Read efik RUTH 2 Bible Online

RUTH 2 - efik bible

RUTH 2

¹NDIEN Naomi enyene owo kiet ke oruk ebe esie, akamba ɔbɔŋ, emi otode ke oruk Elimelech; ndien enyiŋ esie ekere Boaz.

²Ekem Ruth ŋwan Moab oro ɔdɔhɔ Naomi, ete, Mbɔk, yak ŋka ke iŋwaŋ, ntiene owo eke edinende iso ye ami ŋkataŋ mbuot barley. Ndien enye ɔdɔhɔ enye, ete, Ka eyen mi.

³Ndien enye aka ke iŋwaŋ asaŋa ke edem mmɔ eke ekpeŋede, ataŋ: ndien enye ediyoho ɔwɔrɔ ke iŋwaŋ emi enyenede Boaz emi otode ke oruk Elimelech.

⁴Ndien, sese, Boaz oto ke Beth-lehem edi, ndien enye ɔkɔm mbon ukpeŋe, ete, Jehovah osuk odu ye mbufo. Ndien mmɔ ebɔrɔ enye, ete, Jehovah osuk ɔdiɔŋ fi.

⁵Ndien Boaz obup owo esie oro edide etubom mbon-ukpeŋe, ete, Ŋwan anie owo edi emi?

⁶Ndien akparawa oro edide etubom mbon-ukpeŋe ɔbɔrɔ, ete, Enye edi ŋwan a Moab oro okotode ke idut Moab asaŋa ye Naomi ɔnyɔŋ edi;

⁷ndien enye ɔdɔhɔ ete, Mbɔk, yak ntiene mbon-ukpeŋe ke otu mme ebek ntaŋ mbuot: ntem ke enye ekedi ke usenubɔk, onyuŋ ebigi tutu osim ndo-ndo emi enye ama etie ke ufɔk esisit.

⁸Ndien Boaz ɔdɔhɔ Ruth, ete, Eyen mi, ukopke? Kuka ukataŋ ke iŋwaŋ efen, kunyuŋ udaha ke ebiet emi, edi dian idem ye nditɔ iban mi mi:

⁹tiŋ enyin ke iŋwaŋ eke mmɔ ekpeŋede, nyuŋ tiene mmɔ ke edem: nte ŋkowukke mkparawa mi, nte ekunam fi idiɔk? ndien ke ini itɔŋ asatde fi, ka kɔŋwɔŋ ke abaŋ emi mkparawa ekekoide.

¹⁰Ndien enye (Ruth) ɔduɔ ke isɔŋ okubi iso, onyuŋ ɔnuhɔ ke isɔŋ, onyuŋ ɔdɔhɔ ete, Nsinam afo enende iso ye ami, emi afo ɔdiɔŋɔde mi emi ami ndide esen owo?

¹¹Ndien Boaz ɔbɔrɔ enye, ete, Ema etim edɔhɔ mi kpukpru se afo akanamde ye eka uberi, nte uberi akakpa; ye nte afo ɔkɔkpɔŋde usɔ ye uka, ye isɔŋ emana fo, onyuŋ edide ke obio eke akananam mufiɔkke.

¹²Jehovah osuk ɔnɔ fi usiene utom fo, Jehovah Abasi Israel emi afo edide ndibuɔt idem fo ke idak mba esie, osuk ɔnɔ fi ofuri ŋkpɔ eyen-utom fo ŋko.

¹³Ndien enye (Ruth) ɔdɔhɔ ete, Nen iso ye ami, ɔbɔŋ mi: koro afo ɔmɔdɔŋ mi esit, omonyuŋ ɔdɔhɔ eti ikɔ ye eyen fo ŋwan, okposuk edi nte ami mmentiehe nte owo kiet ke otu nditɔ fɔ iban.

¹⁴Ndien Boaz ɔdɔhɔ enye, ete, Ke ini udia di ken, di dia ŋkpɔ, nyuŋ debi ŋkeŋe fo ke vinegar. Ndien enye etie ye mbon-ukpeŋe: enye (Boaz) onyuŋ ada edifɔp ibokpot anyan ɔnɔ enye, ndien enye ata, ɔyuhɔ, onyuŋ ɔsuhɔ.

¹⁵Ndien adaŋemi enye adahade ke enyɔŋ, ete ikataŋ, Boaz eteme mkparawa esie, ete, Mbufo eyak enye ataŋ ke otu mme ebek,

¹⁶ekunyuŋ esua enɔ enye: mbufo enyuŋ esioŋo ndusuk ke se mbufo ekamade ke ubɔk, ekpɔŋ enɔ enye, man enye ataŋ, ekunyuŋ enam ikɔ ye enye.

¹⁷Ntre ke enye ataŋ ke iŋwaŋ tutu eyo okut, onyuŋ amia se akataŋde: ndien enye ɔwɔrɔ ephah barley kiet.

¹⁸Ndien enye emen oro aka ke obio: ndien eka-ebe esie okut se enye akataŋde; ndien enye (Ruth) osio se enye ɔkɔsuhɔde, ke adaŋemi enye ɔkɔyuhɔde, ada ɔnɔ enye.

¹⁹Ndien eka ebe esie ɔdɔhɔ enye, ete, Afo akataŋ ke mmɔŋ mfin emi? Onyuŋ anam utom ke mmɔŋ? Osuk ɔfɔfɔn ɔnɔ enye emi ɔkɔdiɔŋɔde fi. Ndien enye asian eka ebe esie owo oro enye akanamde utom ye enye, onyuŋ ɔdɔhɔ ete, Enyiŋ owo oro ŋkanamde utom ye enye mfin emi ekere Boaz.

²⁰Ndien Naomi ɔdɔhɔ ŋwan eyen esie, ete, Jehovah emi mitreke mfɔn esie ye mme andidu uwem ye mme andikpa mkpa, osuk ɔfɔfɔn ye enye. Naomi onyuŋ ɔdɔhɔ enye, ete, Owo oro edi oruk nnyin, onyuŋ odu ke otu mmɔ emi ekpefakde nnyin.

²¹Ndien Ruth ŋwan a Moab ɔdɔhɔ ete, Enye okonyuŋ ɔdɔhɔ mi ŋko, ete, Dian idem fo ye ikɔt mi, tutu mmɔ ekpeŋe ofuri ukpeŋe mi ema.

²²Ndien Naomi ɔdɔhɔ Ruth, ŋwan eyen esie, ete, Eyen mi, ɔfɔn nte afo ɔwɔrɔde asaŋa ye nditɔ esie iban, ɔfɔn nte ekukut fi ke iŋwaŋ efen.

²³Ntre ke enye adian ye nditɔ Boaz iban, ataŋ tutu ekpeŋe barley ye wheat ema; enye onyuŋ oduŋ ye eka ebe esie.