Read efik 1 SAMUEL 10 Bible Online

1 SAMUEL 10 - efik bible

1 SAMUEL 10

¹NDIEN Samuel ada ekpeme aran ɔtɔhɔ enye ke ibuot, ndien otim enye inua, onyuŋ ɔdɔhɔ ete, Nte idige koro Jehovah eyetde fi aran onim ke etubom udeme esie?

²Adaŋemi afo ɔnyɔŋde ɔkpɔŋ mi mfin emi, afo eyesim owo iba ke ɔtɔ udi Rachel ke adaŋa Benjamin ye Zelzah; ndien mmɔ eyedɔhɔ fi, ete ke ema ekut mme ass emi afo ekekade ndiyom: ndien, sese, usɔ ɔmɔkpɔŋ ikɔ mme ass, onyuŋ oyomo nsia abaŋa mbufo, ete, Ndinam didie mbaŋa eyen mi?

³Ndien adaŋemi afo otode do ebe aka okosim ofriyo Tabor, owo ita eyebiɔŋɔre fi do, edɔk ke ɔtɔ Abasi ke Bethel, kiet obiom nditɔ ebot ita, kiet eken onyuŋ obiom uyo ita, kiet eken onyuŋ obiom wine ke ikpa:

⁴ndien mmɔ eyekɔm fi, enyuŋ enɔ fi uyo iba, ndien afo bɔ mmɔ ke ubɔk.

⁵Oro ama ebe afo eyesim ke obot Abasi, emi mbon-ukpeme mme Philistine edude do: ama ekem, adaŋemi afo edisimde do ke obio, eyesim udim prophet eke etode ke edikoŋ ebiet esuhɔre, psaltery, ye ekɔmɔ, ye obukpoŋ, ye harp enyuŋ ebem mmɔ iso; ndien mmɔ eyenam prophecy:

⁶ndien spirit Jehovah eyeduk fi ke idem, ndien afo eyetiene mmɔ anam prophecy, eyenyuŋ akabare edi owo efen.

⁷Ndien ama ekem ke ini mme idiɔŋɔ emi esimde fi, nam ke idem fo nte ubɔk fo edikutde: koro Abasi odude ye afo.

⁸Ndien bem mi iso suhɔre ka ke Gilgal; ndien sese, ami nyesuhɔre ntiene fi ndifɔp edifɔp uwa, nnyuŋ ŋwa uwa emem: bet mi ke usen itiaba, tutu ami ndisim fi, nnyuŋ nsian fi se afo edinamde.

⁹Edikem adaŋemi enye ɔwɔŋɔrede afara ɔkpɔŋ Samuel, Abasi akabare esit esie ɔnɔ enye efen: kpukpru mme idiɔŋɔ emi enyuŋ ewɔrɔ ke usen oro.

¹⁰Ndien adaŋemi mmɔ esimde do ke obot oro, sese, udim prophet edisobo ye enye: ndien Spirit Abasi oduk enye ke idem, ndien enye anam prophecy ke otu mmɔ.

¹¹Edikem adaŋemi kpukpru owo eke ekebemde iso efiɔk enye ekutde enye, ete, sese, enye ke anam prophecy ke otu mme prophet, ndien kpukpru owo edɔhɔ kiet ye kiet, ete, Emi-e! nsinam eyen Kish? Nte Saul onyuŋ odu ke otu mme prophet?

¹²Owo emi otode do onyuŋ ɔbɔrɔ ete, Ndien anie edi ete mmɔ? Mmɔdo enye akabarede edi ufiet, ete, Nte Saul onyuŋ odu ke otu mme prophet?

¹³Ekem enye etre ndinam prophecy, ndien edisim ke edikoŋ ebiet.

¹⁴Ekem eyen-ete Saul ɔdɔhɔ enye ye owo esie, ete, Mbufo ekeka mmɔŋ? Ndien enye ɔbɔrɔ ete, Ndiyom mme ass: ndien adaŋemi nnyin ikokutde ite ke mmɔ iduhe, nnyin ika ɔtɔ Samuel.

¹⁵Ndien eyen-ete Saul ɔdɔhɔ ete, Mbɔk, men se Samuel ɔkɔdɔhɔde mbufo tiŋ nɔ mi.

¹⁶Ndien Saul ɔdɔhɔ eyen-ete esie, ete, Enye okotim asian nnyin, ete ke ema ekekut mme ass. Edi ama edi ikɔ ubɔŋ oro Samuel ɔkɔdɔhɔde, enye itiŋke inɔ enye.

¹⁷Ekem Samuel owuk kpukpru owo, ete ebono ke ɔtɔ Jehovah ke Mizpah;

¹⁸ndien enye ɔdɔhɔ ye nditɔ Israel, ete, Ntem ke Jehovah Abasi Israel ɔdɔhɔ ete, Ami ŋkada Israel ke Egypt ndɔk, ŋkonyuŋ nsio mbufo Egypt ke ubɔk, ye ke ubɔk kpukpru mme idut oro ekefikde mbufo:

¹⁹Edi mfin emi mbufo emesin Abasi mbufo, emi edide enye akanyaŋa mbufo osio ke ofuri ukut mbufo, ye nnanenyin mbufo; enyuŋ edɔhɔ enye, ete, Kutre ndinam edidem nnɔ nnyin. Mbufo edi, ndien, edida ke iso Jehovah, ke esien, ke esien, ye ke tɔsin, ke tɔsin.

²⁰Ndien Samuel ada kpukpru mme esien Israel edi, ndien esio esien Benjamin.

²¹Ndien enye ada esien Benjamin edi ke ubon, ke ubon, ndien esio ubon Matri,ndien esio Saul eyen Kish:

²²Ndien mmɔ eyom enye, edi ikwe. Ndien mmɔ etɔŋɔ ntak ebup Jehovah, ete, Nte owo emi edidi ken? Ndien Jehovah ɔbɔrɔ ete, Sese, enye aka okodibe ke otu mkpoduoho.

²³Ndien mmɔ efehe eka ekesio enye ke ebiet oro: ndien adaŋemi enye adade ke otu mmɔ, kpukpru owo eda enye ke afara.

²⁴Ndien Samuel ɔdɔhɔ kpukpru owo, ete, Nte mbufo emekut enye emi Jehovah emekde, ete ke baba owo kiet ibietke enye ke otu kpukpru mbio-obio? Ndien kpukpru owo efiori, enyuŋ edɔhɔ ete,

²⁵Yak edidem odu uwem. Ndien Samuel etiŋ ido itie edidem ɔnɔ kpukpru owo, onyuŋ ewet esin ke ŋwed, ndien emen enye okonim ke iso Jehovah. Ekem Samuel ayak kpukpru owo enyɔŋɔ ke ebiet mmɔ.

²⁶Ndien Saul onyuŋ ɔnyɔŋ ke ufɔk esie ke Gibeah; udim owo eke Abasi ekedemerede mmɔ esit, enyuŋ etiene enye eka.

²⁷Ndien mme oburobut owo edɔhɔ ete, Owo emi edida nso inyaŋa nnyin? Ndien mmɔ esin enye ke ndek, inyuŋ idaha enɔ isɔk enye. Edi enye odop uyo.