Read efik ERIYARARE 13 Bible Online

ERIYARARE 13 - efik bible

ERIYARARE 13

¹EKEM ndada do ke utan esuk inyaŋ. Ndien ŋkut unam otode ke inyaŋ ɔdɔk edi, emi enyenede nduk duop ye ibuot itiaba; enye onyuŋ ayara anyanya duop ke nduk esie, onyuŋ obiom enyiŋ eke esuŋide Abasi ke mbuot esie.

²Unam oro ŋkutde ebiet ekpe, ukot esie enyuŋ ebiet ukot bear, inua esie onyuŋ ebiet inua lion; dragon ama onyuŋ ayak ukeme esie, ye ebekpo esie, ye akwa nsɔŋ-uyo esie ɔnɔ enye.

³Ndien etie nte ekɔnɔde kiet ke otu mbuot esie unan mkpa; edi ema ekɔk unan mkpa oro. Ndien ofuri isɔŋ etiene unam oro ye mkpa-idem;

⁴enyuŋ etuak ibuot enɔ dragon, koro enye ama akayak nsɔŋ-uyo esie ɔnɔ unam oro; mmɔ enyuŋ etuak ibuot enɔ unam oro, ete, Anie ebiet unam oro? anie onyuŋ ekeme ndiŋwana ye enye?

⁵Ndien enɔ enye inua eke etiŋde ikpɔ ŋkpɔ ye isuŋi, enyuŋ enɔ enye nsɔŋ-uyo ndinam ntre ɔfiɔŋ aba ye iba.

⁶Ndien enye atat inua osuŋi Abasi, man osuŋi enyiŋ Esie, ye ebiet iduŋ Esie, kpa mmɔ emi eduŋde ke heaven.

⁷Ndien enɔ enye ndiŋwana eŋwan ye ikɔt Abasi, ndinyuŋ ŋkan mmɔ; enyuŋ enɔ enye nsɔŋ-uyo ndikara kpukpru esien ye obio ye usem ye idut.

⁸Ndien kpukpru mme andiduŋ ke isɔŋ eyetuak ibuot enɔ enye, kpa kpukpru owo emi mikewetke enyiŋ esie isin ke ŋwed uwem eke Eyen-erɔŋ, emi ekowotde toto ke eritɔŋɔ ererimbot.

⁹Edieke owo enyenede utɔŋ yak enye okop.

¹⁰Edieke ekenimde enɔ owo ndidi ibuot-ekɔŋ, enye eyedi ibuot-ekɔŋ; edieke owo owotde owo ke ofut, eyeda ofut ewot enye. Edi mi ke ime ye mbuɔtidem ikɔt Abasi ewut idem.

¹¹Ekem ŋkut unam eŋwen otode ke isɔŋ ɔwɔrɔ; enye enyene nduk iba nte eyen-erɔŋ, edi etiŋ nte dragon.

¹²Unam oro ada ofuri nsɔŋ-uyo emi enyenede akpa unam anam ŋkpɔ ke iso esie. Ndien enye anam isɔŋ ye mmɔ emi eduŋde ke esit etuak ibuot enɔ akpa unam, emi ema ekɔk unan mkpa esie.

¹³Enye onyuŋ anam ikpɔ idiɔŋɔ, tutu esin ikaŋ oto ke enyɔŋ ɔsuhɔre ke isɔŋ ke iso owo.

¹⁴Enye onyuŋ ada idiɔŋɔ, emi enɔde enye ndinam ke iso unam oro, abiaŋa mme andiduŋ ke isɔŋ; onyuŋ ɔnɔ mme andiduŋ ke isɔŋ uyo, ete, mmɔ enam mbiet unam oro enyenede nde ofut ke idem, edi osuk odude uwem.

¹⁵Ndien enɔ enye ndinɔ mbiet unam oro ibifik, man enye oro osioro uyo, onyuŋ anam ewot kpukpru owo emi minyimeke ndituak ibuot nnɔ mbiet unam oro.

¹⁶Enye onyuŋ anam kpukpru owo, ŋkpri ye ikpɔ, ye mbɔŋ ye mme ubuene, ye nditɔ-isɔŋ ye ifin, ete enɔ mmɔ idiɔŋɔ ke ubɔk nnasia, mme ke ɔkpɔ-iso;

¹⁷ete onyuŋ anam baba owo kiet okunyene ukeme ndidep ŋkpɔ mme ndinyam ŋkpɔ, ke mibɔhɔke owo eke enyenede idiɔŋɔ oro, kpa enyiŋ unam oro mme ibat enyiŋ esie. Sese, ifiɔk mi.

¹⁸Yak owo eke enyenede eti ibuot abat ibat unam oro; koro edi ibat owo. Ndien ibat esie edi ikie itiokiet ye ata ye itiokiet.