Read efik 1 SAMUEL 9 Bible Online

1 SAMUEL 9 - efik bible

1 SAMUEL 9

¹NDIEN eyen Benjamin kiet okodu ekere Kish, eyen Abiel, eyen Zeror, eyen Becorath, eyen Aphiah, eyen Benjamin, owo uko.

²Ndien enye enyene eyen kiet ekere Saul ata eti ye ediye akparawa; ndien owo eke eyede akan enye iduhe ke otu nditɔ Israel: kpukpru owo eda enye ke afara.

³Ekem mme ass Kish ete Saul esop. Ndien Kish ɔdɔhɔ Saul eyen esie, ete, Mbɔk, da akparawa kiet asaŋa ye afo, nyuŋ daha ke enyɔŋ, ka koyom mme ass.

⁴Ndien enye asaŋa ke obot Ephraim, ndien asaŋa ke isɔŋ Shalishah ebe, edi ikwe mmɔ: ndien mmɔ esaŋa ke isɔŋ Shaalim ebe, edi mmɔ iduhe: enye onyuŋ asaŋa ke isɔŋ Benjamin ebe, edi ikwe mmɔ.

⁵Ekem adaŋemi mmɔ esimde isɔŋ Zuph, Saul ɔdɔhɔ akparawa esie oro odude ye enye, ete, Nam nnyin ifiak; mbak ete mi editre ndikere mme ass, ndien nsia oyomo enye abaŋa nnyin.

⁶Ndien enye ɔbɔrɔ enye, ete, Mbɔk, sese owo Abasi mi ke obio emi, enye onyuŋ edi owo ukpono; baba ŋkpɔ kiet eke enye ɔdɔhɔde inyuŋ itreke ndisu: yak nnyin ikam ika do: ndusuk enye eyesian nnyin usuŋ nnyin eke nnyin ikpasaŋade.

⁷Ndien Saul ɔdɔhɔ owo esie, ete, Sese, nnyin ima ika, idida nso ŋkpɔ isɔk owo oro? koro uyo ke ekpat nnyin okurede, baba enɔ kiet eke nnyin ididade isɔk owo Abasi oro inyuŋ iduhe: nnyin inyene nso ŋkpɔ?

⁸Ndien owo oro ɔtɔŋɔ ntak ɔbɔrɔ Saul, ete, Sese, ɔyɔhɔ ubak shekel silver inaŋ mmɔ mi ke ubɔk mi: nyeda enye nnɔ owo Abasi oro, man enye owut nnyin usuŋ nnyin.

⁹Ke eyo oko ke Israel, owo ɔdɔhɔ ntem, adaŋemi enye akade ndibup Abasi ŋkpɔ, ete, Edi, nnyin ika ke ɔtɔ owo ŋkukut: koro owo emi ekerede prophet ke emi, akam ekere owo ŋkukut ke eyo oko.

¹⁰Ndien Saul ɔdɔhɔ owo esie, ete, Uyo fo ɔfɔn; di nnyin ika. Ndien mmɔ eka ke obio emi owo Abasi odude do.

¹¹Adaŋemi mmɔ edɔkde obot obio, mmɔ ekut nditɔ-iban nte ewɔŋɔde eka mmɔŋ ndikoi, enyuŋ ebup mmɔ, ete, Nte owo ŋkukut odu mi?

¹²Ndien mmɔ ebɔrɔ mmɔ, ete, Ih; sese, enye odu ke iso mbufo: mbufo esɔsɔp eka ndien, koro enye emedi ke obio mfin emi: koro mbio-obio ewade uwa mfin emi ke edikoŋ ebiet:

¹³nte mbufo edukde ke obio, eyekut enye ini kiet, ke enye mika-idɔkke kaŋa ke edikoŋ ebiet ndidia ŋkpɔ: koro mbio-obio midiaha ŋkpɔ tutu enye edi, koro enye eyediɔŋ uwa; ndien mmɔ emi ekotde edidia. Ekam edɔk, ndien; koro mbufo eyekut enye ke emi.

¹⁴Ndien mmɔ edɔk ke obio: ndien adaŋemi mmɔ esimde esit obio, sese, Samuel ɔwɔrɔ edisobo ye mmɔ, ke oyom ndidɔk ke edikoŋ ebiet.

¹⁵Ndien Jehovah ama ayarare ke utɔŋ Samuel edem mkpɔŋ, ndien Saul edidi,ete,

¹⁶Adaŋemi mkpɔŋ nyedɔŋ owo oto ke isɔŋ Benjamin etiene fi, ndien da aran yet enye nim ke etubom ikɔt mi Israel; ndien enye eyenyaŋa ikɔt mi osio mme Philistine ke ubɔk: koro mmese ikɔt mi, koro eseme mmɔ omosim mi.

¹⁷Ekem adaŋemi Samuel okutde Saul, Jehovah asian enye, ete, Se owo emi ŋkɔdɔhɔde fi! Edi enye edikara ikɔt mi.

¹⁸Ekem Saul osim Samuel ke inua-otop, onyuŋ ɔdɔhɔ ete, Mbɔk, wut mi ebiet emi ufɔk owo ŋkukut odude.

¹⁹Ndien Samuel ɔbɔrɔ Saul, ete, Ami ndi owo ŋkukut oro: bem mi iso dɔk ke edikoŋ ebiet; ndien mbufo eyedia ye ami mfin emi; ndien mkpɔŋ nyeyak fi ɔnyɔŋ, nyenyuŋ nda kpukpru se idude fi ke esit nyarare nnɔ fi.

²⁰Ndien ama edi mme ass fo oro ekesopde nte usen ita ekebe, kukere mmɔ; koro ema ekut mmɔ. Ndien ofuri Israel ke eyom anie owo? Nte idige afo ye ofuri ufɔk usɔ?

²¹Ndien Saul ɔbɔrɔ ete, Nte ami ndige eyen Benjamin, nto ke ata ekpri esien Israel? Nte oruk mi inyuŋ ikprike ikan kpukpru oruk esien Benjamin? Nsinam ndien afo ɔdɔhɔde mi oruk ikɔ emi?

²²Ndien Samuel ada Saul ye owo esie, ada mmɔ oduk ke ubet, onyuŋ ɔnɔ mmɔ akpan itie ke otu mmɔ emi ekekotde, ndien mmɔ esim owo edip ye duop.

²³Ndien Samuel ɔdɔhɔ anditem udia, ete, Nɔ mi ubak oro ŋkɔnɔde fi, oro ŋkɔdɔhɔde fi, nte konim enye ke idem fo.

²⁴Ndien anditem-udia emen afara, ye se idorode ke esit, ndien enye ada onim ke iso Saul. Ndien enye ɔdɔhɔ ete, Se, se isuhɔde edi oro! da enye nim ke iso fo ta: koro ema enim enye enɔ fi, tutu osim ini eke ŋdɔhɔde nte, Mma ŋkot mbio-obio edi. Ntre ke Saul adia ŋkpɔ ye Samuel ke usen oro.

²⁵Ndien adaŋemi mmɔ eketode ke edikoŋ ebiet esuhɔre ke obio, Samuel eneme nneme ye Saul ke enyɔŋ ufɔk.

²⁶Ekem mmɔ ebak edemere; ndien, edikem, adaŋemi eyo esierede, Samuel okot Saul ke enyɔŋ ufɔk, ete, Daha ke enyɔŋ, man nda fi ŋkayak. Ndien Saul adaha ke enyɔŋ, ndien mmɔ mbiba, enye ye Samuel, ewɔrɔ ke esien.

²⁷Mmɔ esuhɔre eka ke utit obio, ndien Samuel ɔdɔhɔ Saul, ete, Dɔhɔ owo fo, ete asaŋa nnyin ke iso (ndien enye asaŋa), edi afo tuak da esisit, ndien nyenam fi okop uyo Abasi.