Read efik 1 SAMUEL 27 Bible Online

1 SAMUEL 27 - efik bible

1 SAMUEL 27

¹EKEM David ɔdɔhɔ ke esit esie, ete, Usen kiet, ndien, ubɔk Saul eyesobo mi: ŋkwe ŋkpɔ eke ɔfɔnde mi, edi nyebɔhɔ ŋka edem mme Philistine; ndien Saul eyetre ndiyom mi aba ke ofuri adaŋa Israel: ntre ke ndibɔhɔ enye ke ubɔk. Ndien David adaha ke enyɔŋ,

²ye owo ikie itiokiet oro edude ye enye, asaŋa ebe aka ke ɔtɔ Achish, eyen Maoch, edidem Gath.

³Ndien David ye ikɔt esie eduŋ ke Achish ke Gath, kpukpru owo ye ufɔk mmɔ, David ye iban esie mbiba, Ahinoam ŋwan a Jezreel, ye Abigail aŋwan Nabal Carmelite.

⁴Ekem mmɔ esian Saul, ete ke David ama efehe aka Gath: ndien enye iyomke aba enye.

⁵Ekem David ɔdɔhɔ Achish, ete, Edieke afo amade mi, yak enɔ mi ebiet ke obio iŋwaŋ kiet, man nduŋ do: koro owo fo anam didie oduŋ ye afo ke obio ɔbɔŋ?

⁶Ndien Achish ɔnɔ enye Ziklag ke usen oro: mmɔdo Ziglag enyenede ndidem Judah tutu osim mfin emi.

⁷Ndien ibat usen emi David eketiede ke edem mme Philistine osim isua kiet ye ɔfiɔŋ inaŋ.

⁸Ekem David ɔdɔk ye ikɔt esie, aka akaŋwana ekɔŋ ye mme Geshurite, ye mme Girzite, ye mme Amalekite: koro mmɔ oro ekeduŋde ke edem oro ke ini eset, nte afo akade Shur, tutu osim ke isɔŋ Egypt.

⁹David onyuŋ asuan idut oro, inyuŋ inimke baba eren, ye ŋwan uwem, enye onyuŋ ataŋ ŋkpri ufene, ye mme enaŋ, ye mme ass, ye mme camel, ye edisine-ŋkpɔ, onyuŋ afiak ɔnyɔŋ edi ke ɔtɔ Achish.

¹⁰Ndien Achish obup ete, Ŋkɔm mbufo itoho ekɔŋ mfin? Ndien David ɔbɔrɔ, ete, Nnyin imeka ekɔŋ ke edem usuk Judah, ye ke edem usuk Jerahmeelite, ye ke edem usuk mme Kenite.

¹¹Ndien David inimke baba eren uwem, inyuŋ inimke baba ŋwan eke adade ikɔ edi ke Gath, ete, Mbak mmɔ editiŋ ebaŋa nnyin, ete, Ntem ke David anam. Ndien ntem ke enye akanam ido ke ofuri ini emi enye oduŋde ke isɔŋ mme Philistine

¹²Ndien Achish onim uyo David ke akpanikɔ, ete, Enye amanam oruk esie Israel esua enye eti-eti; mmɔdo enye edidide ofin mi ke nsinsi.