Read efik 1 SAMUEL 6 Bible Online

1 SAMUEL 6 - efik bible

1 SAMUEL 6

¹NTRE ke ekebe Jehovah odu ke isɔŋ mme Philistine ke ofuri ɔfiɔŋ itiaba.

²Ekem mme Philistine ekot mme oku ye mbia idiɔŋ edi, ete, Nnyin idinam ekebe Jehovah nso ŋkpɔ? Mbufo eteme nnyin se ididade inɔ enye ɔnyɔŋ aka ke ebiet esie.

³Ndien mmɔ ebɔrɔ, ete, Edieke mbufo enamde ekebe Abasi Israel ɔnyɔŋ, ekunam enye ɔnyɔŋ ubɔk-ubɔk; ekutre ndinɔ ŋkpɔ usio-isop esɔk enye: ndien mbufo eyekop idem, enyuŋ efiɔk se ikanamde enye okudorore mbufo ubɔk.

⁴Ndien mmɔ ebup, ete, Nso ŋkpɔ ke nnyin idinɔ enye ke ŋkpɔ usio -isop? Ndien mmɔ ebɔrɔ ete, Akpasak o gold ition, ye usine o gold ition, ekem ke ibat mbɔŋ mme Philistine; koro nsobo kiet akanamde mbufo kpukpru ye mbɔŋ mbufo.

⁵Mbufo enam ndien mbiet akpasak mbufo, ye mbiet usine mbufo emi ebiatde isɔŋ; ntre ke mbufo edikpono Abasi Israel: mme enye eyesuk ubɔk esiemɔ odorore mbufo ke idem, ye ke idem mme abasi mbufo, ye ke isɔŋ mbufo.

⁶Ndien mbufo edinam didie esɔŋ esit mbufo kpa nte Egypt ye Pharaoh ekesɔŋde esit mmɔ? nte mmɔ ikasanake mbon oro iyak ke adaŋemi enye akanamde mkpɔsɔŋ ŋkpɔ ke otu mmɔ, ndien mmɔ enyɔŋɔ?

⁷Mbufo enam ndien obufa ukpat-ŋkpɔ kiet, enyuŋ eda uman enaŋ iba eke enɔde mmɔŋ-eba, eke mika ikɔŋɔke mmɔ ɔkpɔnɔ kaŋa, ndien etebe enaŋ oro edian ke ukpat ŋkpɔ, enyuŋ ebɔ mmɔ nditɔ mmɔ,

⁸ekenim ke ufɔk: ndien mbufo eda ekebe Jehovah edori ke ukpat ŋkpɔ, enyuŋ eda ekpri ekebe esin ŋkpɔ gold eke mbufo enɔde enye ke ŋkpɔ usio-isop, eda ediɔk ke ŋkaŋ esie; ndien esana enye eyak ɔnyɔŋ.

⁹Ndien mbufo ese, enye ama ɔdɔk ke usuŋ adaŋa esie aka Bethshemesh, edi enye akanam nnyin akamba idiɔk-ŋkpɔ emi: midige ntre, nnyin iyefiɔk ite ke idige ubɔk esie akamia nnyin; ke edi ŋkpɔ eke okokoide okoi anam nnyin.

¹⁰Ndien mbon oro enam ntem; ndien mmɔ eda uman enaŋ iba eke enɔde mmɔŋ-eba, etebe mmɔ edian ke ukpat-ŋkpɔ, enyuŋ ebaha nditɔ mmɔ ke ufɔk.

¹¹Ndien mmɔ edori ekebe Jehovah ke ukpatŋkpɔ, ye ekpri ekebe ye usine gold, ye mbiet akpasak mmɔ.

¹²Ndien enaŋ oro eneŋere eduk ke usuŋ emi akade usuŋ Bethshemesh; mmɔ esaŋa ke ɔkpɔusuŋ, esaŋa emai, iwahake ika nnasia, inyuŋ iwahake ika ufien; mbɔŋ mme Philistine enyuŋ etiene mmɔ ke edem tutu esim ke adaŋa Beth-shemesh.

¹³Ndien nditɔ Bethshemesh ke ekpeŋe wheat mmɔ ke itihere: ndien mmɔ emenere enyin mmɔ ekut ekebe, enyuŋ edat esit ndikut.

¹⁴Ekem ukpat ŋkpɔ oro oduk ke iŋwaŋ Joshua eyen Bethshemesh kiet, ndien atuak ada do, emi akamba itiat odude: ndien mmɔ eda ukpat ŋkpɔ oro esiak ifia, enyuŋ efɔp mme enaŋ ke edifɔp uwa enɔ Jehovah.

¹⁵Ndien mme Levite esuhɔre ekebe Jehovah, ye ekpri ekebe oro odude ye enye, emi ŋkpɔ gold edude enye ke esit, eda edori ke akamba itiat oro: ndien nditɔ Bethshemesh efɔp edifɔp uwa, enyuŋ ewa uwa emem enɔ Jehovah ke usen oro.

¹⁶Ndien adaŋemi mbɔŋ mme Philistine ition ekutde, mmɔ efiak ke Ekron ke usen oro.

¹⁷Ndien mme mmɔ emi edi mme akpasak o gold oro mme Philistine ekenɔde esɔk Jehovah, ke ŋkpɔ usio-isop; kiet eke Ashdod, kiet eke Gaza, kiet eke Ashkelon, kiet eke Gath, kiet eke Ekron;

¹⁸ye mme usine gold, ekem ke ibat kpukpru obio mme Philistine, eke mbɔŋ ition oro, ɔtɔŋɔde ke mme obio ibibene, tutu osim ke mme obio mbon iŋwaŋ. Ndien akamba itiat oro mmɔ ekedoride ekebe Jehovah ke esit edi ntiense tutu osim mfin emi, ke iŋwaŋ Joshua eyen Beth-shemesh.

¹⁹Ndien enye owot nditɔ Bethshemesh, koro mmɔ ekubɔrede ekebe Jehovah ese, enye owot owo ata ye duop (tɔsin owo aba ye duop) ke otu mbio oro; ndien kpukpru owo etuaŋa, koro Jehovah akamiade mmɔ akamba ufen.

²⁰Ndien nditɔ Beth-shemesh edɔhɔ ete, Anie ekeme ndida ke iso edisana Jehovah Abasi emi? Enye edinyuŋ ɔdɔk etiene mme anie ɔkpɔŋ nnyin?

²¹Ndien mmɔ edɔŋ mme isuŋutom ekedɔhɔ mme andiduŋ Kiriath-jearim, ete, Mme Philistine ema eyak ekebe Jehovah; mbufo esuhɔre edida enye edɔk ke ɔtɔ idem mbufo.