Read efik 1 SAMUEL 23 Bible Online

1 SAMUEL 23 - efik bible

1 SAMUEL 23

¹EKEM mmɔ esian David, ete ke mme Philistine eŋwana ekɔŋ ye Keilah, enyuŋ ebume mme ebiet ubek-ibokpot.

²Ndien David obup Jehovah, ete, Nte ndika ŋkasuan mme Philistine emi? Ndien Jehovah ɔbɔrɔ David, ete, Ka kasuan mme Philistine, nyuŋ nyaŋa Keilah.

³Edi ikɔt David edɔhɔ enye, ete, Sese, ndik ke anam nnyin mi ke Judah; ŋwaŋwa edi nso ke nnyin idikade ke Keilah ikaŋwana ekɔŋ ye mme udim-ekɔŋ mme Philistine.

⁴Ndien David ɔtɔŋɔ ntak obup Jehovah. Ndien Jehovah ɔbɔrɔ enye, ete, Daha ke enyɔŋ suhɔre ke Keilah; koro ami nyeda mme Philistine nsin fi ke ubɔk.

⁵Ndien David ye ikɔt esie eka ke Keilah eke ŋwana ekɔŋ ye mme Philistine, ndien mmɔ etaŋ ufene mmɔ efep, enyuŋ ewot mmɔ ata ediwak owo. Ntem David anyaŋa mme andiduŋ Keilah.

⁶Ndien ke ini Abiathar eyen Ahimelech ɔkɔbɔhɔde, efehe etiene David ke Keilah, ephod kiet ɔsuhɔre ke ubɔk esie.

⁷Ekem mmɔ etiŋ enɔ Saul, ete, David aka ke Keilah. Ndien Saul ɔdɔhɔ ete, Abasi amayak enye esin mi ke ubɔk: koro ekukde enye esin, koro enye odukde ke obio emi enyenede itim ye eto usin-usuŋ.

⁸Ekem Saul owuk kpukpru owo, ete edi ekɔŋ, man esuhɔre eka Keilah, ekekan David ye ikɔt esie ekuk.

⁹Ekem David edifiɔk ete ke Saul ɔmɔŋ aduak imɔ idiɔk-ŋkpɔ ndinam: ndien enye ɔdɔhɔ Abiathar oku, ete, Da ephod di.

¹⁰Ndien David ɔdɔhɔ ete, O Jehovah Abasi Israel, owo fo omokop ete ke Saul oyom ndidi Keilah ndibiat obio mbaŋa mi.

¹¹Nte mme andinyene Keilah eyeda mi esin enye ke ubɔk? Nte Saul eyesuhɔre, nte owo fo okokopde? O Jehovah Abasi Israel, sian owo fo, mbɔk. Ndien Jehovah ɔdɔhɔ ete, Enye eyesuhɔre.

¹²David onyuŋ obup ete, Nte mme andinyene Keilah eyeda mi ye ikɔt mi esin Saul ke ubɔk? Ndien Jehovah ɔdɔhɔ ete, Eyesin.

¹³Ndien David ye ikɔt esie, owo ikie itiokiet edaŋa, eto ke Keilah ewɔŋɔ, enyuŋ eka edem emi mmɔ eyomde ndika. Ndien mmɔ ekesian Saul ete ke David ama oto ke Keilah efehe ɔbɔhɔ; ndien enye etre ndiwɔrɔ ŋka.

¹⁴Ndien David oduŋ ke wilderness ke mkpɔsɔŋ ebiet, onyuŋ oduŋ ke obot ke wilderness Ziph. Saul onyuŋ oyom enye kpukpru usen, edi Abasi idaha enye isin enye ke ubɔk.

¹⁵Ndien David okut ete ke Saul ɔmɔwɔrɔ edi ndiyom uwem imɔ: David onyuŋ odu ke akai kiet ke wilderness Ziph.

¹⁶Ekem Jonathan eyen Saul adaha ke enyɔŋ, aka okosim David ke akai, onyuŋ ɔsɔŋɔ enye ubɔk ke Abasi.

¹⁷Enye onyuŋ ɔdɔhɔ enye, ete, Kufehe ndik: koro ubɔk Saul ete mi midisimke fi; afo eyenyuŋ akabare edi edidem Israel, ami nyenyuŋ ndi andidiana fi; ete mi Saul omonyuŋ ɔfiɔk ntre.

¹⁸Ndien mmɔ mbiba ediomi ediomi ke iso Jehovah; ndien David etie ke akai oro, Jonathan onyuŋ ɔnyɔŋ ke ufɔk esie.

¹⁹Ekem mbio-obio Ziph edɔk eka ke ɔtɔ Saul ke Gibeah, ete, Nte David idibeke ye nnyin ke mkpɔsɔŋ ebiet ke akai, ke obot Hachilah, emi odude ke edem usuk Jeshimon?

²⁰Suhɔre, ndien, O edidem, kpa nte ofuri esit fo amade ndisuhɔre; ndien nnyin inyene ndida enye nsin edidem ke ubɔk.

²¹Ndien Saul ɔdɔhɔ ete, Jehovah osuk ɔdiɔŋ mbufo: koro mbufo emenyene esit mbɔm ye ami.

²²Mbɔk, mbufo ekam eka ekesin kaŋa ubɔk efiɔk, enyuŋ ese ebiet emi ikpat esie asaŋade, ye owo emi okokutde enye do: koro edɔhɔde ete ke enye akari ŋkari eti-eti.

²³Mbufo enyuŋ ese, enyuŋ efiɔk kpukpru ebiet-udibe emi enye odibede ke esit, enyuŋ eda akpanikɔ efiak editiŋ enɔ mi, ndien nyetiene mbufo ŋka: ndien, ama ekem, edieke enye odude ke isɔŋ, nyesaŋa nduŋɔ enye ke otu kpukpru mme tɔsin Judah.

²⁴Ndien mmɔ edaha ke enyɔŋ, ebem Saul iso eka Ziph. Ndien David ye ikɔt esie edu ke wilderness Maon, ke una-isɔŋ ke edem usuk Jerusalem.

²⁵Ndien Saul ye ikɔt esie eka ekeyom enye. Ekem mmɔ etiŋ enɔ David: ndien enye ɔsuhɔre aka ke akamba itiat kiet, onyuŋ etie ke wilderness Maon. Ndien adaŋemi Saul okopde, enye ebine David ke wilderness Maon.

²⁶Ekem Saul asaŋa ke edem obot emi; David ye ikɔt esie enyuŋ esaŋa ke edem obot eken: ndien David ɔsɔp itɔk, ete ibɔhɔ Saul; Saul ye ikɔt esie enyuŋ ekan David ye ikɔt esie ekuk, ete imum mmɔ.

²⁷Ekem isuŋutom edisim Saul, ete, Wawara di; koro mme Philistine ema ebumere eduk ke edem nnyin.

²⁸Ndien Saul etre ndibene David, onyuŋ afiak edem aka ɔkɔbiɔŋɔ mme Philistine: mmɔdo esiode ebiet oro enyiŋ Sela-hammmahlekoth (Itiat eribahare).

²⁹Ndien David oto do ɔdɔk eketie ke mkpɔsɔŋ ebiet ke En-gedi.