Read efik ERIYARARE 7 Bible Online

ERIYARARE 7 - efik bible

ERIYARARE 7

¹KE ŋkpɔ oro ama ekebe, ŋkut angel inaŋ edade ke utit isɔŋ mbinaŋ, mmɔ enyuŋ emum ofim isɔŋ mbinaŋ ekama, man baba ofim okufime ke isɔŋ, mme ke inyaŋ, mme ke eto ekededi.

²Ndien ŋkut angel eŋwen otode ke edem usiaha-utin ɔdɔk, emi enyenede ufik-ŋkpɔ Abasi uwem; ndien enye ada ɔkpɔsɔŋ uyo okot mme angel inaŋ oro eyakde odudu enɔ mmɔ ndibiat obot ye inyaŋ, ete,

³Ekubiat obot ye inyaŋ ye mme eto tutu idifik ikɔt Abasi nnyin idiɔŋɔ ke ɔkpɔ-iso mmɔ.

⁴Ndien ŋkop ibat mmɔ emi efikde mmɔ idiɔŋɔ; thousand owo ikie ye aba ye inaŋ, emi esiode ke kpukpru esien nditɔ Israel efik mmɔ idiɔŋɔ.

⁵Ke esien Judah ke esio thousand owo duopeba efik mmɔ idioŋɔ: Ke esien Rueben thosand owo duopeba: Ke esien Gad thousand owo duopeba:

⁶Ke esien Asher thousand owo duoepba: Ke esien Naphtali thousand owo duopeba: Ke esien Manasseh thousand owo duopeba:

⁷Ke esien Simeon thousand owo duopeba: Ke esien Levi thousand owo duopeba: Ke esien Issachar thousand owo duopeba:

⁸Ke esien Zebulon thousand owo duopeba: Ke esien Joseph thousand owo duopeba: Ke esien Benjamin esio thousand owo duopeba efik mmɔ idiɔŋɔ.

⁹Ke ŋkpɔ emi ema ekebe, ŋkut, ndien sese, akwa otu owo, eke baba owo kiet mikemeke ndibat, eke etode ke kpukpru obio ye esien ye idut ye usem eda ke iso ebekpo ye ke iso Eyen-erɔŋ, esine mfia ɔfɔŋidem, enyuŋ ekama ndak eyop ke ubɔk;

¹⁰mmɔ enyuŋ efiori ke ɔkpɔsɔŋ uyo, ete, Yak erinyaŋa enyene Abasi nnyin emi etiede ke ebekpo, Onyuŋ enyene Eyen-erɔŋ.

¹¹Ndien kpukpru mme angel edada ekan ebekpo ye mbiowo ye ŋkpɔ-uwem inaŋ oro ekuk; mmɔ enyuŋ eduɔŋɔ ke iso ebekpo ekibi iso ke isɔŋ,

¹²etuak ibuot enɔ Abasi, ete, Amen; yak eridiɔŋ, ye ubɔŋ, ye ifiɔk, ye ekɔm, ye ukpono ye odudu, ye ukeme, enyene Abasi nnyin ke nsinsi-nsinsi. Amen.

¹³Ndien kiet ke otu mbiowo ɔbɔrɔ mi ete, Mmɔ oro esesine mfia ɔfɔŋ-idem edi mme anie, mmɔ enyuŋ eto mmɔŋ?

¹⁴Ndɔhɔ enye nte, Ɔbɔŋ mi, afo ɔmɔfiɔk. Ekem enye ɔdɔhɔ mi ete, Mmɔ oro edi mmɔ emi eketode ke akwa ukut ewɔŋɔ, ekenyuŋ eyetde ɔfɔŋidem mmɔ enam afia ke iyip Eyen-erɔŋ.

¹⁵Mmɔdo mmɔ edude ke iso ebekpo Abasi; enyuŋ enam ŋkpɔ enɔ Enye uwemeyo ye okoneyo ke temple Esie: ndien Enye emi etiede ke ebekpo eyetat ataya Esie ofuk mmɔ.

¹⁶Mmɔ idikopke aba biɔŋ, idinyuŋ ikopke aba nsatitɔŋ;

¹⁷eyo mme ufiop ekededi idinyuŋ imiaŋa mmɔ: koro Eyen-erɔŋ emi etiede ke ufɔt ebekpo eyedi Andikpeme mmɔ, eyenyuŋ ada mmɔ aka ke idim mmɔŋ uwem: ndien Abasi eyekwɔhɔre kpukpru mmɔŋ eyet ke enyin mmɔ efep.