Read efik ERIYARARE 9 Bible Online

ERIYARARE 9 - efik bible

ERIYARARE 9

¹EKEM ɔyɔhɔ angel ition ofri; nnyuŋ ŋkut ntantafiɔŋ nte otode ke enyɔŋ ɔduɔ ke isɔŋ; ndien enɔ enye ukpɔhɔre obube akwa udem.

²Enye onyuŋ ɔkpɔhɔre obube akwa udem; nsuŋikaŋ onyuŋ oto ke obube oro ɔwɔrɔ, ebiet nsuŋikaŋ akwa ikaŋ emi ebarade; utin ye enyɔŋ enyuŋ ekabare ekim ke ntak nsuŋikaŋ obube oro.

³Ŋkukuŋkpɔyɔriyɔ eto ke nsuŋikaŋ ewɔŋɔ eduk ke isɔŋ; enyuŋ enɔ mmɔ odudu nte ikpeyen isɔŋ enyenede odudu.

⁴Enyuŋ enɔ mmɔ uyo, ete ekunam ibak ye mbiet isɔŋ, ye kpukpru awawa ikɔŋ, ye kpukpru eto, edi enam ibak ye mmɔ oro minyeneke idiɔŋɔ Abasi ke ɔkpɔ-iso mmɔ ikpɔŋ-ikpɔŋ.

⁵Enyuŋ enɔ mmɔ uyo, ete ekuwot mmɔ oro, edi etuhɔre mmɔ ɔfiɔŋ ition: ndien ndutuhɔ mmɔ ebiet ndutuhɔ ikpeyen, kini otopde owo.

⁶Ke mme usen oro ke owo eyeyom mkpa edi idikwe; itɔŋ mkpa eyenyuŋ ɔdɔŋ mmɔ, edi mkpa eyefehe ɔkpɔŋ mmɔ.

⁷Ndien ŋkukuŋkpɔyɔriyɔ oro ebiet enaŋ-mbakara emi ebeŋede enɔ ekɔŋ; mmɔ enyuŋ eyara ŋkpɔ eke ebietde anyanya o-gold ke ibuot mmɔ, iso mmɔ enyuŋ ebiet iso owo;

⁸mmɔ enyene idet nte idet iban, ndien edet mmɔ ebiet eke mme lion:

⁹mmɔ enyuŋ enyene ŋkpɔ-ikpanesit nte ŋkpɔ-ikpanesit ukwak; uyom mba mmɔ onyuŋ ebiet uyom mme chariot, uyom ediwak enaŋ-mbakara eke ebumerede eduk ekɔŋ.

¹⁰Mmɔ enyuŋ enyene isim ebiet ikpeyen, ye ifɔt ke esit; ndien odudu mmɔ odu ke isim mmɔ, ndida nnam owo ibak ɔfiɔŋ ition.

¹¹Mmɔ enyene angel akwa udem oro ke edidem mmɔ; enyiŋ esie ke usem Hebrew ekere Abaddon, ke usem Greek ekere Apollyon.

¹²Ŋkpɔ-nnam kiet ama ebe; sese, ŋkpɔ-nnam iba efen ededi ke edem.

¹³Ekem ɔyɔhɔ angel itiokiet ofri ukorowo; ndien ŋkop uyo nte otode ke nduk inaŋ eke itie-uwa o-gold, emi odude ke iso Abasi,

¹⁴ɔdɔhɔ ɔyɔhɔ angel itiokiet oro enyenede ukorowo, ete, Kpɔhɔre mme angel inaŋ oro ekɔkɔbide enim ke akwa akpa Euphrates.

¹⁵Ndien ekpɔhɔre mme angel inaŋ eke ekenimde enɔ ini ye usen ye ɔfiɔŋ ye isua oro, ete mmɔ ekpewot ubak owo kiet ke itie ita.

¹⁶Ndien ibat udim ekɔŋ eke edorode ke enaŋ-mbakara edi thousand duop ke itie thousand duop utim ikaba: ŋkop ibat mmɔ.

¹⁷Edi ntem ke ŋkut mme enaŋ ke ŋkukut ye mme andidoro mmɔ ke edem; mmɔ oro enyene ŋkpɔ-ikpanesit ekɔŋ, ikaŋ ye hyacinth ye brimstone; ibuot mme enaŋ mmɔ ebiet ibuot lion, ndien ikaŋ ye nsuŋikaŋ ye brimstone eto mmɔ ke inua ewɔŋɔ.

¹⁸Eda ufen ita emi, ikaŋ ye nsuŋikaŋ ye brimstone, eke ewɔŋɔde mmɔ ke inua, esobo ubak owo kiet ke itie ita.

¹⁹Koro odudu mme enaŋ oro odu ke inua mmɔ ye ke isim mmɔ; koro isim mmɔ ebiet urukikɔt, enyuŋ enyene ibuot; mmɔ enyuŋ eda oro enam ibak.

²⁰Ndien owo eke esuhɔde, eke miwotke mmɔ ke ufen emi, ikabakere esit ikpɔŋ ubɔk-utom mmɔ; mmɔ inyuŋ itreke ndituak ibuot nnɔ mme demon, ye ndem o-gold ye silver ye okpoho ye itiat ye eto, eke mikemeke ndikut usuŋ, ndinyuŋ ŋkop ikɔ, ndinyuŋ nsaŋa.

²¹Mmɔ inyuŋ ikabakere esit ikpɔŋ eriduɔ obom mmɔ, ye eribre idiɔŋ mmɔ, ye use mmɔ, ye mme inɔ mmɔ.