Read efik 1 SAMUEL 17 Bible Online

1 SAMUEL 17 - efik bible

1 SAMUEL 17

¹EKEM mme Philistine ebon mbon-ekɔŋ mmɔ, ete eka ekɔŋ, ndien mmɔ esop idem ke Socoh emi enyenede Judah, enyuŋ enam nna ke ufɔt Socoh ye Azekah, ye Ephesdammim.

²Ndien Saul ye nditɔ Israel esop idem, enyuŋ enam nna-ekɔŋ ke itihere Elah, ndien mmɔ etim udim-ekɔŋ man eŋwana ekɔŋ ye mme Philistine.

³Ndien mme Philistine eda ke obot ke edem oko, Israel enyuŋ eda ke obot ke edem emi: ebedeŋ enyuŋ esine ke ufɔt.

⁴Ndien esine-ufɔt kiet ekere Goliath owo Gath, oto ke nna-ekɔŋ mme Philistine edi, idaha esie edi ibio-idomo-okuk itiokiet ye ubɔk kiet.

⁵Enye onyuŋ ayara ndun okpoho ke ibuot, onyuŋ esine ɔfɔŋ-idem ekɔŋ; udobi ɔfɔŋ-idem oro onyuŋ edi tɔsin shekel okpoho ition.

⁶Enye onyuŋ esine ŋkpɔ-ukot okpoho ke ukot, ye onyim okpoho ke ufɔt afara esie.

⁷Eto eduat esie onyuŋ ebiet eto mme ɔdɔk-ɔfɔŋ; idem eduat esie onyuŋ edi shekel ukwak ikie itiokiet: andibiom otu-ekɔŋ onyuŋ ebem enye iso.

⁸Ndien enye ada do ofiori mbon-ekɔŋ Israel, onyuŋ ɔdɔhɔ mmɔ, ete, Ke didie ke mbufo ewɔŋɔ nditim udim-ekɔŋ? Nte ami ndige Philistine? Nte mbufo idige ikɔt Saul? Mbufo esio owo kiet ke idem mbufo, man enye ɔsuhɔre etiene mi,

⁹Enye ama ekeme ndiŋwana ye ami, ama onyuŋ owot mi, nnyin iyedi ifin mbufo; edi ami mma ŋkem ubɔk ye enye, mma nnyuŋ ŋwot enye, mbufo eyedi ndien ifin nnyin, enyuŋ enam ŋkpɔ enɔ nnyin.

¹⁰Ndien Philistine oro ɔdɔhɔ ete, Ami nsin mbon-ekɔŋ mme Israel ke ndek mfin emi: mbufo enɔ mi owo man nnyin iwana ye enye.

¹¹Ndien adaŋemi Saul ye ofuri Israel ekopde uyo Philistine oro, nsia oyomo mmɔ, mmɔ enyuŋ edige eti-eti.

¹²Ndien David edi eyen Ephrathite emi otode ke Bethlehem Judah, emi enyiŋ esie ekerede Jesse: ndien enye enyene nditɔ iren itiaita; enye oro onyuŋ asaŋa ke otu owo nte mbiowo ke eyo Saul.

¹³Ndien ikpɔ nditɔ Jesse ita etiene Saul eka ekɔŋ, enyiŋ nditɔ-iren esie ita oro ekade ekɔŋ enyuŋ ekere Eliab, akpan, ye Abinadab, udɔ esie, ye Shammah udɔ-udɔ.

¹⁴Edi David edi eyenɔwɔŋ: ndien ikpɔ nditɔ ita oro etiene Saul.

¹⁵David ama onyuŋ ɔkpɔŋ Saul afiak ke Bethlehem ndibɔk ŋkpri ufene ete esie.

¹⁶Ntre ke Philistine oro asaŋa ekpere ke usiere ye ke mbubreyo, edida ke ofuri usen aba.

¹⁷Ekem Jesse ɔdɔhɔ David eyen esie ete, Mbɔk da ephah edifɔp ibokpot emi, ye uyo duop emi sɔk nditɔ-usɔ, nyuŋ fehe ka ke nna-ekɔŋ tiene nditɔ-usɔ;

¹⁸nyuŋ da mbak cheese duop emi sɔk etubom tɔsin mmɔ, nyuŋ se nte nditɔ-usɔ etiede, nyuŋ bɔ mmɔ ŋkpɔ ubiɔŋ mmɔ.

¹⁹Ndien Saul, ye mmɔ, ye kpukpru nditɔ Israel edu ke itihere Elah, ke eŋwana ekɔŋ ye mme Philistine.

²⁰Ndien David abak edemere ke usenubɔk, ayak ŋkpri ufene ɔnɔ owo eke ekpemede, ndien emen ŋkpɔ oro asaŋa, nte Jesse ɔkɔdɔhɔde enye: ndien ke ini enye osimde ebiet ukpat-ŋkpɔ, mbon ekɔŋ ewɔŋɔ eduk ke mme udim,enyuŋ esio mkpo ekɔŋ.

²¹Ntre ke Israel ye mme Philistine etim udim-ekɔŋ, udim ɔbiɔŋɔ udim.

²²Ndien David obiomore mbiomo ke idem ɔkpɔŋ ɔnɔ andikpeme ŋkpɔ, ndien efehe aka itie-ekɔŋ, aka ɔkɔkɔm nditɔ-ete esie.

²³Ndien ke ini enye enemede nneme ye mmɔ, sese, esine-ufɔt oro, ekere Goliath, Philistine emi otode ke Gath, oto ke udim mme Philistine ɔdɔk edi edidɔhɔ kpasuk ikɔ oro: ndien David okop.

²⁴Ndien ke ini kpukpru nditɔ Israel ekutde owo oro, mmɔ efehe ekpɔŋ enye, enyuŋ edige eti-eti.

²⁵Ndien eyen Israel ɔdɔhɔ ete, Nte mbufo emekut owo emi ɔdɔkde edi? Kakpan ke enye ɔdɔk edi ndisin Israel ke ndek: ndien ama ekem, edieke owo ediwotde enye, edidem eyeda ediwak inyene ɔdiɔŋ enye, onyuŋ ɔnɔ enye adiaha esie ɔdɔ, onyuŋ ayak ufɔk ete esie ebɔhɔ utomo ke Israel.

²⁶Ndien David ɔdɔhɔ mmɔ emi edade ye enye, ete, Edinam nso enɔ owo eke ediwotde Philistine emi, onyuŋ odorore Israel but emi? Koro edut Philistine emi edi anie owo, eke enye ekpesinde mbon-ekɔŋ Abasi uwem ke ndek?

²⁷Ndien mmɔ oro edɔhɔ enye ntre, ete, Ntem ke edinam enɔ owo eke ediwotde enye.

²⁸Ndien Eliab akpan ete esie okop nte enye ɔdɔhɔde ye mmɔ oro; ndien Eliab ayat esit ye David, onyuŋ ɔdɔhɔ ete, Nsinam afo ɔsuhɔrede edi mi? Afo okonyuŋ ɔkpɔŋ mkpata ŋkpri ufene oro ke wilderness ɔnɔ anie? Ami mmɔ-fiɔk iseri fo, ye idiɔk esit fo; koro afo ɔsuhɔrede edi ekɔŋ ndikut.

²⁹Ndien David ɔdɔhɔ ete, Nso ke ami nnam, ndien? Nte idige ikɔ edi oro?

³⁰Ndien enye ɔwɔŋɔre ɔkpɔŋ enye ese owo efen, onyuŋ ɔdɔhɔ kpasuk ntre: ndien mmɔ ebɔrɔ enye ikɔ nte akpa ikɔ.

³¹Ndien adaŋemi mmɔ ekopde ikɔ oro David ɔkɔdɔhɔde, mmɔ emen eketiŋ ke iso Saul: ndien enye ɔdɔŋ ekeda enye edi.

³²Ndien David ɔdɔhɔ Saul, ete, Kuyak esit ɔduɔ baba owo kiet abaŋa enye; owo fo eyeka akaŋwana ye Philistine emi.

³³Ndien Saul ɔdɔhɔ David, ete, Afo, udukemeke ndika ŋkaŋwana ye Philistine emi: koro afo edide eyenɔwɔŋ, edi enye edi owo ekɔŋ toto ke ini uyen esie.

³⁴Ndien David ɔdɔhɔ Saul, ete, Owo fo ekedi andibɔk ŋkpri ufene ete esie, ndien lion ye bear edi edimum eyen-erɔŋ ke otu:

³⁵ndien ŋwɔrɔ mbine enye, nnyuŋ ŋwot enye, nnyuŋ nsio enye ke inua esie mfep: ndien ke ini enye adahade ada, ete iŋwana ye ami, mmum enye ntaŋ-ebek, nyibi enye ŋwot.

³⁶Owo fo okowot lion ye bear; ndien edut Philistine emi eyebiet mmɔ kiet, koro enye emesin mbon-ekɔŋ Abasi uwem ke ndek.

³⁷David onyuŋ ɔdɔhɔ ete, Jehovah emi okosiode mi ke ubɔk lion, ye ke ubɔk bear, eyesio mi ke ubɔk Philistine emi. Ndien Saul ɔdɔhɔ David, ete, Ka; Jehovah onyuŋ osuk odu ye afo.

³⁸Ndien Saul ada ekura esie esine David ke idem, onyuŋ ayara enye ndun okpoho ke ibuot, onyuŋ esine enye ɔfɔŋ-idem ekɔŋ ukwak.

³⁹Ndien David ɔbɔbɔ ofut esie ke enyɔŋ ekura esie, ndien ɔtɔŋɔ ndisaŋa: koro enye mika-idomoke. Ndien David ɔdɔhɔ Saul, ete, Ndikwe nte ndade mmɔ emi nsaŋa; koro mmeŋkenam ndomoke. Ndien David osio mmɔ ke idem esie efep:

⁴⁰Ndien enye emen eto esie akama ke ubɔk, onyuŋ asat ndɔnɔ itiat ition ke idim ke idemesie esin ke ŋkpɔ ɔbɔk-erɔŋ emi enye akamade, kpa ke ekpat; ye utop-itiat esie ke ubɔk; ndien enye asaŋa ekpere Philistine oro.

⁴¹Philistine oro onyuŋ asaŋa ekpere David; owo eke obiomde otu-ekɔŋ esie onyuŋ ebem enye iso.

⁴²Ndien adaŋemi Philistine oro etiŋde enyin okut David, enye ese enye ke mbio; koro enye edide akparawa. Ndien enye oyibe onyuŋ eye iso.

⁴³Ndien Philistine ɔdɔhɔ David, ete, Nte ami ndi ebua, emi afo adade eto etiene mi? Ndien Philistine otomo abasi esie osuŋi David.

⁴⁴Philistine onyuŋ ɔdɔhɔ David, ete, Diken, ndien nyeda obukkidem fo nnɔ mme inuen enyɔŋ, ye mme unam ikɔt.

⁴⁵Ndien David ɔdɔhɔ Philistine, ete, Afo ada ofut, ye eduat, ye onyim etiene mi: edi ami nda enyiŋ Jehovah mme udim, Abasi mbon-ekɔŋ; Israel, emi afo esinde ke ndek, ntiene fi.

⁴⁶Mfin emi Jehovah eyeda fi esin mi ke ubɔk; ndien nyewot fi, nnyuŋ mbigi fi ibuot; nyenyuŋ nda okpo mbon ekɔŋ mme Philistine mfin emi, nnɔ mme inuen enyɔŋ, ye mme unam ikɔt; man ofuri ererimbot efiɔk ete ke Israel enyene Abasi.

⁴⁷Ndien ofuri esop emi eyefiɔk ete ke Jehovah idaha ofut, inyuŋ idaha eduat, iŋwana: koro ekɔŋ enyenede Jehovah, ndien enye eyeda mbufo esin nnyin ke ubɔk.

⁴⁸Edikem adaŋemi Philistine oro adahade ke enyɔŋ asaŋa ekpere, aka ndisobo ye David, David ɔsɔp ukot aka edem udim-ekɔŋ ndisobo ye Philistine oro.

⁴⁹Ndien David esin ubɔk esie ke ekpat, osio itiat kiet ke esit, ndien otop, ɔtɔ Philistine ke ɔkpɔ iso esie; ndien itiat oro oduk enye ke ɔkpɔ-iso: enye onyuŋ ɔduɔ okubi iso esie ke isɔŋ.

⁵⁰Ntre ke David ada utop-itiat ye itiat akan Philistine oro, onyuŋ ɔtɔ Philistine owot; edi ofut iduhe David ke ubɔk.

⁵¹Ndien David efehe aka akada Philistine ke idem, omum ofut esie osio ke efɔk, ndien owot enye, onyuŋ ada ofut ebigi enye ibuot. Ndien adaŋemi mme Philistine ekutde ete ke owo uko mmimɔ akpa, mmɔ efeŋe.

⁵²Ndien nditɔ Israel ye Judah edaha ke enyɔŋ ekpɔk ukube, enyuŋ ebine mme Philistine, tutu esim ke itihere ye ke inua-otop Ekron. Ndien mme Philistine emi mmɔ ewotde eduɔŋɔ ke usuŋ Shaaraim, tutu osim ke Gath ye Ekron.

⁵³Ndien nditɔ Israel eto ndibine mme Philistine efiak edem, ekebume nna-ekɔŋ mmɔ.

⁵⁴David onyuŋ emen ibuot Philistine, ada enye edi ke Jerusalem; edi ada ŋkpɔ-ekɔŋ esie esin ke tent esie.

⁵⁵Ndien adaŋemi Saul okutde David nte enye ɔwɔrɔde aka ekɔŋ ye Philistine oro, enye ɔdɔhɔ Abner, etubom mbon-ekɔŋ, ete, Abner, akparawa emi edi eyen anie owo? Ndien Abner ɔbɔrɔ ete, Ma uwem fo, O edidem, mfiɔkke.

⁵⁶Ndien edidem ɔdɔhɔ ete, Afo bup owo emi akparawa emi edide eyen esie.

⁵⁷Ekem ke David ama okoto ndiwot Philistine, Abner ada enye edi ke iso Saul ye ibuot Philistine ke ubɔk esie.

⁵⁸Ndien Saul obup enye, ete, Akparawa, afo edi eyen anie owo? Ndien David ɔbɔrɔ ete, Ami ndi eyen owo fo Jesse a-Bethlehem.