Read efik RUTH 3 Bible Online

RUTH 3 - efik bible

RUTH 3

¹NDIEN Naomi eka ebe esie ɔdɔhɔ enye, ete, Eyen mi, nte ŋkpoyomke nduɔk-odudu nnɔ fi, eke edifɔnde ye afo?

²Ndien, sese, nte Boaz emi afo okodude ye nditɔ esie iban idige oruk nnyin? Sese enye ke asasak barley ke ebiet-ubek ke okoneyo emi.

³Yere mmɔŋ, ndien, nyuŋ da edifuɔŋ aran diɔŋ idem, nyuŋ sine edisine-ŋkpɔ fo, nyuŋ suhɔre ka ke ebiet-ubek: kuyak enye ɔdiɔŋɔ fi, tutu enye adia ŋkpɔ, onyuŋ ɔŋwɔŋ ama.

⁴Ama ekem ke ini eke enye anade ke isɔŋ, tim se ebiet emi enye edinade do, ndien ka kɔfuhɔre enye ukot, suhɔre na do; ndien enye eyedɔhɔ fi se afo akpanamde.

⁵Ndien enye ɔdɔhɔ enye, ete, Nyenam kpukpru se afo ɔdɔhɔde mi.

⁶Ekem enye ɔsuhɔre aka ke ebiet ubek, onyuŋ anam kpukpru se eka ebe esie eketemede enye.

⁷Ndien adaŋemi Boaz adiade ŋkpɔ onyuŋ ɔŋwɔŋde, esit onyuŋ enemde enye, enye aka ɔkɔsuhɔre ana ke mben otu: ndien enye (Ruth) asaŋa ndibe-ndibe, aka ɔkɔfuhɔre enye ukot, ndien ɔsuhɔre ana.

⁸Edikem ke ufɔt okoneyo, Boaz edikhe, ndien enye anyan idem ese; ndien, sese, ŋwan anade enye ke ukot.

⁹Ndien enye obup ete, Afo edi anie? Ndien enye ete, Ami ndi Ruth eyen fo aŋwan; da ufuhɔ-ŋkpɔ fo, fuk mi eyen fo aŋwan: koro afo edide owo eke akpafakde.

¹⁰Ndien enye ɔdɔhɔ ete, Jehovah osuk ɔdiɔŋ fi, eyen mi, koro afo ɔfɔnde ido ke ukpere-edem akan eke mbemiso, sia muketieneke mkparawa, edide ubuene, onyuŋ edide enyene-ŋkpɔ.

¹¹Kufehe ndien, eyen mi; nyenam kpukpru se afo ɔdɔhɔde nnɔ fi: koro kpukpru mbio-obio nnyin efiɔkde ete ke afo edi enyene-ido aŋwan.

¹²Ndien ke akpan ami ndi owo ufak: edi owo eŋwen odu ŋko emi ekperede akan mi.

¹³Tietie okoneyo emi, ndien ama ekem ke eyo esierede, ekpedi nte enye edifakde fi, ɔfɔn; yak enye afak: edi mimaŋa ndifak fi, ndien, ma uwem Jehovah, ami nyefak fi: suhɔre nna do tutu eyo esiere.

¹⁴Ndien enye ana ke ukot esie tutu eyo esiere: ndien adaha ke enyɔŋ ke ini owo mikemeke ndidiɔŋɔ owo. Ndien enye ɔdɔhɔ ete, Kuyak efiɔk ete ke ŋwan edi ke ebiet-ubek.

¹⁵Ndien enye ɔdɔhɔ ete, Men ufuhɔ-idem emi afo esinede, mum enye kama. Ndien enye omum enye akama, ndien enye (Boaz) odomo udomo barley itiokiet, emen odori enye ke idem. Ndien enye Boaz aka ke obio.

¹⁶Ndien adaŋemi Ruth osimde eka ebe esie, enye ɔdɔhɔ ete, Afo edi anie, eyen mi? Ndien enye emen kpukpru se owo oro akanamde ye enye etiŋ ɔnɔ eka.

¹⁷Enye onyuŋ ɔdɔhɔ ete, Enye ɔkɔnɔ mi udomo barley itiokiet emi: koro enye ɔdɔhɔde ete, Kunyɔŋ ubɔk-ubɔk utiene eka uberi.

¹⁸Ndien eka ɔdɔhɔ ete, Tietie, eyen mi, tutu afo ɔfiɔk nte ŋkpɔ emi ediwɔrɔde: koro owo oro mididuɔkke odudu, tutu enye anam ŋkpɔ emi ama mfin emi.