Read efik ERIYARARE 11 Bible Online

ERIYARARE 11 - efik bible

ERIYARARE 11

¹EKEM enɔ mi nyanyaŋa eke ebietde eto-idomo; enyuŋ edɔhɔ mi ete, Daha ke enyɔŋ kodomo temple Abasi, ye itie-uwa, ye mmɔ emi etuakde ibuot enɔ Abasi ke esit.

²Edi sio okure emi odude ke edem temple fep, kunyuŋ udomo enye oro, koro ema eyak enye enɔ mme idut; mmɔ eyenyuŋ edigi edisana obio ke ikpat ke ɔfiɔŋ aba ye iba.

³Nyenyuŋ mmen odudu nnɔ ntiense Mi iba, ndien mmɔ eyesine ɔfɔŋ-ikpo etiŋ nte prophet ke thousand usen kiet ye usen ikie iba ye ata.

⁴Mmɔ oro edi eto olive iba ye udiɔk-utuenikaŋ iba oro ewuhɔde ke iso Andikara isɔŋ.

⁵Ndien edieke owo ekededi oyomde ndinam mmɔ ibak, ikaŋ oto mmɔ ke inua ɔwɔrɔ edita mme asua mmɔ; edieke owo ekededi oyomde ndinam mmɔ ibak, edi ke ido emi ke owo oro enyene ndikpa.

⁶Mmɔ oro enyene odudu ndisiri ikpa-enyɔŋ mbiɔŋɔ edim ndidep ke mme usen eke mmɔ etiŋde prophecy; mmɔ enyuŋ enyene odudu ke idim mmɔŋ, ndinam mmɔŋ akabare edi iyip, ndinyuŋ nda kpukpru idiɔk udɔŋɔ mmia isɔŋ ufen, adaŋa ini nte mmɔ emama.

⁷Ke ini mmɔ edimade ikɔ mmɔ nte ntiense, unam emi otode ke akwa udem ɔwɔrɔ ɔdɔk edi, eyeŋwana ekɔŋ ye mmɔ, onyuŋ akan mmɔ, onyuŋ owot mmɔ.

⁸Okpo mmɔ eyenyuŋ ena ke efak akwa obio oro esiode enye enyiŋ Sodom ye Egypt ke usem spirit, kpa obio oro Ɔbɔŋ mmɔ nde ɔkɔkɔŋɔde ke cross ke esit.

⁹Mme owo eto ke kpukpru obio ye esien ye usem ye idut edi edise okpo mmɔ ke usen ita ye ubak, inyuŋ iyakke ebuk okpo mmɔ ke udi.

¹⁰Ndien mme andiduŋ ke isɔŋ edat esit ebaŋa mmɔ, enyuŋ enam idara, enyuŋ enɔ enɔ esɔk kiet eken, koro mme prophet iba oro ekɔtuhɔrede mme andiduŋ ke isɔŋ.

¹¹Edi ke ini usen ita ye ubak ebede, ibifik uwem edito Abasi oduk mmɔ ke idem, mmɔ enyuŋ edaha eda ke ukot; ndien akwa ndik odoro kpukpru owo emi esede mmɔ ke idem.

¹²Ndien mmɔ ekop ɔkpɔsɔŋ uyo otode ke enyɔŋ ɔdɔhɔ mmɔ ete, Edɔk edi ken. Mmɔ enyuŋ esaŋa ke obubit enyɔŋ edɔk eduk ke heaven, mme asua mmɔ enyuŋ ekut mmɔ.

¹³Ke idem ini oro akwa unyek-isɔŋ otibe, ubak obio kiet ke itie duop onyuŋ ɔduɔ; thousand owo itiaba enyuŋ ekpaŋa ke unyek-isɔŋ oro. Ndien mmɔ eke esuhɔde ekabare edikhe eti-eti, enyuŋ eyak ubɔŋ enɔ Abasi heaven.

¹⁴Udiana ŋkpɔ-nnam ama ebe; sese, ɔyɔhɔ ŋkpɔ-nnam ita ɔmɔŋ edidi.

¹⁵Ekem ɔyɔhɔ angel itiaba ofri ukorowo; ndien mkpɔsɔŋ uyo ewɔrɔ ke heaven, mmɔ enyuŋ edɔhɔ ete, Obio ubɔŋ ererimbot emi amakabare edi Obio Ubɔŋ Ɔbɔŋ nnyin ye Christ Esie. Enye eyenyuŋ ada ubɔŋ ke nsinsi-nsinsi.

¹⁶Ndien mbiowo edip ye inaŋ, emi etiede ke ebekpo mmɔ ke iso Abasi, eduɔŋɔ ekibi iso mmɔ ke isɔŋ, enyuŋ etuak ibuot enɔ

¹⁷Abasi, ete, Imɔkɔm Fi, O Ɔbɔŋ Abasi, Andikara kpukpru ŋkpɔ, emi odude-du, okonyuŋ odude-du; koro Afo amada akwa odudu Fo ada ubɔŋ.

¹⁸Mme idut ekeyat esit ndien iyaresit Fo ama edi. Ndien ekem ini nte ekpede ikpe mme akpa-mkpa, enyuŋ enɔde ikɔt Fo mme prophet utip mmɔ, enyuŋ enɔde nti owo eke mmɔ ye mmɔ emi eteŋede enyiŋ Fo, ŋkpri ye ikpɔ; nte enyuŋ esobode mmɔ emi esobode isɔŋ.

¹⁹Ekem eberere temple Abasi emi odude ke heaven; enyuŋ ekut ekebe ediomi Esie ke temple Esie; ndien emireŋ-mireŋ, ye mme uyo, ye obuma, ye unyek-isɔŋ, ye ɔkpɔsɔŋ edim-itiat etibe.