Read eggon Amatiyu 14 Bible Online

Amatiyu 14 - eggon bible

Amatiyu 14

¹Omba he lo angyiŋ Ehirudu la a ri oreŋ Egalili a gno oshpa ba Eyesu.

²A nyuŋ moa la a kpo otum ka la ŋa a lu mi le, Are he lo a wo Eyohana angyiŋ la a bla a ba. Okyku eka he angyiŋ aŋa a kpo ayakplo egbregbre eka he.

³Ehirudu angyiŋ a da mo a vu Eyohana, nga a ta ŋa agbu nga a shri ŋa a shri a ta aku. Aŋa a kpo ohi lo otsla ashe anáŋ Efilibu. Ashe lo a ri Ehirudiya.

⁴Eyohana la a kpo abaptisma a shĩ Ehirudu a lu mi le, Alo o wo odzi boŋ o kyu ashe anóŋ mbo!

⁵Ehirudu a klo o bga Eyohana, ambo a kpo eyli moaEyahuda okyku eshi moa a sko ŋa a zga eka ba are ba Ahogbrẽ a hom ŋa otum angyiŋ.

⁶Onda ba moa a mbre Ehirudu nga, anwye-alashle ba Ehirudiya a yi a zhga ara egi ayi ba eshki. Ehirudu a gno oraŋ a gre eshri.

⁷Nga a kʼpi ashum a nyuŋ anwyeshe lo a lu mi le, Ame é shri ekployaŋ a mbo boŋ o vẽ é shri é doŋ!

⁸La ebra ba anaŋ nga, anwyeshe lo a vẽ a lu mi le, Ohuhuhi aŋo o kplu eshri Eyohana la a kpo abaptisma o shri o ta amgbalga o shri o da me.

⁹Esõ e tpi anyuŋ-areŋ ayi, ambo okyku ashum baŋ a kʼpi, ta la anzi ba eshki, aŋa a di ekʼpo a da mo a kpo ekplo ba anwyeshe a klo.

¹⁰Okyku eka he moa a kplu eshri ba Eyohana aku.

¹¹Moa a shri eshri lo amgbalga a shri a ba a da anwyeshe lo. Nga anwyeshe a sko lo a shri a kom anaŋ.

¹²Moanwyeotum ba Eyohana a ba a sko okom ba Eyohana a shri a yi a ngybi, nga moa a gre a yi a lu a da Eyesu.

¹³Omba ba Eyesu a gno oshpa ekplo la e kpo nga, a kso a sku okro he lo, nga a gre okrokyeŋ la o wo yoŋ ambambga. Moare a gno eka he nga, moa a kso a sku esku mo nga moa a sõ oshyi a yi a ka ŋa.

¹⁴Eyesu a zgi a sku amgblami, nga a ka moarehwĩ nzenze. A ka mo ayiekŋe, nga a shaŋ elolo mo.

¹⁵Olum-ore he lo nga, moanwyeotum ba Eyesu a ba a nyuŋ ŋa a lu mi le, Aŋo o ka, omba o bre o yi a mo, okro hi nga o wo yoŋ ototno, o da moare a yi anwye esku nga a gbmo algori okyku emo.

¹⁶Eyesu a tno mo ma a lu mi le, O dzu omgbybi ba moa a yi mbo. Agimi e klo algori e da mo a ri.

¹⁷Moa a tno ŋa ma a lu mi le, Ekplo ba agi e wo la alo ma ahe, e wo agbrotsa atno, ta la atsa aha sha.

¹⁸Eyesu a tno mo ma a lu mi le, Agimi e shri lo e kom me.

¹⁹A da moare a dzu obiŋ asoso. Ambla he nga a sko agbrotsa atno lo, ta atsa aha, nga aŋa a ka ongyeŋ, nga a vye Ahogbrẽ. Ambla he nga a tsoŋ agbrotsa lo agbu nga a shri a da moanwyeotum. Moanwyeotum nga a shri lo a da moare.

²⁰Areyaŋ a mbo a ri a wyo gble, nga moanwyeotum a pla ekplo la e ra e bli aksu otsko.

²¹Moare la a taŋ agbrotsa lo moa a gbu ezbietno. Moa a tsi moashe, pa la moanwye o ko mbo.

²²Ambla he nga, Eyesu a da moanwyeotum baŋ a gre amgblami a gre o tsa baŋ a kyu eshki abgo.

²³Ambla baŋ a kyu eshki abgo nga, a vre a gre akũ-akyeŋ okyku o fa olu. La olum-ore nga, Eyesu a wo ahe lo ambambga.

²⁴Omba he lo, amgblami a wo atam la ogyugyuŋ ta la okro ba Eyesu a wo ma. Ondzami, ta la ogbga o la o mu lo.

²⁵La amgbaŋ atra, o mbo le amgbaŋ afĩ ba endigiŋ, Eyesu a dzi ami a ba okro moanwyeotum baŋ.

²⁶Omba ba moanwyeotum a ka Eyesu a dzi ami ongyeŋ a ba nga eyli e kpo mo. Moa a lu la eyiyli a lu mi le, Amu angyiŋ!

²⁷Eyesu a nyuŋ mo osho-shoŋ a lu mi le, Agimi e kpo eyli mbo, ame angyiŋ!

²⁸Ebi-tru nga a lu mi le, Adigi-odne, o wo ba alo o wo aŋo angyiŋ le, aŋo o da me e ba e dzi ami e ba okro boŋ.

²⁹Eyesu a lu mi le, O ba! Ebitru nga a zgi amgblami a la a dzi ami a yi okro Eyesu.

³⁰Ambo omba baŋ a ka ba ogbga o hlu nga, eyli e kpo ŋa, nga omba baŋ a ka a dom a yi ami eshyẽ, a wu okũ a lu mi le, Adigi-odne, o shla me!

³¹Eyesu a ndba obgo a vu ŋa oshoshoŋ, a nyuŋ ŋa a lu mi le, Obmi ba adlidzi boŋ o wo fi sha eka he angyiŋ! Okyku eshi aŋo o fu esõ eha?

³²Moaha pyeŋ a gre amgblami a khwo nga ogbga lo o dum.

³³Moanwyeotum a dzu amgblami a hlu Eyesu eshko a lu mi le, Adlidzi angyiŋ, aŋo angyiŋ o wo Anwye Ahogbrẽ!

³⁴Moa a bmyi atam lo nga moa a ba a tspi osku ba Ajanasarata.

³⁵Ahe lo, moa a ka Eyesu a tspi, okyku eka he nga, moare a shri moa la a no olo a zgi akekaŋ ba osku a shri a ba okro Eyesu.

³⁶Moa a vẽ Eyesu okyku o daŋ a bmi nga a da moa la a no olo a tka akaŋ ariga baŋ sha a mbo. Moa la a tka lo pyeŋ, moa a shaŋ.