Read efik RUTH 4 Bible Online

RUTH 4 - efik bible

RUTH 4

¹EKEM Boaz ɔdɔk aka ke inua otop obio, eketie do: ndien, sese, owo ufak oro Boaz ɔkɔdɔhɔde abaŋa ke asaŋa ebe: ndien enye ɔdɔhɔ ete, Da O, waha tiene mi Ndien enye awaha, aka eketie do.

²Boaz onyuŋ osio owo duop ke otu mbiowo obio, onyuŋ ɔdɔhɔ ete, Mbufo ewaha editie mi, Ndien mmɔ esuhɔre etie.

³Ndien enye ɔdɔhɔ owo ufak oro, ete, Naomi, emi okotode ke idut Moab ɔnyɔŋ edi, akanyam iŋwaŋ emi ekenyenede eyen-ete nnyin Elimelech;

⁴Ndien ami ŋkere nte ke ntiŋ ke utɔŋ fo, nte, Dep enye ke iso mme mmɔ emi etiede mi, kpa ke iso mbiowo obio nnyin. Edieke afo onyimede ndifak, fak; edi mufakke, tiŋ nɔ mi man mfiɔk: koro owo eke afakde miduhe ke mibɔhɔke afo: ndien ami ntiene fi ke edem. Ndien enye ɔdɔhɔ ete, Ami nyefak.

⁵Ndien Boaz ɔdɔhɔ, ete, Ke usen emi afo edepde isɔŋ oro ke ubɔk Naomi, afo omonyuŋ enyene ndidep enye ye Ruth ŋwan a Moab, ŋwan akpa-mkpa man edemere enyiŋ akpa-mkpa ke udeme esie.

⁶Ndien owo ufak oro ɔdɔhɔ ete, Ŋkwe nte ndifakde ke idem mi, mbak ndibiat udeme mi: bɔ itie ufak mi ke idem fo: koro mmeŋkwe nte ndifakde.

⁷Ndien emi ekedi akani ido ke Israel, ke ikɔ erifak, ye ke ikɔ erikpuhɔ, ndinam kpukpru ŋkpɔ esɔŋ eda owo osio ikpa-ukot esiemɔ emen ɔnɔ mbɔhiduŋ esie: emi onyuŋ edi nte ikɔ ntiense ke Israel.

⁸Ndien owo ufak oro ɔdɔhɔ Boaz, ete, Dep ke idem fo. Enye onyuŋ osio, ikpa-ukot esie efep.

⁹Ndien Boaz ɔdɔhɔ mbiowo ye kpukpru owo, ete, Mbufo edi ntiense mfin emi, ete ke ami mmedep kpukpru se inyenede Elimelech, ye kpukpru se inyenede Chilio ye Mahlon, ke ubɔk Naomi.

¹⁰Ndien ŋko mmedep Ruth ŋwan Moab, ŋwan Mahlon ke idem mi ndɔ, man ndemere enyiŋ akpa-mkpa ke udeme esie, man enyiŋ akpa-mkpa okusop ke otu nditɔ-ete esie, ye ke inua-otop ebiet esie; mbufo edi ntiense mfin emi.

¹¹Ndien kpukpru mmɔ emi edude ke inua-otop obio, ye mbiowo oro ŋko, edɔhɔ ete, Ih, nnyin idi ntiense. Yak Jehovah anam ŋwan emi odukde ke ufɔk fo etie nte Rachel ye nte Leah, emi edide mmɔ mbiba ekebɔp ufɔk Israel: nyuŋ nam eti ke Ephrathah, nyuŋ wɔrɔ etop ke Beth-lehem:

¹²yak ufɔk fo onyuŋ etie nte ufɔk Perez emi Tamar akamande ɔnɔ Judah, oto ke nditɔ emi Jehovah edinɔde fi ke ŋwan emi.

¹³Ndien Boaz ada Ruth ɔdɔ: ndien adaŋemi ɔfiɔkde enye, Jehovah anam enye oyomo, ndien enye aman eyen-eren.

¹⁴Ndien iban edɔhɔ Naomi, ete, Ekɔm Jehovah emi mikayakke fi anana owo eke afakde, mfin emi; yak enye onyuŋ ɔwɔrɔ etop ke Israel.

¹⁵Enye eyenyuŋ edi andimenere uwem fo, ye andikama fi ke ini usɔŋ fo: koro ŋwan eyen fo emi amade fi, emi onyuŋ ɔfɔnde ye afo akan nditɔ-iren itiaba, amaman enye.

¹⁶Ndien Naomi ada eyen oro onim ke ikpanesit esie, onyuŋ akabare edi edep esie.

¹⁷Ndien iban, mbɔhiduŋ esie, esio enye enyiŋ, ete, Eyen-eren amana ɔnɔ Naomi; ndien mmɔ esio enye enyiŋ Obed: enye ekedi ete Jesse, ete David.

¹⁸Ndien mme mmɔ emi edi emana Perez: Perez okobon Hezron,

¹⁹ndien Hezron obon Ram, ndien Ram obon Amminadab,

²⁰ndien Amminadah obon Nashon, ndien Nashon obon Salmon,

²¹ndien Salmon obon Boaz, ndien

²²Boaz obon Obed, ndien Obed obon Jesse, ndien Jesse obon David.