Read efik ERIYARARE 20 Bible Online

ERIYARARE 20 - efik bible

ERIYARARE 20

¹EKEM ŋkut angel otode ke heaven ɔsuhɔre, akama ukpɔhɔre edituŋɔ ukpe ye akwa ŋkpɔkɔbi ke ubɔk.

²Enye onyuŋ omum dragon, akani urukikɔt, emi edide Andidori ikɔt Abasi ikɔ ye Satan, onyuŋ ɔkɔbi enye ke tɔsin isua,

³onyuŋ otop enye esin ke edituŋɔ ukpe, onyuŋ ɔkɔbi ukpe, onyuŋ esiri abaha enye, onim ufik-ŋkpɔ ke esit, man okubiaŋa aba mme idut tutu tɔsin isua ebe; ini oro ama ebe, enyene ndikpɔhɔre enye nyak ke ekpri ibio ini.

⁴Ekem ŋkut mme ebekpo, owo enyuŋ etie ke esit, enyuŋ eyak ubiere ikpe esin mmɔ ke ubɔk; ye mme ukpɔŋ owo oro ekebigide mmɔ ibuot ke ntak ikɔ ntiense Jesus ye ikɔ Abasi, ye kpukpru mmɔ emi mikatuakke ibuot inɔ unam oro ye mbiet esie, mikonyuŋ ibɔhɔ idiɔŋɔ ke ɔkpɔ-iso ye ke ubɔk mmɔ; mmɔ enyuŋ edu uwem, enyuŋ eda ubɔŋ ye Christ ke tɔsin isua.

⁵Mme akpa-mkpa eken etre ndidu uwem tutu tɔsin isua oro ebe. Emi edi akpa eriset ke mkpa.

⁶Ɔfɔfɔn ɔnɔ owo emi enyenede udeme ke akpa eriset: enye edi edisana; udiana akpa mkpa inyeneke odudu ke idem mmɔ emi: edi mmɔ eyedi mme oku Abasi ye Christ, mmɔ eyenyuŋ eda ubɔŋ ye Enye ke tɔsin isua.

⁷Ekem ke ini tɔsin isua ema ebe eyekpɔhɔre Satan ke ŋkpɔkɔbi esie esana enye eyak;

⁸ndien enye eyewɔrɔ edi ndibiaŋa mme idut eke edude ke ŋkaŋ isɔŋ mbinaŋ, kpa Gog ye Magog, man enye ataŋ mmɔ obok ɔtɔ kiet, ete eŋwana ekɔŋ; ibat mmɔ ebiet ibat ntan mben-inyaŋ.

⁹Ndien mmɔ esuana eyɔhɔ ke ofuri iso isɔŋ, enyuŋ ekanare nna nti ikɔt Abasi ye obio emi Abasi amade ekuk: edi ikaŋ oto ke enyɔŋ ɔsuhɔre edita mmɔ.

¹⁰Ndien emen Satan emi akabiaŋade mmɔ eduɔk ke akwa ŋkpɔdiɔhɔ ikaŋ ye brimstone, ke ebiet eke unam ye prophet nsu edude; eyenyuŋ etuhɔre mmɔ ke uwemeyo ke ke okoneyo ke nsinsi-nsinsi.

¹¹Ekem ŋkut akamba afia ebekpo, ye Enye emi etiede ke esit, emi isɔŋ ye ikpa-enyɔŋ efeŋede ekpɔŋ iso Esie, inyuŋ ikwe ufaŋ inɔ mmɔ aba.

¹²Ndien ŋkut mme akpa-mkpa, ikpɔ ye ŋkpri, nte edade ke iso ebekpo. Ndien ekibɔre mme ŋwed; enyuŋ ekibɔre mme ŋwed mme ŋwed eŋwen, emi edide ŋwed uwem; enyuŋ eda se ewetde esin ke ŋwed oro ekpe ikpe mme akpa-mkpa, nte ekemde ye se mmɔ ekenamde.

¹³Ndien inyaŋ ibom asana mme akpa-mkpa emi edude ke esit ayak; mkpa ye obio ekpo enyuŋ esana mme akpa-mkpa mmɔ eyak: ndien ekpe ikpe kpukpru owo nte ekemde ye se mmɔ ekenamde.

¹⁴Enyuŋ emen mkpa ye obio ekpo eduɔk ke akwa ŋkpɔdiɔhɔ ikaŋ. Emi edi udiana mkpa, kpa akwa ŋkpɔdiɔhɔ ikaŋ.

¹⁵Ndien emen owo ekededi eke mikewetke enyiŋ esie ke ŋwed uwem eduɔk esin ke akwa ŋkpɔdiɔhɔ ikaŋ.