Read efik 3 JOHN 1 Bible Online

3 JOHN 1 - efik bible

3 JOHN 1

¹EBIOWO ewet ŋwed emi ɔnɔ esɔk Gaius, owo ima mi, emi mmade ke akpanikɔ.

²Edima ufan, mbɔŋ akam nte ŋkpɔ efɔn ye afo ke kpukpru usuŋ, idem onyuŋ ɔsɔŋ fi, kpa nte ɔfɔnde ye afo ke ukpɔŋ.

³Koro mmedat esit eti-eti ke ini ndusuk nditɔ-ete edide, enyuŋ edɔhɔde ete, ke afo edi owo akpanikɔ, kpasuk nte afo onyuŋ asaŋade ke akpanikɔ odu uwem.

⁴Nnyeneke idaresit eke okponde akan erikop eke ŋkopde nte nditɔ mi esasaŋa ke akpanikɔ.

⁵Edima, afo ananam utom akpanikɔ ke ŋkpɔ ekededi eke adade aŋwam nditɔ-ete, akpan-akpan mmɔ emi edide isen owo.

⁶Mmɔ eketie ntiense ebaŋa ima fo ke iso ufɔk Abasi. Ɔfɔn afo osio mmɔ unyɔŋ, nte odotde owo Abasi ndinam:

⁷koro mmɔ ema ewɔŋɔ ke ntak Enyiŋ oro, inyuŋ inyimeke ndibɔ mme Gentile ŋkpɔ.

⁸Ntre ke ana nte nnyin idara mmɔ emi etiede ntem, man nnyin itiene akpanikɔ inam ŋkpɔ inɔ Abasi.

⁹Mma ŋwet ekpri ŋwed nnɔ esɔk ufɔk Abasi: edi Diotrephes, emi amade ndidi ebe-iso ke otu mmɔ, inyimeke ndidara nnyin.

¹⁰Ntre, mma ndi, nyeti mme owo ubɔk-utom eke enye anamde do, adaŋa nte enye akprakde inua etiŋ idiɔk ikɔ adian nnyin: sia oro minyuŋ ikemke enye, enye ke idem esie esin ndidara nditɔ-ete, onyuŋ ɔbiɔŋɔ mmɔ emi eyomde ndidara mmɔ, ebin mmɔ osio ke ufɔk Abasi.

¹¹Edima, kukpebe se idiɔkde, edi kpebe se ifɔnde. Owo eke anamde se ifɔnde edi owo Abasi; owo eke anamde se idiɔkde ikekwe Abasi.

¹²Kpukpru owo edi ntiense enɔ Demetrius. Akpanikɔ onyuŋ edi ntiense ɔnɔ enye. Nnyin inyuŋ idi ntiense inɔ enye ŋko-ŋko: ndien afo ɔmɔfiɔk ete ikɔ-ntiense nnyin edi akpanikɔ.

¹³Mma nnyene ediwak ŋkpɔ ndiwet nnɔ fi: edi nyomke ndida mmɔŋ-ŋwed ye pen ŋwet.

¹⁴Mmodori enyin nte nyekut fi ibigike bigi, ndien nnyin inyeneme ŋkpɔ iso ye iso.

¹⁵Emem akpakam odu ye afo. Mme ufan ete ekɔm fi. Kɔm mme ufan nɔ mi ke enyiŋ.