Read efik 1 SAMUEL 3 Bible Online

1 SAMUEL 3 - efik bible

1 SAMUEL 3

¹NTRE ke eyen oro Samuel anam ŋkpɔ Jehovah ke iso Eli. Ikɔ Jehovah onyuŋ edi ŋkpɔ uto ke usen oro; ŋkukut iwakke wak.

²Edikem ke usen oro, Eli ana ke ɔtɔ esiemɔ, enyin esie enyuŋ etɔŋɔ ndikim, enye ikemeke ndikut ŋkpɔ;

³utuenikaŋ Abasi ika inyuŋ inimeke kaŋa, Samuel onyuŋ ana ke isɔŋ, ke iduŋ Jehovah emi ekebe Abasi odude do;

⁴ndien Jehovah okot Samuel: ndien enye ete, Se mi mi.

⁵Ndien enye efehe aka ke ɔtɔ Eli, onyuŋ ɔdɔhɔ ete, Se mi mi; ŋkɔm afo okokot mi. Ndien enye ɔdɔhɔ ete, Ŋkokotke; fiak ka nana.

⁶Ndien enye aka akana. Ndien Jehovah ɔtɔŋɔ ntak okot Samuel. Ndien Samuel adaha ke enyɔŋ aka ke ɔtɔ Eli, ɔkɔdɔhɔ ete, Se mi mi: ŋkɔm afo okokot mi. Ndien enye ɔbɔrɔ ete, Ŋkokotke, eyen mi; fiak ka kanana.

⁷Ndien Samuel ika-ifiɔkke kaŋa Jehovah, uyo Jehovah ika inyuŋ iyarakede kaŋa inɔ enye.

⁸Ndien Jehovah ɔtɔŋɔ ntak okot Samuel ɔyɔhɔ utim ikata. Ndien enye adaha ke enyɔŋ aka ke ɔtɔ Eli, ɔkɔdɔhɔ ete, Se mi mi ŋkɔm afo okokot mi. Ndien Eli ɔdiɔŋɔ ete ke Jehovah okokot eyen ɔwɔŋ oro.

⁹Ndien Eli ɔdɔhɔ Samuel, ete, Ka kanana: ndien ama ekem, edieke edikotde fi, bɔrɔ ndien, ete, O Jehovah, dɔhɔ; koro owo fo ɔmɔŋ okop. Ndien Samuel aka akana ke ɔtɔ esiemɔ.

¹⁰Ndien Jehovah edi edida, onyuŋ okot kpa nte eke akpa, ete, Samuel, Samuel. Ndien Samuel ɔbɔrɔ, ete, Dɔhɔ; koro owo fo ɔmɔŋ okop.

¹¹Ndien Jehovah ɔdɔhɔ Samuel, ete, Sese, ami mmɔŋ nnam ŋkpɔ kiet ke Israel, eke edinamde utɔŋ mbiba eduat kpukpru mmɔ eke ekopde enye.

¹²Ke usen oro nyenam Eli kpukpru se ŋkɔdɔhɔde mbaŋa ufɔk esie: mma ntɔŋɔ, nyenam mma.

¹³Ŋkɔm mma ntiŋ nnɔ enye, nte ke ami ndinam ikɔ ye ufɔk esie tutu amama, mbaŋa mme oburobut ido emi enye ɔfiɔkde: emi nditɔ esie esinde idem mmɔ edi ŋkpɔ isuŋi, ndien enye mikakpanke mmɔ.

¹⁴Mmɔdo ŋkɔŋwɔŋɔde mbaŋa ufɔk Eli, nte ke idikemeke ndida uwa ye inuakudia nsio isop oburobut ido ufɔk Eli ke nsinsi.

¹⁵Ndien Samuel ana ke isɔŋ tutu eyo esiere, ndien eberere itim ufɔk Jehovah: ndien ndik iyakke Samuel etiŋ ŋkukut emi ɔnɔ Eli.

¹⁶Ndien Eli okot Samuel, onyuŋ ɔdɔhɔ enye, ete, Samuel, eyen mi.

¹⁷Ndien enye ɔbɔrɔ ete, Se mi mi. Ndien enye obup enye ete, Enye eketiŋ nso ikɔ ye afo? Mbɔk, kudip mi. Abasi osuk anam ntre ye afo, onyuŋ ɔdɔdiɔŋ anam, edieke afo odipde mi ikɔ ekededi ke kpukpru ŋkpɔ oro enye ɔkɔdɔhɔde fi.

¹⁸Ndien Samuel emen kpukpru ikɔ oro etiŋ ɔnɔ enye, inyuŋ idipke enye baba kiet. Ndien enye ɔbɔrɔ ete, Ke edi Jehovah: yak enye anam se ifɔnde enye ke enyin.

¹⁹Ekem Samuel okpon, Jehovah onyuŋ odu ye enye, inyuŋ iyakke baba ikɔ esie kiet ɔduɔ ke isɔŋ.

²⁰Ekem ofuri Israel, ɔtɔŋɔde ke Dan tutu osim ke Beersheba, efiɔk ete ke ema enim Samuel ke prophet Jehovah.

²¹Ndien Jehovah ɔtɔŋɔ ntak owut mmɔ idem ke Shiloh: koro Jehovah ayararede idem ɔnɔ Samuel ke Shiloh ke uyo Jehovah.