien ŋwan ada enye oduk ke ufɔk ete esie; ndien adaŋemi ete eyen-aŋwan oro okutde enye, enye adat esit ndisobo ye enye.

⁴Ndien ete eyen-aŋwan oro ɔdiɔŋ ukot esie itie: enye onyuŋ adaŋ ye enye usen ita: ntre ke mmɔ edia ŋkpɔ enyuŋ eŋwɔŋ, enyuŋ edaŋ do.

⁵Edikem ke ɔyɔhɔ usen inaŋ, mmɔ ebak edemere ke usenubɔk, ndien enye adaha ke enyɔŋ ete inyɔŋ: edi ete eyen-aŋwan ɔdɔhɔ ukot esie, ete, Da udia esisit sɔŋ esit fo, ndien afo edinyɔŋ;

⁶ndien mmɔ mbiba etie ɔtɔ kiet, edia ŋkpɔ, enyuŋ eŋwɔŋ; ndien ete eyen-aŋwan ɔdɔhɔ owo oro, ete, Nyime, mbɔk, nyuŋ daŋ okoneyo emi, ndien yak esit enem fi.

⁷Ndien adaŋemi owo oro adahade ke enyɔŋ ete isaŋa, ete-eyen-aŋwan esie eyire enye: ndien enye afiak adaŋ do ke okoneyo oro.

⁸Ndien enye abak edemere ke usen-ubɔk ke ɔyɔhɔ usen ition, ete isaŋa: ndien ete eyen-aŋwan ɔdɔhɔ, ete, Mbɔk, sɔŋɔ esit fo. Ndien mmɔ ebigi tutu utin ɔkɔhɔre itɔŋ, mmɔ mbiba enyuŋ edia ŋkpɔ.

⁹Ndien adaŋemi owo oro adahade ke enyɔŋ, ete isaŋa ye ŋwan esie oro, ye eyenɔwɔŋ esie, ete ŋwan esie, kpa ete eyen aŋwan oro, ɔdɔhɔ enye, ete, Mbɔk, eyo ɔsuhɔre, oyom ndikut, mbufo edaŋ ke okoneyo, mbɔk: sese, utin ɔmɔkɔhɔre itɔŋ: daŋ mi ke okoneyo, yak esit enem fi; ndien mkpɔŋ, mbufo ebak esaŋa usuŋ mbufo, ndien ka ke tent fo.

¹⁰Edi owo oro inyimeke ndidaŋ; ndien enye adaha ke enyɔŋ asaŋa aka tutu edikem ye Jebus, emi edide Jerusalem: ndien ass iba oro edoride ŋkpɔ-itie edu ye enye, ŋwan esie onyuŋ asaŋa ye enye.

¹¹Adaŋemi mmɔ ekperede Jebus, utin oyom ndisop; ndien eyenɔwɔŋ oro ete ete esie, Mbɔk, di, nnyin iwaha ke obio mme Jebusite emi, idaŋ do ke okoneyo.

¹²Edi ete esie ɔdɔhɔ enye, ete, Nnyin idiwahake ika obio isen owo emi, midige eke nditɔ Israel; edi yak nnyin isaŋa ibe ikesim ke Gibeah.

¹³Ndien enye ɔdɔhɔ eyenɔwɔŋ esie, ete, Di, nnyin isaŋa ikpere ebiet emi kiet, inyuŋ idaŋ ke okoneyo, edide ke Gibeah, onyuŋ edide ke Ramah.

¹⁴Ndien mmɔ ebe eka; ndien eyo ofuk mmɔ ke ini mmɔ ekperede Gibeah, emi enyenede Benjamin.

¹⁵Ndien mmɔ ewaha do, ete ika ikadaŋ ke Gibeah: ndien enye oduk ɔsuhɔre etie ke aŋwa obio: koro owo baba kiet midiɔŋke itie-nna ke ufɔk inɔ mmɔ man mmɔ edaŋ.

¹⁶Ndien, sese, akani-eren kiet emi okotode ke obot Ephraim ŋko, oto utom esie ke iŋwaŋ ke mbubreyo; ndien enye edi oduduŋ ke Gibeah: edi mbio-obio edi nditɔ Benjamin.

¹⁷Ndien ke adaŋemi enye emenerede enyin esie, okut owo isaŋ oro ke aŋwa obio, akani-eren oro ɔdɔhɔ ete, Afo aka mmɔŋ? onyuŋ oto mmɔŋ?

¹⁸Ndien enye ɔdɔhɔ enye, ete, Nnyin ito ke Bethlehem-judah ibe ika edem obot Ephraim: ami ŋkoto do mbe ŋka Beth-lehem-judah; ami nnyuŋ nsaŋa ŋkpɔ ufɔk Jehovah: ndien baba owo kiet eke ɔdiɔŋde mi itie ke ufɔk iduhe.

¹⁹Ndien ŋko nnyanyaŋa ye udia mme ass nnyin mmɔ mi; uyo ye wine mi, ye eke eyen aŋwan fo, ye eke eyenɔwɔŋ emi odude ye nnyin ikɔt fo, enyuŋ edu mi: nnyin inanake baba ŋkpɔ kiet.

²⁰Ndien akani-eren oro ɔdɔhɔ ete, Yak ɔfɔŋ ɔnɔ fi; edi yak ofuri unana fo odoro mi ke idem; edi kudaŋ ke aŋwa ke okoneyo.

²¹Ndien enye ada enye eken aka ke ufɔk esie, onyuŋ abuak udia ɔnɔ mme ass mmɔ, onyuŋ eyet mmɔ oro ukot ndien mmɔ edia ŋkpɔ enyuŋ eŋwɔŋ.

²²Ke ini mmɔ edatde esit ntre, sese, mbio-obio eke edide mme oburobut owo, edikan ufɔk ekuk, etuak usuŋ, enyuŋ edɔhɔ akani-eren oro, ete ufɔk, ete, Da eren oro okodukde ke ufɔk fo, wɔrɔ di, man nnyin ifiɔk enye.

²³Ndien owo oro, ete ufɔk, ɔwɔrɔ etiene mmɔ, onyuŋ ɔdɔhɔ mmɔ, ete, Nditɔ-ete mi, mbɔk, mbufo ekudiɔk ntre; sia owo emi okoduk ke ufɔk mi, mbufo ekunam oburobut ŋkpɔ emi.

²⁴Sese eyen-aŋwaŋ mi, eyen-ɔwɔŋ, ye ŋwan esie oro; mbɔk, yak nda mmɔ ŋwɔrɔ: ndien mbufo esabare mmɔ, enyuŋ enam mmɔ se mbufo emade: edi ekuda oburubut ŋkpɔ emi enam owo emi.

²⁵Edi mmɔ inyimeke ndikop uyo esie: ndien owo oro ada ŋwan esie oro, ɔwɔrɔ ɔsɔk mmɔ ke esien; ndien mmɔ efiɔk enye, enyuŋ eda enye esabare ke ofuri okoneyo oro tutu eyo esiere: ndien ke ini oyomde ndisiere, mmɔ esana enye eyak.

²⁶Ndien ŋwan oro edi ke usiere, ediduɔ ke inua-otop ufɔk owo oro ete esie odude, ana tutu utin asiaha.

²⁷Ndien ete esie adaha ke enyɔŋ ke usenubɔk, ɔkuhɔre usuŋ ufɔk, ɔwɔrɔ, ete inyɔŋ esiemɔ; ndien, sese, ŋwan oro, ŋwan esie, ɔduɔ ke isɔŋ ana ke inua-otop ufɔk, ubɔk esie enyuŋ edoro ke asaŋudɔk.

²⁸Ndien enye ɔdɔhɔ ŋwan, ete, Daha ke enyɔŋ, nnyin ika. Edi owo eke ɔbɔrɔde iduhe. Ekem owo oro emen enye odori ke ass, onyuŋ adaha ke enyɔŋ aka esiemɔ.

²⁹Ndien adaŋemi enye osimde ufɔk esiemɔ, enye ada ikwa, omum ŋwan esie, abahare enye ke ɔkpɔ, ke ɔkpɔ, esin ke mbak duopeba, ndien ɔnɔ enye esɔk ke ofuri adaŋa Israel.

³⁰Ndien, edikem, kpukpru mmɔ eke ekutde edɔhɔ, ete, Akananam inamke, akananam ikwe ŋkpɔ ntem, toto nte nditɔ Israel eketo ke isɔŋ Egypt ewɔŋɔ, tutu osim mfin emi: mbufo enim ibuot ke esit, enɔ item, enyuŋ edɔhɔ.