Read eggon Amatiyu 15 Bible Online

Amatiyu 15 - eggon bible

Amatiyu 15

¹Ambla he nga moaEfarisi, pa la moa la a nye odaŋ, moa a zgi Orushalima a ba okro ba Eyesu okyku o zhĩ ŋa odlo.

²Moa a zhĩ a lu mi le, Okyku eshi moanwyeotum boŋ, moa a la a kpaŋ onyenye moadigi mbo? O ka, moa a ka a ndza abgo mo ozhẽ la o raŋ ayga a ri algo mbo!

³Eyesu a tno mo ma a lu mi le, Okyku eshi agimi e la e kpaŋ odaŋ ba Ahogbrẽ mbo, nga e kpaŋ onyenye ba eshri bimi?

⁴Okyku eshi Ahogbrẽ a lu mi le, Aŋo o fa olbi o da adoŋ, ta la anoŋ, nga areyaŋ a mbo la a lu odlo la o wo odzi mbo ta la adaŋ, o mbo le ta la anaŋ le, moa á bga ŋa omgbybi.

⁵Ambo agimi e sko lo e shri e zga, e la e lu mi le, O wo ba arekyeŋ a wo la emakyeŋ ma okyku o kpo o ghwo adaŋ, o mbo le anaŋ le, o wo baŋ a lu ma aŋa á shri lo á da Ahogbrẽ le, ma alo o wo akpu mbo,

⁶ma alo o wo akplokyeŋ angyiŋ baŋ a fa olbi a da adaŋ mbo. Agimi e la e kpo eka he angyiŋ nga e la e zhiŋ odlo Ahogbrẽ evom, nga e la e kpo otum ta la onyenye ba eshri bimi.

⁷Agimi abibli moarehwĩ! Eshaya a ta akpu ku-ku omba baŋ a ka a lu eshri bimi mbo! Aŋa a lu ma Ahogbrẽ a lu mi le,

⁸Moarehwĩ hi a la a hlu me eshko la anyu mo, Ambo esõ mo e wo ogyugyuŋ pa la me.

⁹Ototno angyiŋ moa a la a hlu me eshko, Okyku eshi moa a la a nye odaŋ moarehwĩ a zga eka ba Ahogbrẽ angyiŋ a zga!

¹⁰Ambla he Eyesu a lu a da eshki a lu mi le, Agimi e ngli atuŋ e gno nga e ka e bmye!

¹¹Ekplo ba are a ri e gre e yi akpyki angyiŋ e tpi ŋa ayi mbo, ambo aga la a zgi esõ baŋ angyiŋ a tpi ŋa ayi.

¹²Ambla he nga, moanwyeotum a ba okro Eyesu nga a nyuŋ ŋa a lu mi le, Aŋo o yi ba odlo boŋ o lu ohuhuhi o tpi moaEfarisi esõ ayi?

¹³Eyesu a tno moanwyeotum ma a lu mi le, Esĩ akiyaŋ a mbo ba Adugu la a wo Ongyeŋ angyiŋ a yle mbo, aŋa á gʼbu lo.

¹⁴Agimi e da esõ e tpi gimi ayi pa la mo mbo! Moa a wo moandakʼpo la a vga ayi angyiŋ. O wo ba avgayi a shri avgayi opi le, moaha lo pyeŋ, moa á tsu á gbu enzhe.

¹⁵Ebitru a zhĩ Eyesu a lu mi le, Aŋo o wre egŋe boŋ o ta he lo o da gi e gno.

¹⁶Eyesu a nyuŋ mo a lu mi le, Okaobmye bimi o wo okyeŋ ondundum ta la okaobmye moahwõ mbo.

¹⁷Agimi e ka e bmye mbo? E ka, okyku eshi, ekployaŋ a mbo ba are a ri e gre akpyki baŋ, nga e la e bre e yi edzi.

¹⁸Ambo ayakplo la a la a zgi anyu baŋ, a la a zgi esõ angyiŋ a ba. Edgu ahi lo angyiŋ a la a tpi ŋa ayi.

¹⁹Esõ arehwĩ eshyẽ nga, aga ba o kpo ayakplobi eka o bga ebga, ta la o ri eshra, ta la o kpo ayakplo ba eshre, ta la o kpo ogʼga, ta la o sheŋ akpro, ta la o tpi eshko moare ayi, a wo ma.

²⁰Ayakplo he angyiŋ a la a tpi are ayi. Ambo o ri algo la abgo erum, o kpo o gbu ba alo o tpi ŋa ayi mbo.

²¹Eyesu a kso ahe nga, a bre a gre ogʼba obiŋ ba Ataya, ta Esidoŋ.

²²Ashekyeŋ a wo ahe lo. A wo a ba Akana. A ba okro Eyesu nga a lu mi le, Aŋo Anwye Adawuda, Andakʼpo! Aŋo o ka me ayiekŋe! Ogbgabi o la o kpo anwye-alashle me ewu nzenze.

²³Ambo Eyesu a lu akplokyeŋ ka la ŋa mbo. Ambo moanwyeotum baŋ a ba a vẽ ŋa a lu mi le, Aŋo o kyu ŋa abgo o daŋ a yi eŋa! Okyku eshi, aŋa a lu gi ma nga a lu odlo a dzu gi esõ!

²⁴Eyesu a tno ma a lu mi le, Moa a da me e ba okyku moarehwĩ ba Esrayila la a som ayi sha angyiŋ.

²⁵Omba he lo nga, ashe lo a kne a shki obiŋ egi ayi ba Eyesu, nga a vẽ a lu mi le, Andakʼpo, o kpo o ghwo a me!

²⁶Eyesu a tno ŋa ma a lu mi le, O wo odzi ba moa a shri algo moanwye a shri a ygi ebu mbo.

²⁷Ashe lo a tno ma a lu mi le, O kom o wo eka he lo, ambo, ebu a mbo e la e ri ambro algo moadimo, la a zgi eteblo a ygi obiŋ.

²⁸Eyesu a tno ŋa ma a lu mi le, Ashe, obmi ba adlidzi boŋ o wo oshye! Ekplo boŋ o klo nga, moa á kpo ŋo alo. Ombamba he lo nga anwye baŋ a shaŋ.

²⁹Eyesu a kso ahe lo nga, a zhiŋ a sõ atam ba Egalili. A vre ezhim a dzu ma.

³⁰Moare nzenze a ba okro baŋ. Moa a shri moa la a no elolo a shri a ba okro baŋ. Moa la a buŋ adga, pa la moa la a vga ayi, pa la moa la a shla adga, pa la moa la a buŋ olom, pa la moa la a no olo edgu ehwõ nzenze. Moa a shri mo a zga egi ayi Eyesu, nga a shaŋ mo.

³¹Moare a ka egbregbre eka moa a ka moa la a buŋ olom mgbyiŋ, a lu odlo, nga moa la a shla adga a sa a dzi, nga ba moa la a buŋ adga a sa a dzi, nga ba moa la a vga ayi a sa a ka. Moa a hlu Ahogbrẽ ba Esrayila eshko okyku ayakplo he lo.

³²Eyesu a bzi moanwyeotum baŋ nga a lu mi le, Moare-hwĩ hi a wo me ayiekŋe a gre eshri, okyku eshi moa a wo ahe olum ba otra a mo, ambo moa a hwiŋ ekplokyeŋ ba oruri mbo, nga moa á dzi á gbu odne mbo okyku embyle.

³³Moanwyeotum a zhĩ ŋa a lu mi le, Agi é hwiŋ algo la á ba a tse moarehwĩ hi ma ayaŋ akla he?

³⁴Eyesu a zhĩ mo a lu mi le, Agimi e wo la agbrotsa ahrẽ e ma? Moa a tno ma a lu mi le, Agi e wo la agbrotsa afoha e ma, ta la atsa fi.

³⁵Eyesu nga a da moare pyeŋ a dzu obiŋ.

³⁶Ambla he nga aŋa a sko agbrotsa afoha, ta la atsa lo, nga a vye Ahogbrẽ okyku lo, ambla he nga a kplu lo a gbu nga a shri a da moanwyeotum baŋ, nga moanwyeotum a shri lo a shri a gʼba moare.

³⁷Moa pyeŋ a ri ekplo la e tse mo ma. Moanwyeotum a pla ekplo la e ra, nga alo e bli altsu afoha.

³⁸Moarealom pyeŋ la a taŋ agbrotsa a wo ezbienyi. Moa a tsi moashe, pa la moanwye ko mbo.

³⁹Ambla ba Eyesu a kyu moare abgo a khwo nga, a gre amgblami nga a gre ogʼba obiŋ ba Emagada.