Read efik JUDGES 20 Bible Online

JUDGES 20 - efik bible

JUDGES 20

¹EKEM kpukpru nditɔ Israel ewɔŋɔ, mbio-esop enyuŋ ebono nte owo kiet, ɔtɔŋɔde ke Dan tutu osim ke Beer-sheba, ye isɔŋ Gilead, etiene Jehovah ke Mizpah.

²Ndien ikpɔ owo ofuri mbio-obio, kpa kpukpru esien Israel, edaha eda ke esop ikɔt Abasi, esim tɔsin owo ke itie ikie inaŋ, eke esaŋade ke ikpat enyuŋ esiode ofut.

³Ndien nditɔ Benjamin ekop ete nditɔ Israel ema edɔk ke Mizpah. Ekem, nditɔ Israel edɔhɔ, ete, Mbufo etiŋ nte idiɔk-ŋkpɔ emi akasaŋade.

⁴Ndien Levite oro, ebe ŋwan oro ekewotde, ɔbɔrɔ ete, Ami ye ŋwan mi ikesim Gibeah emi enyenede Benjamin, ite idaŋ ke okoneyo.

⁵Ndien mme enyene Gibeah edaha ke enyɔŋ enam ikɔ ye ami, enyuŋ ekan ufɔk ekuk mi ke okoneyo, eyom mi ndiwot: mmɔ enyuŋ esabare ŋwan mi ewot.

⁶Ndien nda ŋwan mi mbak enye mbak-mbak, mmen enye nnɔ esɔk ke ofuri isɔŋ udeme Israel: koro mmɔ emenam oburobut ŋkpɔ ye ndisime ke Israel.

⁷Sese, mbufo kpukpru edi nditɔ Israel; mbufo enɔ uyo ye item mi.

⁸Ndien kpukpru owo edaha eda nte owo kiet, ete, Baba owo nnyin kiet idinyɔŋke tent nnyin, idinyuŋ iwahake ke ufɔk nnyin.

⁹Edi yak ŋkpɔ emi edi se nnyin idinamde Gibeah; iyedomo ndomo ibaŋa enye;

¹⁰yak nnyin inyuŋ isio owo duop ke itie ikie ke kpukpru esien Israel, ye ikie ke itie tɔsin, ye tɔsin ke itie tɔsin duop, man mmɔ eka ekeyom udia enɔ kpukpru owo, man mmɔ eka ke Gibeah Benjamin, ekenam nte ekemde ye ofuri oburobut ido emi mmɔ ekenamde ke Israel.

¹¹Ndien ofuri Israel edian idem nte owo kiet ebono, ete iŋwana ekɔŋ ye obio oro.

¹²Ndien mme esien Israel edɔŋ owo esaŋa ke ofuri esien Benjamin, ete, Nso idiɔk-ŋkpɔ ke enam ntem ke otu mbufo?

¹³Mbufo eyak ndien mbon oro, kpa mme oburobut owo oro edude ke Gibeah, man nnyin iwot mmɔ, inyuŋ ifimere idiɔk-ŋkpɔ ke Israel ifep. Edi nditɔ Benjamin inyimeke ndikop uyo nditɔ-ete mmɔ, nditɔ Israel:

¹⁴edi nditɔ Benjamin eto ke mme obio mmɔ edibono ke Gibeah, ete iwɔrɔ ika ekɔŋ ye nditɔ Israel.

¹⁵Ndien usen oro mmɔ ebat nditɔ Benjamin emi eketode ke mme obio, tɔsin owo edip ye itiokiet emi esiode ofut, ekɔrɔ ye mme andiduŋ Gibeah emi mmɔ ebatde, edimek owo ikie itiaba.

¹⁶Edimek owo ufien ikie itiaba edu ke otu kpukpru mme mmɔ emi; kpukpru mmɔ emi ekekeme nditop idet ke itiat, ndien iduehe due.

¹⁷Ebat nditɔ Israel ŋko, esio Benjamin, tɔsin owo ikie inaŋ, emi esiode ofut; kpukpru mmɔ emi edi mbon-ekɔŋ.

¹⁸Ekem mmɔ edaha ke enyɔŋ edɔk ke Beth-el, ekebup Abasi. Ndien nditɔ Israel edɔhɔ, ete, Mme anie owo nnyin edibem iso edɔk ekeŋwana ekɔŋ ye nditɔ Benjamin? Ndien Jehovah ɔdɔhɔ ete, Judah edibem iso.

¹⁹Ndien ke eyo esierede, nditɔ Israel edaha ke enyɔŋ eka ekenam nna-ekɔŋ ekpere Gibeah.

²⁰Ndien nditɔ Israel ewɔŋɔ ekeŋwana ekɔŋ ye Benjamin; nditɔ Israel enyuŋ etim udim ekɔŋ ete iŋwana ye mmɔ ke Gibeah.

²¹Ndien nditɔ Benjamin ewɔŋɔ ke Gibeah, ekesobo tɔsin owo Israel edip ye iba ke usen oro, eduɔŋɔ ke isɔŋ.

²²Ndien nditɔ Israel esɔŋ esit, enyuŋ etɔŋɔ ntak etim udim-ekɔŋ ke ebiet oro mmɔ eketimde ke akpa usen.

²³Nditɔ Israel enyuŋ edɔk eketua eyet ke iso Jehovah, ete, Nte ntɔŋɔ ntak ŋka ekɔŋ ye Benjamin eyen-ete mi? Ndien Jehovah ɔdɔhɔ ete, Mbufo edɔk eka ekɔŋ ye enye.

²⁴Ekem nditɔ Israel esaŋa ekpere itie ekɔŋ ye nditɔ Benjamin ke udian-akpa usen.

²⁵Ndien Benjamin ewɔŋɔ ke Gibeah ke udiana-akpa usen, ekebiɔŋɔ mmɔ, enyuŋ etɔnɔ ntak esobo nditɔ Israel tɔsin owo efureta, eduɔŋɔ mmɔ ke isɔŋ; kpukpru mmɔ emi esio ofut.

²⁶Ndien kpukpru nditɔ Israel ye kpukpru owo edɔk eka Beth-el eketua eyet, enyuŋ etie do ke iso Jehovah, enyuŋ etre udia ke usen oro, tutu osim mbubreyo: mmɔ enyuŋ ewa edifɔp uwa ye uwa emem ke iso Jehovah.

²⁷Ndien nditɔ Israel ebup Jehovah (ekebe ediomi Abasi onyuŋ odu do ke usen oro;

²⁸Phinehas eyen Eleazar, eyen Aaron, onyuŋ ada enye ke iso ke eyo oro,) Nte ntɔŋɔ ntak ŋwɔrɔ ŋka ekɔŋ ye nditɔ Benjamin eyen-ete mi, mme nyetre? Ndien Jehovah ɔbɔrɔ ete, Mbufo edɔk: koro mkpɔŋ ke ndida mmɔ nsin mbufo ke ubɔk.

²⁹Ndien nditɔ Israel enim mbon-udibe ekan Gibeah ekuk.

³⁰Ntre ke nditɔ Israel edɔk eka ekɔŋ ye nditɔ Benjamin, ke ɔyɔhɔ usen ita, enyuŋ etim udim-ekɔŋ ekpere Gibeah, kpa nte akpa.

³¹Ndien nditɔ Benjamin ewɔŋɔ ekebiɔŋɔ mmɔ, edianare ekpɔŋ obio; ndien mmɔ etɔŋɔ ndikpeŋe ndusuk owo ŋwot, osim owo Israel edip ye duop, kpa nte eke akpa, ke mme ɔkpɔ-usuŋ emi kiet ɔdɔkde aka Beth-el, kiet eken onyuŋ akade ke Gibeah ke iŋwaŋ.

³²Ndien nditɔ Benjamin edɔhɔ ete, Eyak nnyin itibi itɔk idudi mmɔ idianare ke obio isin ke mme ɔkpɔ - usuŋ.

³³Ekem kpukpru owo Israel edaŋa eda ke ɔtɔ mmɔ, enyuŋ etim udim ekɔŋ ke Baal-tamar: mbon-udibe Israel enyuŋ ewɔŋɔ ke ebiet mmɔ ke mben-isɔŋ Gibeah.

³⁴Ndien tɔsin owo duop emi ekesatde ke ofuri Israel, eda ekesin ye Gibeah, ekɔŋ onyuŋ ɔsɔŋ eti-eti: edi mmɔ eken ifiɔkke, ite ke idiɔk-ŋkpɔ ekpere mmimɔ.

³⁵Ndien Jehovah asuan Benjamin ke iso Israel: ndien nditɔ Israel esobo Benjamin ke usen oro, tɔsin owo edip ye ition, ye owo ikie: kpukpru mme mmɔ emi esio ofut.

³⁶Ndien nditɔ Benjamin ekut ete ke mmimɔ imasuana: koro nditɔ Israel ekeyakde ufaŋ enɔ nditɔ Benjamin, koro mmɔ ebuɔtde idem mmɔ ye mbon-udibe oro mmɔ ekenimde ke mben isɔŋ Gilead.

³⁷Ndien mbon-udibe ewara ebumere eduk ke Gibeah; ndien mbon-udibe esaŋa eka ekesuan ofuri obio ke iso ofut.

³⁸Ndien nditɔ Israel ye mbon-udibe ekenim idiɔŋɔ kiet, ete, Yak mmɔ enam akamba nsuŋ-ikaŋ ɔwɔrɔ ke obio ɔdɔk ke enyɔŋ.

³⁹Ntre nditɔ Israel efiak edem ke ekɔŋ, nditɔ Benjamin enyuŋ etɔŋɔ ndikpeŋe owo ŋwot ke otu nditɔ Israel, owo edip ye duop: koro mmɔ edɔhɔde, ete, Mmɔ emesobo ke iso nnyin, kpa nte ke akpa ekɔŋ.

⁴⁰Ekem ediwak nsuŋikaŋ ɔtɔŋɔ ndito ke obio ndɔk nte adaha, ndien Benjamin ekabare ese edem, ndien, sese, ofuri obio asak ikaŋ ɔdɔk ke enyɔŋ.

⁴¹Ndien nditɔ Israel ekabare, ndien nditɔ Benjamin ebumere itɔk: koro mmɔ ekutde ete ke idiɔk-ŋkpɔ omosim mmimɔ.

⁴²Ndien mmɔ ekpa edem enɔ nditɔ Israel, efeŋe eka usuŋ wilderness; edi ekɔŋ ekpehe mmɔ, ndien mmɔ eke etode ke obio esobo mmɔ ke ufɔt mmɔ.

⁴³Mmɔ ekan Benjamin ekuk, ebine mmɔ, enyuŋ edigi mmɔ ke Menuhah, tutu ekem ye Gibeah ke edem usiaha-utin.

⁴⁴Ndien tɔsin owo Benjamin efureta eduɔŋɔ, kpukpru mmɔ edi mbon uko.

⁴⁵Ndien mmɔ ewɔŋɔre efeŋe itɔk eka edem wilderness, ekesim itiat Rimmon: ndien etaŋ tɔsin owo ition ke ɔkpɔ-usuŋ; enyuŋ ebine tutu osim ke Gidom, enyuŋ ewot mmɔ tɔsin owo iba.

⁴⁶Ndien kpukpru nditɔ Benjamin oro eduɔŋɔde ke usen oro, esim tɔsin owo edip ye ition eke esiode ofut,

⁴⁷kpukpru mmɔ edi mbon uko. Edi owo ikie itiokiet ekabare efeŋe itɔk eka edem wilderness, ekesim ke akwa itiat Rimmon: ndien mmɔ eduŋ ke Rimmon ke ɔfiɔŋ inaŋ.

⁴⁸Ndien nditɔ Israel efiak edem eyom nditɔ Benjamin, enyuŋ ewot mmɔ ke iso ofut ke obio, owo, ye ufene, ye kpukpru se mmɔ ekutde: mmɔ enyuŋ ekim ikaŋ ke obio kpukpru emi mmɔ esimde.