Read eggon Amatiyu 12 Bible Online

Amatiyu 12 - eggon bible

Amatiyu 12

¹Ambla ba Eyesu a lu odlo a khwo nga, a gre a yi a dzi agbi esekʼpa onda Asabat he lo. Embyle e kpo moanwyeotum baŋ, okyku eka he, moa a sheŋ ashri esekʼpa nga moa a khwa lo a la a taŋ.

²Omba ba moaEfarisi a ka eka he nga, moa a nyuŋ Eyesu a lu mi le, Aŋo o ka, moanwyeotum boŋ a pre odaŋ bi okyku eshi moa a kpo eka he onda Asabat!

³Eyesu a tno mo ma a lu mi le, Agimi e tsi e ka ondakyeŋ eka ba embyle e kpo Adawuda, pa la moare la a lu ŋa ma nga,

⁴a gre anwyeakulu nga a yi a sko agbrotsa, nga a taŋ pa la moarehwĩ baŋ mbo? Agbrotsa he lo moa a shri lo a ndba Ahogbrẽ angyiŋ. Moa a pre odaŋ okyku moa a taŋ lo, okyku eshi moandakʼpo olu ba Ahogbrẽ sha a kpo a gbu ba moa a taŋ lo.

⁵Agimi e tsi odaŋ ba Omusa onda-kyeŋ e ka eka ba moandakʼpo olu ba Ahogbrẽ a pre odaŋ ba Asabat he lo mbo? Moa a kpo mo ekplokyeŋ mbo!

⁶Are la a gre Anyuŋ-akulu a wo ahe.

⁷O wo ba agimi e ka Odlo Ahogbrẽ e bmye zhezheŋ, eka ba alo o lu mi le, Ame e klo oshriondba ba ebyi angyiŋ mbo, ambo ame e klo okpoghwo angyiŋ. O wo bimi e ka e bmye eka he e mbi, agimi e lu odlo ototno eshri moare la a wo la odlodzi eka he mbo.

⁸Okyku eshi Anwye Arehwĩ angyiŋ a wo Adaŋ-odne ba Asabat.

⁹Eyesu a kso ahe nga a gre anwyeakuluakyeŋ.

¹⁰Alomakyeŋ la a nde obgo a wo ahe lo. Moarekyeŋ la a klo o kla odlo ta la Eyesu a wo ma. Moa a lu mi ma Eyesu a ta akpu. Okyku eka he nga moa a zhĩ ŋa a lu mi le, O wo eka moa a pre odaŋ bi angyiŋ o wo ba moa a shaŋ are la a no olo onda Asabat mbo?

¹¹Eyesu a tno mo ma a lu mi le, Agimi e gno, o wo ba akyeŋ eshki bimi a wo la ekylu ma, o wo ba alo e gre enzhe la e gyuŋ onda Asabat le, aŋa á se lo mbo?

¹²Arehwĩ a wo anyuanyuŋ nzenze a gre ekylu! Okyku eka he, odaŋ bi o bmi ba are a kpo a ghwo la moare onda ba Asabat.

¹³Ambla he nga, Eyesu a nyuŋ alom lo a lu mi le, Aŋo o ndba obgo boŋ. Aŋa a ndba lo nga alo o zhiŋ o dzu eka ba obgo ohwõ.

¹⁴Ambla he nga moaEfarisi a zhiŋ ogbu a gre okyku o hwim ohwim okyku o da mo a vu Eyesu a bga.

¹⁵Omba ba Eyesu a gno eka he lo nga, a kso a sku okro he lo, moarehwĩ nzenze nga a lu ŋa ma. Aŋa a shaŋ moare la a no ololo.

¹⁶Nga a shĩ mo ma moa a lu ayakplo baŋ a kpo a da arekyeŋ mbo ku-ku,

¹⁷okyku o da ekplo ba Eshaya, arehwĩ ba Ahogbrẽ a hom otum a lu e bli. Eshaya a lu ma Ahogbrẽ a lu mi le,

¹⁸Anwye-odne me angyiŋ a wo ahi, aŋa ame e sla ŋa. Aŋa angyiŋ ame e la e klo ŋa, Nga ame e gno oraŋ ka la ŋa e gre eshri. Ame é bli ŋa la Ogbgaodzi me. Aŋa nga á su odlo me, á ygi moare pyeŋ.

¹⁹Ambo aŋa á kla odlo pa la moare mbo. Nga aŋa á lu odlo nga á ta enzi angyangyeŋ anyuŋ-ezhẽ mbo.

²⁰Aŋa á ndbi agogro a ta mbo. Nga aŋa á dzu agogro a zga mbo. Ambo aŋa á zga gble okyku o da mo a yi adlidzi.

²¹Nga moare mvye á ka ayi ozhẽ okyku ŋa sha.

²²Ambla he nga, moa a shri avgayi alomakyeŋ, la a sa a buŋ olum, alo o kpo eka he okyku ba ogbgabi o kpo otum ka la ŋa. Eyesu a shaŋ alom he lo nga a kpla egba a gbu, nga a sa a ka okro a mbo a gbu.

²³Moare pyeŋ moa a ka egbregbre a gre eshri nga moa a zhĩ a lu mi le, Alom he lo angyiŋ a wo Anwye Adawuda e mbo?

²⁴Omba ba moaEyahuda a gno eka he nga, moa a tno ma a lu mi le, Aŋa a la a se egbgabi okyku eshi areŋ mo, Ebilazabuba angyiŋ a shri ekʼpo a shri a daŋ okyku o daŋ a kpo eka he.

²⁵Eyesu a tspi aga esõ mo pyeŋ okyku eka he aŋa a nyuŋ mo a lu mi le, Obiŋ-yaŋ a mbo la o gʼba eŋa eha, nga o la o klo ambgu ta la eŋa le, ó ri edzi mbo. Nga, osku, o mbo le ogu la o gʼba eŋa eha nga o la o klo ambgu ta la eŋa le, ó tsu ó gbu.

²⁶Okyku eka he o wo ba ogʼbakyeŋ o klo ambgu ta la ogʼba ohwõ óreŋ ba Eshitaŋ le, o dzu eka ba alo o gʼba eŋa angyiŋ, nga ó tsu ó gbu!

²⁷Agimi e lu mi ma Ebilazabuba angyiŋ a shri ekʼpo a da me e se egbgabi. O wo ba alo o wo eka he angyiŋ le, ayi a shri ekʼpo a da moa la a lu gimi ma, a da mo a se mo? Moa la a lu gimi ma a tsa eka bimi e la e ta akpu angyiŋ!

²⁸Ambo, Ogbgaodzi Ahogbrẽ angyiŋ o shri ekʼpo o shri o da me e la e se egbgabi. Ohi lo o tsa ba agimi e sheŋ e ka Oreŋ ba Ahogbrẽ bgu.

²⁹Arekyeŋ a kpo a gbu baŋ a yi a gom odne are la a wo oshye nga a yi a si mbo, o wo le a yi a bʼbu ŋa endzi ayga dne.

³⁰Are la a wo a me angyiŋ mbo le, a wo afpu me angyiŋ. Are la a la a pla a shki pa la me mbo le, aŋa a som lo ayi angyiŋ.

³¹Okyku eka he ame e lu e da gimi, moa a kpo a gbu ba moa a kyu moare abgo odlobi moa a kpo, ta la ayakplobi moa a la a lu, ambo, o wo moa a lu odlo ototno eshri Ogbgaodzi angyiŋ le, Ahogbrẽ á kyu mo abgo mbo.

³²Ambo areyaŋ a mbo la a kpo odlobi egi ayi Anwye Arehwĩ angyiŋ le, moa á kyu ŋa abgo. Are la a tsa Ogbgaodzi atsa le, moa á kyu ŋa abgo mbo gbagbu-amo.

³³Esĩ aki e wo edzi ayga e la e fu agbro adzi. O wo ba esĩ aki lo e wo edzi mbo le, é fu agbro adzi mbo. Edgu agbro ba esĩ aki e la e fu angyiŋ e la e da mo a yi edgu esĩ aki lo.

³⁴Agimi emabi, agimi e kpo anyu é ba e lu odlodzi, okyku eshi agimi e wo moare ba odlobi angyiŋ? Okyku eshi anyu a la a lu ekplo la e wo esõ angyiŋ e ba edzi.

³⁵Areadzi a la a se anzho adzi angyiŋ anjygu baŋ la a wo adzi a ba edzi. Areabi nga a la a se anzho la a wo abi angyiŋ anjygu baŋ la a wo abi a ba edzi.

³⁶Ame e lu e da gimi, Onda Ombgu le, areyaŋ a mbo á wre odlo ototno baŋ a la a lu, á da mo a ka.

³⁷Okyku eshi la odlo boŋ angyiŋ moa á ba a sõ ŋo ombgu. La alo angyiŋ aŋo ó ba o gro o mbo le ó ba o dga.

³⁸Moarekyeŋ la a la a nye odaŋ, pa la moaEfarisi a lu odlo a lu mi le, Andakʼpo! Agi e klo boŋ o kpo akplo egbregbre akyeŋ o da gi e ka.

³⁹Eyesu a tno mo ma a lu mi le, Agimi arehwĩ ba ekplu hi e wo moareabi nga e ka e yi Ahogbrẽ mbo ku-ku! Agimi e zhĩ me okyku o da me e kpo akplo-kyeŋ ba egbregbre? Ame é kpo mbo! Ekplo ekyekyeŋ ba egbregbre ba ame e klo bimi é ka, agimi é ka ekplo egbregbre la e kpo ta la Oyunana, arehwĩ ba Ahogbrẽ a hom ŋa otum.

⁴⁰Eka ba Oyunana a kpo elum etra, ta la ekyukyku etra akpyki anyuŋ atsa, ekakahelo Anwye Arehwĩ á kpo elum etra ta la ekyukyku etra obiŋ hi eshyẽ.

⁴¹Onda Ombgu moarehwĩ ba Eninive, moa á kso á zgi egŋe eshri bimi nga odlo ó bga gimi, okyku eshi omba ba moa a gno oshpa ba Oyunana nga, moa a zhiŋ. Ame e lu e da gimi, arekyeŋ la a gre Oyunana a wo ahe!

⁴²Nga Onda Ombgu ashekyeŋ la a wo anyuŋ-areŋ á zgi egi ero á kso nga á lu odlo ka la gimi osheshye. Okyku eshi aŋa a zgi okro la o gyuŋ o gre eshi angyiŋ a ba, okyku o ngli o gno edgu onyenye ba Osolomo, la o wo ogyugyuŋ o gre eshri. Ame e lu e da gimi, arekyeŋ la a wo anyuanyuŋ a gre Osolomo a mbo nganga, a wo ahe!

⁴³Omba ba ogbgabi o zgi o sku are le, o la o dzi ekro wayawaya okyku o klo okro ba o dzu ma. O wo ba alo o hwiŋ mbo le,

⁴⁴alo o lu mi le, Ame é bla é yi okro ba ame e zgi ma. Ambla ba alo o gre, alo o hwiŋ odne lo adzadzi. A hwiŋ arekyen ma mbo, nga moa a heŋ lo adzadzi, nga moa a nyuŋ lo a vu abgo.

⁴⁵A zgi a gre nga a klo moahwõ afoha la a wo ababi a gre ŋa a ba a dzu otsotse ka la ŋa. Amom-abgo odzudzu are he lo o wo obi o ta ma-ma o gre ba oriori. Eka he lo angyiŋ ó ba o kpo pa la moareabi ba ekplu hi.

⁴⁶Omba ba Eyesu a la a lu odlo pa la moare nga, anaŋ, pa la moanáŋ-alalom moa a gbu. Moa a tspi edzi a dzu a bli ŋa okyku o lu odlo ka la ŋa.

⁴⁷Akyeŋ eshki moare a nyuŋ Eyesu a lu mi le, Anoŋ, pa la moanóŋ-alalom moa a tspi edzi, moa a klo o lu odlo ka la ŋo.

⁴⁸Eyesu a tno mo ma a lu mi le, Ayi angyiŋ a wo anungu, pa la moanime-alalom?

⁴⁹Ambla he nga a ndba obgo a tsa moanwyeotum baŋ nga a lu mi le, Agimi e ka, moahi angyiŋ a wo anungu, pa la moanime-alalom!

⁵⁰Areyaŋ a mbo la a kpo ekployaŋ a mbo ba Adugu la a wo Ongyeŋ a gno oraŋ angyiŋ, a wo anime-alalom, ta la anime-alashle, ta la anungu.