Read efik 1 SAMUEL 19 Bible Online

1 SAMUEL 19 - efik bible

1 SAMUEL 19

¹EKEM Saul ɔdɔhɔ Jonathan eyen esie, ye kpukpru ikɔt esie, ete ewot David.

²Edi Jonathan eyen Saul ama David eti-eti. Jonathan onyuŋ asian David, ete, Saul ete mi ɔmɔŋ oyom fi ndiwot: ka ketie ke ndidibe ebiet, ke dibe.

³Ndien ami nyewɔrɔ ŋka ŋkada ke ŋkaŋ ete mi ke iŋwaŋ emi afo odude do, nyenyuŋ nneme nneme ye ete mi mbaŋa fi; ndien nyemen se ndikutde ntiŋ nnɔ fi.

⁴Ndien Jonathan etiŋ eti ikɔ ye Saul ete esie abaŋa David, onyuŋ ɔdɔhɔ enye, ete, Yak edidem okunam idiɔk ido ye owo esie, David: koro enye mikanamke idiɔk ido ye afo, koro se enye akanamde onyuŋ ɔfɔfɔn ye afo eti-eti:

⁵ndien enye ekesin uwem esie ke ubɔk esie okowot Philistine oro, Jehovah okonyuŋ anam akamba erinyaŋa ɔnɔ ofuri Israel; afo ama okut, onyuŋ adat esit: nsinam ndien afo oyomde ndinam idiɔk ye iyip owo emi miduehe, ke ndiwot David ke ikpikpu?

⁶Ndien Saul okop uyo Jonathan: Saul onyuŋ ɔŋwɔŋɔ ete, Ma uwem Jehovah, enye idikpaha.

⁷Ndien Jonathan okot David, Jonathan onyuŋ emen kpukpru ikɔ emi etiŋ ɔnɔ enye. Jonathan onyuŋ ada David ɔsɔk Saul, enye onyuŋ odu ke iso esie, kpa nte akpa.

⁸Ndien ekɔŋ ɔtɔŋɔ ntak etibe: ndien David ɔwɔrɔ aka ekɔŋ ye mme Philistine, onyuŋ owot mmɔ ata ediwak; ndien mmɔ efeŋe ke iso esie.

⁹Edikem idiɔk spirit oto Jehovah ediduk Saul ke idem, enye onyuŋ etie ke ufɔk esiemɔ ye eduat esie ke ubɔk: David onyuŋ ebre harp ke ubɔk.

¹⁰Ndien Saul oyom ndida eduat esie ŋkim David ndian ke ibibene; edi enye efep ɔbɔhɔ ke iso Saul, ndien enye okim ibibene ke eduat: edi David efehe ke okoneyo oro ɔbɔhɔ.

¹¹Ndien Saul ɔdɔŋ mme isuŋutom ke ufɔk David, ete ekekpeme ewot enye ke usenubɔk: ndien Michal aŋwan David asian enye ete, Ke afo munyaŋake uwem fo ke okoneyo emi, mkpɔŋ afo eyekpa.

¹²Ndien Michal etie ke window ɔsuhɔre David: ndien enye efehe, aka, ɔbɔhɔ.

¹³Ndien Michal ada owo eto, onim ke bed, onyuŋ onim ŋkpɔ idet ebot ke udoribuot esie, ndien ada ɔfɔŋ ofuk enye.

¹⁴Ndien ke ini Saul ɔdɔŋde mme isuŋutom, ete ekemum David, enye (Michal) ɔdɔhɔ ete, Enye ke ɔdɔŋɔ.

¹⁵Ndien Saul ɔdɔŋ mme isuŋ oro ekese David, ete, Mbufo emen enye ke bed edɔk esɔk mi,man ŋwot enye.

¹⁶Ndien ke adaŋemi mme isuŋ oro edukde, sese, owo eto odu ke bed, ye ŋkpɔ idet ebot ke udoribuot esie.

¹⁷Ndien Saul ɔdɔhɔ Michal, ete, Nsinam afo akabiaŋade mi ntre, onyuŋ ayak usua mi ɔbɔhɔ? Ndien Michal ɔbɔrɔ Saul, ete, enye ɔkɔdɔhɔ mi, ete, Yak mbɔhɔ; nnam didie ŋwot fi?

¹⁸Ntre ke David efehe, ɔbɔhɔ, aka ke ɔtɔ Samuel ke Ramah, onyuŋ asian enye kpukpru se Saul akanamde enye. Ndien enye ye Samuel eka ekedaŋ ke Naioth.

¹⁹Ekem mmɔ etiŋ enɔ Saul, ete, Sese, David odu ke Naioth ke Ramah.

²⁰Ndien Saul ɔdɔŋ mme isuŋutom, ete ekemum David: edi ke ini mmɔ ekutde udim mme prophet, nte enamde prophecy, nte Samuel onyuŋ adade ke etubom mmɔ, spirit Abasi oduk mme isuŋutom Saul ke idem, ndien mmɔ enyuŋ enam prophecy.

²¹Ndien adaŋemi mmɔ etiŋde enɔ Saul, enye ɔdɔŋ mme isuŋutom eŋwen, ndien mmɔ ŋko enyuŋ enam prophecy. Ndien Saul ɔtɔŋɔ ntak ɔdɔŋ mme isuŋutom eŋwen ɔyɔhɔ ikata, ndien mmɔ enyuŋ etiŋ prophecy ŋko-ŋko.

²²Ekem enye aka Ramah ke idemesie, ndien adaŋemi enye osimde akamba obube mmɔŋ kiet emi odude ke Secu, enye obup, ete, Enye Samuel ye David? Ndien owo ɔbɔrɔ ete, Sese, mmɔ edu ke Naioth ke Ramah.

²³Ekem adaŋemi enye otode do aka ke Naioth ke Ramah, spirit Abasi onyuŋ oduk enye ke idem, enye onyuŋ asaŋa anam prophecy, tutu osim ke Naioth ke Ramah.

²⁴Enye onyuŋ osio ɔfɔŋ-idem esie ŋko, onyuŋ anam prophecy ŋko-ŋko ke iso Samuel, onyuŋ ɔduɔ ke isɔŋ ana iferi ke ofuri uwemeyo oro, ye ke ofuri okoneyo oro. Mmɔdo edɔhɔde ete, Emi-e? Saul onyuŋ odu ke otu mme prophet?