Read efik 1 SAMUEL 11 Bible Online

1 SAMUEL 11 - efik bible

1 SAMUEL 11

¹EKEM Nahash eyen Ammon ɔdɔk aka akanam nna ndiŋwana ekɔŋ ye Jabesh-gilead: ndien kpukpru mbio-obio edɔhɔ Nahash, ete, Nam ediomi ye nnyin, ndien nnyin iyedi ikɔt fo.

²Ndien Nahash eyen Ammon ɔbɔrɔ mmɔ, ete, Ntem ke ndinyime ndinam ediomi ye mbufo, mma ntibi mbufo kpukpru enyin nnasia, nnyuŋ nda enye ndori ofuri Israel ke esuene.

³Ndien mbiowo Jabesh edɔhɔ enye, ete, Yak nnyin ke usen itiaba, man nnyin idɔŋ mme isuŋutom ke ofuri adaŋa Israel: ndien owo eke anyaŋade nnyin miduhe, nnyin iyewɔŋɔ itiene fi.

⁴Ekem mme isuŋutom oro edisim Gibeah Saul, enyuŋ edɔhɔ ikɔ emi ke utɔŋ mbio-obio: ndien kpukpru mbio-obio emenere uyo mmɔ etua eyet.

⁵Ndien, sese, Saul asaŋa mme enaŋ ke edem oto ke iŋwaŋ edi; ndien Saul obup ete, Nsinam mbio-obio etuade eyet? Ndien mmɔ emen uyo mbio-obio Jabesh oro etiŋ enɔ enye.

⁶Ndien Spirit Jehovah oduk Saul ke idem, ke ini enye okopde ikɔ emi, esit onyuŋ ayat enye eti-eti.

⁷Ndien enye ada enaŋ iba abak, onyuŋ emen mmɔ esin mme isuŋutom ke ubɔk, ete eda esaŋa ke ofuri adaŋa Israel, ete, Owo ekededi eke midiwɔrɔke Saul ye Samuel ke edem, ntem ke edinam enaŋ esie. Ndien ndik Jehovah odoro kpukpru owo ke idem, ndien mmɔ ewɔŋɔ ye esit kiet.

⁸Ndien adaŋemi ebatde mmɔ ke Bezek, nditɔ Israel esim tɔsin owo ke itie ikie ita, ye nditɔ Judah tɔsin owo edip ye duop.

⁹Ndien mmɔ edɔhɔ mme isuŋutom oro ekedide, ete, Ntem ke mbufo edidɔhɔ mbio-obio Jabesh-gilead, ete, Mkpɔŋ erinyaŋa eyesim mbufo ke adaŋemi eyo ofiopde. Ndien mme isuŋutom oro eka eketiŋ enɔ mbio-obio Jabesh; ndien esit adat mmɔ.

¹⁰Ndien mbio-obio Jabesh edɔhɔ ete, Mkpɔŋ, nnyin iyewɔŋɔ itiene mbufo, ndien mbufo enam nnyin kpukpru se mbufo emade.

¹¹Edikem mkpɔŋ, Saul otim mbon oro esin ke udim ita: ndien mmɔ eduk ke ufɔt nna ke efen usen-ubɔk, ekewot Ammon tutu utin ofiop: ndien edikem, mmɔ eke esuhɔde esuana, owo mmɔ iba inyuŋ isaŋake ɔtɔ kiet.

¹²Ndien kpukpru owo edɔhɔ Samuel, ete, Edi anie owo ɔkɔdɔhɔ ete, Saul okuda ubɔŋ nnyin? Mbufo enɔ owo oro man nnyin iwot mmɔ.

¹³Edi Saul ɔdɔhɔ ete, Owo idikpaha mfin emi koro mfin emi Jehovah amanam erinyaŋa ke Israel.

¹⁴Ndien Samuel ɔdɔhɔ kpukpru owo, ete, Mbufo edi, nnyin ika Gilgal, inyuŋ itɔŋɔ ntak inim edidem do. Ndien kpukpru owo eka Gilgal;

¹⁵ndien do ke mmɔ enim Saul ke edidem ke iso Jehovah ke Gilgal; ndien do ke mmɔ ewa uwa emem ke iso Jehovah; Saul ye kpukpru owo Israel enyuŋ edara do eti-eti.