Read efik ERIYARARE 16 Bible Online

ERIYARARE 16 - efik bible

ERIYARARE 16

¹EKEM ŋkop ɔkpɔsɔŋ uyo emi otode ke temple ɔdɔhɔ angel itiaba oro ete, Mbufo eka ekeŋwaŋa eso iyaresit Abasi itiaba oro eduɔk ke isɔŋ.

²Akpa angel aka akaŋwaŋa eso esie ɔduɔk ke obot, ndien idiɔk oyo, eke abiakde eti-eti, omum mme owo emi enyenede idiɔŋɔ unam ke idem, enyuŋ etuakde ibuot enɔ mbiet esie.

³Udiana angel akaŋwaŋa eso esie ɔduɔk ke inyaŋ; ndien inyaŋ akabare iyip, ebiet iyip okpo owo; kpukpru ŋkpɔ eke edude uwem enyuŋ ekpaŋa, kpa ŋkpɔ eke edude ke inyaŋ.

⁴Ɔyɔhɔ angel ita aŋwaŋa eso esie ɔduɔk ke mme akpa ye mme idim mmɔŋ, ndien mmɔ ekabare iyip.

⁵Ndien ŋkop nte angel emi akarade mmɔŋ ɔdɔhɔde ete, O Edisana Abasi, emi odude-du, okonyuŋ odude-du, Afo emenen ke ikpe emi ekpede ntem;

⁶koro owo ema eduɔk iyip nti ikɔt Fo ye mme prophet Fo; ndien Afo omonyuŋ ɔnɔ mmɔ iyip eŋwɔŋ: mmɔ edot ufen emi.

⁷Ndien ŋkop itie-uwa nte ɔdɔhɔde ete, Edi akpanikɔ, O Ɔbɔŋ Abasi, Andikara kpukpru ŋkpɔ, mme ikpe Fo enen enyuŋ edi akpanikɔ.

⁸Ɔyɔhɔ angel inaŋ aŋwaŋa eso esie ɔduɔk ke utin; ndien enɔ utin ndifɔp owo ikaŋ-ikaŋ.

⁹Akwa ufiop onyuŋ ɔfɔp owo; ndien mmɔ esuŋi enyiŋ Abasi emi enyenede odudu ndida mme ufen oro mmia owo; inyuŋ ikabakere esit inɔ Enye ubɔŋ.

¹⁰Ɔyɔhɔ angel ition aŋwaŋa eso esie ɔduɔk ke ebekpo unam oro; ndien obio ubɔŋ esie akabare okim, mbiobio esie enyuŋ eta edeme mmɔ enɔ ubiak,

¹¹enyuŋ esuŋi Abasi heaven, ebaŋa ubiak ye oyo mmɔ; mmɔ inyuŋ ikabakere esit ikpɔŋ mme utom mmɔ.

¹²Ɔyɔhɔ angel itiokiet aŋwaŋa eso esie ɔduɔk ke akwa akpa Euphrates; mmɔŋ akpa oro onyuŋ akabare asat, man etim afaŋ enim enɔ ndidem emi editode ke edem usiaha-utin edi.

¹³Ndien ŋkut spirit ndek ita, emi ebietde ikwɔt, nte ewɔŋɔde ke inua dragon ye ke inua unam oro ye ke inua prophet nsu;

¹⁴mmɔ edi spirit mme demon emi enamde mme idiɔŋɔ, emi enyuŋ ewɔŋɔde eka ke ɔtɔ ndidem kpukpru ekondo, nditaŋ mmɔ mbok ɔtɔ kiet edi ekɔŋ akwa usen Abasi, Andikara kpukpru ŋkpɔ.

¹⁵Sese, ndidi nte inɔ; ɔfɔfɔn ɔnɔ owo eke esinede edisine-ŋkpɔ etie ekpeme; mbak enye edisaŋa iferi, owo edinyuŋ okut mbubiam esie.

¹⁶Enyuŋ etaŋ mmɔ oro ekebok ke ebiet emi ekotde ke usem Hebrew, ete, Har-Magedon.

¹⁷Ɔyɔhɔ angel itiaba aŋwaŋa eso esie ɔduɔk ke ofim; ndien ɔkpɔsɔŋ uyo oto ke ebekpo emi odude ke temple ɔwɔrɔ, ete, Ama okure ama.

¹⁸Ndien emireŋ-mireŋ ye mme uyo, ye obuma etibe, akamba unyek-isɔŋ onyuŋ odu, ke utɔ ido nte akanam miduhe tɔŋɔ ini owo ekedude ke isɔŋ.

¹⁹Unyek-isɔŋ oro okpon, onyuŋ ɔsɔŋ eti-eti. Akwa obio onyuŋ abahare ke mbak ita, mme obio eke mme idut enyuŋ ewure. Ndien Abasi eti akwa obio Babylon, ete inɔ enye cup wine ikaŋ-ikaŋ iyaresit Imɔ.

²⁰Ndien kpukpru isuo efeŋe ebe efep, ikpɔ obot enyuŋ esop ke enyin.

²¹Ikpɔ edim itiat, eke udop mmɔ edide pound aba ye duop aba ye duop, eto ke enyɔŋ edep eduɔŋɔ owo ke idem. Owo enyuŋ esuŋi Abasi ke ntak ufen edim-itiat oro; koro ufen edimitiat ɔsɔŋ eti-eti.