Read efik ERIYARARE 17 Bible Online

ERIYARARE 17 - efik bible

ERIYARARE 17

¹EKEM angel kiet ke otu mme angel itiaba oro enyenede eso itiaba edi edidɔhɔ mi ete, Di ken; nyewut fi ubiom-ikpe akamba akpara oro etiede ke enyɔŋ ediwak mmɔŋ;

²emi ndidem isɔŋ ekenamde use ye enye, mme andiduŋ ke isɔŋ ekenyuŋ eŋwɔŋde wine use esie eyuhɔ.

³Ekem enye emen mi ke Spirit aka ke desert. Ndien ŋkut ŋwan etiede ke edem ididuot unam, emi enyiŋ isuŋi eyɔhɔde enye ke idem, emi onyuŋ enyenede ibuot itiaba ye nduk duop.

⁴Ŋwan oro onyuŋ esine iyip-iyip ididuot ɔfɔŋidem, onyuŋ ada gold ye ɔsɔŋ-urua itiat ye pearl abana idem, onyuŋ enyene cup o-gold ke ubɔk, emi ɔyɔhɔde ye mbubiam kpa ido ndek use esie.

⁵Enyuŋ ewet enyiŋ ke ɔkpɔ-iso esie, ndibe ikɔ emi ɔwɔrɔde ete, AKWA BABYLON! EKA MME AKPARA YE MBUBIAM IDO EKE EDUDE KE ISƆŊ.

⁶Ndien ŋkut ŋwan oro nte ɔŋwɔŋde iyip nti ikɔt Abasi ye eke mme ntiense Jesus ɔyuhɔ. Ke adaŋemi ŋkutde enye, idem akpa mi eti-eti.

⁷Edi angel ete mi, Nsinam idem akpade fi? Ami nyesian fi ndibe-ŋkpɔ mbaŋa ŋwan oro, ye unam emi obiomde enye, kpa unam oro enyenede ibuot itiaba ye nduk duop.

⁸Unam oro okutde ama odu, inyuŋ iduhe; edi ɔmɔŋ edito ke akwa ukpe ɔdɔk edi, onyuŋ ebe oduk ke nsobo. Idem eyekpa kpukpru mme andiduŋ ke isɔŋ, kpukpru mmɔ eke mikewetke enyiŋ mmɔ isin ke ŋwed uwem toto nte ekebotde ererimbot, ke ini mmɔ esede unam oro, ete ama odu, inyuŋ iduhe, edi ɔmɔŋ edidu mi.

⁹Mi ke ekut esit eke enyenede ibuot. Mme ibuot itiaba edi obot itiaba, eke ŋwan oro etiede ke esit.

¹⁰Mmɔ enyuŋ edi edidem itiaba ŋko; ndidem ition ke otu mmɔ ema eduɔŋɔ, kiet ke osuk odudu, enye eken idige kaŋa; enye ama onyuŋ edi, enye enyene ndibigi ke ekpri ibio ini.

¹¹Ama edi unam emi ama odu, minyuŋ iduhe aba, enye edi ɔyɔhɔ itiaita; enye onyuŋ edi kiet ke otu itiaba oro; ndien aka nsobo.

¹²Nduk duop oro okokutde edi ndidem duop, emi mikɔbɔhɔ kaŋa obio ida ikara; edi mmɔ esaŋa ye unam oro ebɔ nsɔŋ-uyo nte edidem eda enyene ke hour kiet.

¹³Mmɔ emi enyene uduak kiet, mmɔ enyuŋ eyak ukeme ye nsɔŋ-uyo mmɔ enɔ unam oro.

¹⁴Mmɔ eyeŋwana ekɔŋ ye Eyen-erɔŋ, ndien Eyen-erɔŋ eyekan mmɔ, koro Enye edide Ɔbɔŋ mbɔŋ ye Edidem ndidem; mmɔ emi edude ye Enye eyenyuŋ ekan, kpa mmɔ emi Abasi okokotde, onyuŋ emekde, emi enyuŋ edide mme anam akpanikɔ.

¹⁵Angel onyuŋ ɔdɔhɔ mi ete, Mmɔŋ oro okokutde, eke akpara etiede ke esit, edi mbio-obio, ye otu owo, ye mme idut ye usem.

¹⁶Nduk duop oro okokutde ye unam eyesua akpara oro, enyuŋ ebiat enye, enyuŋ enim enye iferi, enyuŋ eta enye ikpɔhidem, enyuŋ efɔp enye ke ikaŋ ewot.

¹⁷Koro Abasi ekesin mmɔ ke esit, ete enam uduak Imɔ, enyuŋ enyene ekikere kiet, enyuŋ eda obio emi mmɔ ekarade enɔ unam oro, tutu se Abasi eketiŋde osu.

¹⁸Ndien ŋwan oro okokutde edi akwa obio eke akarade ndidem isɔŋ.