Read eggon Amatiyu 10 Bible Online

Amatiyu 10 - eggon bible

Amatiyu 10

¹Eyesu a bzi moanwyeotum otsko, nga a shri ekʼpo a da mo, okyku o da mo a se egbgabi, nga a shaŋ edgu ewu endandandim, ta la elolo endandandim.

²Moa la a nyum oshpa otsko he lo a ri, Esima, eshko baŋ ba oha e ri Ebitru, ta la anáŋ Andru, ta la Eyakubu, ta la anáŋ Eyohana, moaha he lo moa a wo moanwye ba Azabadi angyiŋ.

³Ta la Efilibu, ta la Abatalamawu, ta la Otoma, ta la Amatiyu, aŋa a wo are la a yga ewaŋ angyiŋ, ta la Eyakubu, aŋa a wo anwye Alafus, ta la Tadas.

⁴Ta la Esima anwye-obiŋ, ta la Eyahuda Eskariyoti. Aŋa angyiŋ a yla Eyesu.

⁵Eyesu a hom moanwyeotum otsko otum, nga a lu mi le, Agimi e yi ogʼba obiŋ moa la a wo moaEyahuda mbo mbo, ta la esku moaEsamariya mbo.

⁶Ambo agimi e yi okro moarehwĩ ba Esrayila la a wo eka ékylu la e som ayi.

⁷Agimi e yi e nyum oshpa ba Oreŋ Ongyeŋ o wo osusku a mo, e ygi mo!

⁸Nga e shaŋ moa la a no olo, nga e vro moa la a kpu, nga e shaŋ moa la a gbu eshru, nga e se egbgabi. Agimi e hwiŋ ekʼpo he lo ototno, okyku eka he agimi e yga ekplokyeŋ okyku lo mbo.

⁹Nga agimi e shri amgbaŋ mbo.

¹⁰Nga agimi e shri abre ba o vẽ algo mbo, nga agimi e shri ariga aha mbo, ta la akpadga aha, ta la opi o dzi oklo mbo. O raŋ o gre ba moa a shri egbre ba are la a kpo otum a shri a daŋ.

¹¹Omba bimi e gbu osku, o mbo le anwye osku, agimi e yi odne are la a wo anyu eŋo, nga e dzu ka la ŋa, o tsa onda ba agimi e kso okro lo.

¹²Omba bimi e gre odnekyeŋ le, agimi e lu mi le, Opyapyaŋ ba esõ o dzu ka la gimi.

¹³O wo moarehwĩ ba odne lo a yga gimi la anyu eŋo le, oshko bimi e shko mo lo ó kpo mo owlama, ambo o wo ba moa a yga gimi la anyu eŋo mbo, alo ó kpo mo owlama ku-ku mbo.

¹⁴Odne, o mbo le osku la o yga gimi mbo le, agimi e zgi e sku lo, nga e ndza abgo bimi e sku lo.

¹⁵Agimi e ka! Onda Osõmbgu le, Ahogbrẽ á ka moarehwĩ ba Osodom, ta la Ogomora a mbo ayiekŋe á gre osku mi lo!

¹⁶Agimi e ngli e gno! Ame e hom gimi otum eka ba ékylu angyiŋ egi ayi ba ebuakam. Okyku eka he agimi e nyuŋ e kpo-kpo eka amabi nga e dzu moarehwĩ la a kpo anvaŋ mbo eka ba abyebye.

¹⁷Agimi e nyuŋ e ka, moare la á ba a ba á vu gimi nga á shri gimi á yi akuombgu á yi á ba. Moa á taŋ gimi andzu aku ba moa a la a shki eshki ma.

¹⁸Moa á shri gimi á ba okro moa a la a ri ekʼpo, pa la moanyuŋ-areŋ, moa á sõ gimi ombgu okyku me, okyku o da gimi e nyum Oshpaodzadzi e ygi mo pa la moa la a wo moaEyahuda mbo.

¹⁹Omba ba moa a shri gimi a gre okro ombgu le, agimi e da esõ e ngʼba gimi okyku ekplo bimi é ba e lu mbo. Omba mi lo, moa á tsa gimi ekplo bimi é ba e lu.

²⁰Odlo bimi é ba e lu o zgi aga esõ bimi angyiŋ mbo. Ogbgaodzi ba Adigi angyiŋ ó ba o dzu esõ bimi ó ba o lu odlo.

²¹Moare á shri moanimo á di, okyku o da mo a bga mo. Moadimo anwye nga á kpo ekakahelo angyiŋ pa la moanwye mo. Moanwye nga á tla moadimo, nga moa á bga mo.

²²Areyaŋ a mbo á tla gimi okyku me. Ambo are la a ta esõ akpyli o tsa omba amom-abgo le, aŋa á gro.

²³O wo ba moa a kpo gimi ewu oskukyeŋ le, agimi e knye e yi osku ohwõ. Ame e lu e da gimi, agimi é dzi anwye esku ba obiŋ Esrayila pyeŋ é khwo ayga, Anwye Arehwĩ á ba a ba mbo.

²⁴Anwye-engla a wo ekʼpo a gre are la a nye ŋa mbo, nga awaghrẽ a sa a wo ekʼpo a gre adaŋ-odne mbo.

²⁵Okyku eka he, o raŋ o gre ba anwye-engla a sko edgu odzudzu ba are la a nye ŋa. Awaghrẽ nga, o raŋ o gre baŋ a sko edgu odzudzu ba adaŋ-odne. O wo ba moa a bzi andakʼpo ba ogukyeŋ ma Ebilazabuba le, moarehwĩ ba ogu lo, moa á ri ashko la a wo abi a gre ahi lo a mbo!

²⁶Agimi e kpo eyli moarehwĩ mbo. Ekployaŋ a mbo la e ghre, é gbu edzi.

²⁷Nga ayakplo ba ame e la e lu e da gimi agʼbaha me ka la gimi sha, e bla lo e lu egi ayi moare mvye. Nga ayakplo bimi e gno emvygi, agimi e su lo.

²⁸Moarehwĩ la a bga egʼba agimi e kpo eyli mo mbo, okyku eshi moa a wo ekʼpo ma ba moa a bga esõ arehwĩ mbo. Ambo agimi e kpo eyli Ahogbrẽ la a kpo a gbu baŋ a bga egʼba pyeŋ, ta la esõ a mbo enzheovo.

²⁹Aŋo o kpo o gbu boŋ o gbmo ebyi-akpa eha okyku okobo. Ambo o wo le Adigi a bmi ayga dne akyeŋ a kpu.

³⁰E ka, amasẽ eshri bimi a mbo, moa a sheŋ a tsi lo pyeŋ.

³¹Okyku eka he agimi e kpo eyli mbo, agimi e gre ebyi-akpa la anyuanyuŋ!

³²Areyaŋ a mbo la a zgi egŋe la eyayi a lu ma aŋa a wo a me, ame a mbo é zgi egŋe ekakahelo eshri baŋ egi ayi Adugu la a wo Ongyeŋ.

³³Ambo areyaŋ a mbo la a kpo evom me egi ayi moare, ame a mbo é kpo evom baŋ egi ayi ba Adugu la a wo Ongyeŋ.

³⁴Agimi e tne aga eka ba ame e shri odzudum angyiŋ e shri e kom moarehwĩ obiŋ hi mbo. Ame e shri odzudum angyiŋ e shri e ba mbo, ambo ewu angyiŋ.

³⁵Ame e ba okyku o shri eko o zga agʼbaha moanwye pa la moadimo anwye, nga e shri eko e shri e zga agʼbaha moadzum pa la moadzum.

³⁶Moafpu ba are á wo moarehwĩ ba ogu baŋ angyiŋ.

³⁷Areyaŋ a mbo la a klo adaŋ, ta la anaŋ a gre me le, aŋa a wo ekplokyeŋ angyiŋ egi ayi me mbo, nga are-yaŋ a mbo la a klo moanwye baŋ a gre me le, aŋa a wo ekplo-kyeŋ angyiŋ egi ayi me mbo.

³⁸Areyaŋ a mbo la a bmi okyku o kpo ewu okyku me, nga a la a kpo ayakplo ba ame e klo mbo le, aŋa a wo ekplokyeŋ angyiŋ egi ayi me mbo.

³⁹Areyaŋ a mbo la a klo eshri baŋ le, é yla. Ambo are la a shri eshri baŋ a di okyku me le, á hwiŋ oshla.

⁴⁰Areyaŋ a mbo la a yga gimi le, a yga me angyiŋ, nga areyaŋ a mbo la a yga me le, a yga are la a hom me otum.

⁴¹Areyaŋ a mbo la a yga are ba Ahogbrẽ a hom ŋa otum okyku ba are lo a wo are ba Ahogbrẽ a hom ŋa otum le, á pu egbre baŋ ka la ŋa. Nga areyaŋ a mbo la a yga are la a wo la eda edzi, okyku eda edzi lo angyiŋ le, aŋa á pu egbre baŋ ka la ŋa.

⁴²Agimi e ka! Areyaŋ a mbo la a shri ami owa-wa sha a mbo, a shri a di akyeŋ eshki moarehwĩ la a lu me ma, okyku me le, are he lo á hwiŋ egbre baŋ.