Read efik 1 SAMUEL 28 Bible Online

1 SAMUEL 28 - efik bible

1 SAMUEL 28

¹EDIKEM ke ini oro mme Philistine ebon mbon-ekɔŋ mmɔ, ete iwɔŋɔ ika ekɔŋ ye Israel. Ndien Achish ɔdɔhɔ David, ete, Tim fiɔk ete ke afo ye ikɔt fo eyewɔrɔ ye ami ke otu mbon-ekɔŋ.

²Ndien David ɔbɔrɔ Achish, ete, Mmɔdo afo eyefiɔk se owo fo edinamde. Ndien Achish ɔdɔhɔ David, ete, Mmɔdo nyenim fi ke andikpeme ibuot mi kpukpru ini.

³Ndien Samuel ama akakpa, ofuri Israel ema enyuŋ etuaŋa enye, enyuŋ ebuk enye ke Ramah, ke obio esie. Saul ama okonyuŋ ebin mmɔ eke enyenede nsaŋa ekpo, ye mbia-idiɔŋ, ke isɔŋ efep.

⁴Ekem, mme Philistine ebono edi ndinam nna-ekɔŋ ke Shunem: Saul onyuŋ obon ofuri Israel ɔtɔ kiet, mmɔ enyuŋ enam nna-ekɔŋ ke Gilboa.

⁵Ndien adaŋemi Saul okutde nna-ekɔŋ mme Philistine, enye edikhe, nsia onyuŋ oyomo enye eti-eti.

⁶Ndien adaŋemi Saul obupde Jehovah, Jehovah ibɔrɔke enye ke ndap, ye ke Urim, ye ke mme prophet.

⁷Ndien Saul ɔdɔhɔ ikɔt esie, ete, Mbufo eyom ŋwan eke enyenede nsaŋa ekpo, enɔ mi, man ŋka ke ɔtɔ esie ŋkobup enye. Ndien ikɔt esie edɔhɔ enye, ete, Sese, ŋwan kiet emi enyenede nsaŋa ekpo odu ke En-dor.

⁸Ndien Saul oforo owo efen, onyuŋ esine edisine-ŋkpɔ efen, onyuŋ ada owo iba aka, ndien mmɔ esim ɔtɔ ŋwan oro ke okoneyo: ndien enye ɔdɔhɔ ete, Mbɔk, da nsaŋa ekpo bre ɔnɔ mi, nyuŋ nam owo eke ndidɔhɔde fi ɔdɔk nɔ mi.

⁹Ndien ŋwan oro ɔdɔhɔ enye, ete, Sese, afo ɔmɔfiɔk se Saul akanamde, nte enye okosibede mme nsaŋa ekpo, ye mbia-idiɔŋ ke isɔŋ efep: afo anam didie, ndien, ɔkɔk afia ɔnɔ uwem mi ete owot mi?

¹⁰Ndien Saul otomo Jehovah ɔnɔ enye, ete, Ma uwem Jehovah, ufen idisimke fi ibaŋa ikɔ emi.

¹¹Ndien ŋwan obup ete, Anie ke ndinam ɔdɔk nnɔ fi? Ndien enye ɔbɔrɔ ete, Nam Samuel ɔdɔk nɔ mi.

¹²Ekem, adaŋemi ŋwan oro okutde Samuel, enye ofiori ke ɔkpɔsɔŋ uyo: ndien ŋwan ɔdɔhɔ Saul, ete, Nsinam afo abiaŋade mi?

¹³Ŋkɔm afo edi Saul. Ndien edidem ɔbɔrɔ enye, ete, Kufehe: afo okut nso ŋkpɔ ndien? Ndien ŋwan oro ɔdɔhɔ Saul, ete, Mmokut ata akwa owo nte otode ke isɔŋ ɔdɔk.

¹⁴Ndien enye obup ŋwan, ete, Enye ebiet nso? Ndien ŋwan ɔdɔhɔ ete, Akani eren ke ɔdɔk, enye onyuŋ esine ekura ke idem. Ndien Saul ɔdiɔŋɔ ete ke edi Samuel. Ndien enye otuk iso esie ke isɔŋ, onyuŋ ɔnuhɔ.

¹⁵Ndien Samuel ɔdɔhɔ Saul, ete, Afo anam didie otimere mi ke edinam mi ndɔk ndi? Ndien Saul ɔbɔrɔ ete, Mmetie ke ata itie ukut: ndien mme Philistine ke eŋwana ekɔŋ ye ami, Abasi ama onyuŋ akabare ɔkpɔŋ mi, inyuŋ ibɔrɔke aba mi ke ubɔk mme prophet, ye ke ndap: mmɔdo ŋkotde fi, man afo eteme mi se ndinamde.

¹⁶Ndien Samuel ɔdɔhɔ ete, Nsinam afo obupde mi, sia Jehovah ama ɔkɔkpɔŋ fi, onyuŋ akabare edi asua fo?

¹⁷Jehovah omonyuŋ anam ɔnɔ idem esie kpa nte enye ɔkɔdɔhɔde ke inua mi: Jehovah omonyuŋ awabare fi itie edidem ke ubɔk ɔbɔ, ada, enye ɔnɔ mbɔhiduŋ fo, kpa David:

¹⁸koro afo mukokopke uyo Jehovah, mukonyuŋ unamke Amalek nte ekemde ke ifiopesit esie, mmɔdo Jehovah anamde fi ntem mfin emi.

¹⁹Jehovah eyenyuŋ ada Israel ŋko ye afo esin mme Philistine ke ubɔk: ndien mkpɔŋ afo ye nditɔ-iren fo eyedu ye ami: Jehovah eyenyuŋ ada mbon-ekɔŋ Israel esin mme Philistine ke ubɔk.

²⁰Ndien ndo-ndo oro Saul anyanare ɔduɔ ke isɔŋ, onyuŋ edikhe ikɔ Samuel eti-eti: odudu inyuŋ iduhe aba enye ke idem: koro enye mikadiaha ŋkpɔ ke ofuri uwemeyo, ye ke ofuri okoneyo.

²¹Ndien ŋwan oro etiene Saul, onyuŋ okut nte idem akpade enye eti-eti, ndien ŋwan ɔdɔhɔ enye, ete, Sese ofin aŋwan fo ama okop uyo fo, mma nnyuŋ nda uwem mi nsin fi ke ubɔk, nnyuŋ ŋkop ikɔ fo oro afo ɔkɔdɔhɔde mi.

²²Mbɔk, ndien, afo ŋko-ŋko nyuŋ kop uyo ofin aŋwan fo, nyuŋ yak nda udia esisit nnim fi ke iso; ndien dia, man idem ɔsɔŋ fi ke ini afo asaŋade ke usuŋ.

²³Edi enye esin, onyuŋ ɔdɔhɔ ete, Ndiaha. Edi ikɔt esie ye ŋwan oro eyire enye; ndien enye okop uyo mmɔ; ndien adaha ke enyɔŋ etie ke bed.

²⁴Ndien ŋwan oro enyene eyen enaŋ eke ekukde ke ufɔk ndien enye awara aka okowot enye, onyuŋ ada ndom obuen, asaŋ uyo,

²⁵isinke leaven; onyuŋ emen enye edi ke iso Saul, ye ikɔt esie; ndien mmɔ edia ŋkpɔ; ndien edaha ke enyɔŋ, enyɔŋɔ ke okoneyo oro.