Read eggon Amatiyu 2 Bible Online

Amatiyu 2 - eggon bible

Amatiyu 2

¹Moa a mbre Eyesu osku ba Ebetalami, obiŋ ba Eyahuda. Omba he lo, Ehirudu angyiŋ a wo anyuŋ-areŋ. Ambla fi nga, moarehwĩ la a la a klo aga ta la eyi enzo, moa a zgi egi etne a ba Orushalima nga moa a zhĩ a lu mi le,

²Anwye able ba moa a mbre ŋa, baŋ angyiŋ á ba a dzu anyuŋ-areŋ moaEyahuda a wo ayaŋ? Agi e ka eyi enzo baŋ omba ba alo e zgi egi etne. Okyku eka he agi e ba okyku o hlu ŋa eshko.

³Omba ba Ehirudu anyuŋ-areŋ a gno eka he nga, esõ e kpla ŋa e gbu. Ekakahelo, esõ e kpo ta la areyaŋ a mbo la a wo osku ba Orushalima.

⁴Ehirudu nga a pla moandakʼpo olu ba Ahogbrẽ, pa la moa la a nye odaŋ a shki nga a zhĩ mo a lu mi le, Moa nga á mbre Emisiya ayaŋ?

⁵Moa a tno ŋa ma a lu mi le Moa á mbre ŋa osku ba Ebetalami, obiŋ ba Eyahuda. Okyku eshi arehwĩ ba Ahogbrẽ a hom otum a ta a lu mi le,

⁶Aŋo Ebetalami obiŋ ba Eyahuda, Aŋo angyiŋ o wo fifi o gre pyeŋ eshki moareŋ ba Eyahuda mbo. Okyku eshi andakʼpokyeŋ á zgi okro boŋ á ba a ba. Aŋa angyiŋ á ba a tsa moarehwĩ me moaEsrayila.

⁷Okyku eka he nga, Ehirudu a bzi moazhẽ ba egi etne lo a da mo a kpo eshki shu, nga a da mo a lu omba ba moa a ka eyi enzo lo a daŋ.

⁸Ambla he nga aŋa a hom mo otum a da mo a gre Ebetalami. Aŋa a nyuŋ mo a lu mi le, Agimi e yi e klo anwye lo osusuŋ, o wo bimi e hwiŋ ŋa le, e ba e lu e da me, okyku o da me a mbo e yi e hlu ŋa eshko ko-ko.

⁹Ambla he nga moazhẽ lo a zhiŋ emo ogbu. Omba ba moa a wo ozhẽ nga, eyi enzo lo e zgi, ehi lo angyiŋ moa a ka egi etne. Alo e gre ozhẽ nga moa a lu lo ma. Alo e gre e yi e tspi okro ba anwye lo a wo ma.

¹⁰Moa a kpo ovye a gre eshri omba ba moa a ka eyi enzo lo!

¹¹Moa a gre odne eshyẽ nga moa a ka anwye lo ta la anaŋ Emeri. Moa a kne a shki obiŋ, nga moa a hlu ŋa eshko. Moa a hwile apuoshri mo nga moa a se ototno moa a shri. Moa a shri ezanariya, ta la afarakis ta la emri.

¹²La onze nga, Ahogbrẽ a shĩ mo ma moa a bla a yi okro Ehirudu nga mbo. Okyku eka he nga moa a sõ ozhẽ-okyeŋ angyiŋ a bla a gre odne a mo.

¹³Ambla ba moazhẽ lo a zhiŋ ogbu a gre bgu, anwyeadga ba Adigi-odne a lu odlo ta la Oyusufu la onze a lu mi le, Aŋo o kso, nga o sko anwye lo ta la anaŋ, o knye o yi obiŋ ba Amasla, nga o dzu ma ma-me o tsa onda ba ame e doŋ o kso, okyku eshi Ehirudu a klo o bga anwye lo.

¹⁴Okyku eka he, okyukyku nga, Oyusufu a sko anwye lo ta la ashe lo, moa a knye a gre obiŋ ba Amasla.

¹⁵Aŋa a dzu ahe lo angyiŋ o tsa ba Ehirudu a kpu. Ohe lo o kpo okyku o bli ekplo ba Adigi-odne a da arehwĩ baŋ a hom otum a lu. A lu mi le, Ame e bzi anwye me obiŋ ba Amasla.

¹⁶Omba ba Ehirudu a ka a bmye ba moazhẽ ba egi etne a bile ŋa, aŋa a kpo olom. Okyku eka he aŋa a jygu odaŋ ma moa a bga moanwyealom la a kpo eyi eha, pa la moa la a kpo eyi eha mbo moanwyealom la a wo Ebetalami, ta la akekaŋ ba Ebetalami. Aŋa a tsi omba ba moazhẽ lo a lu moa a ka eyi enzo lo e zgi a ka ayga a jygu odaŋ.

¹⁷Okyku eka he, ekplo ba Erimiya, arehwĩ ba Ahogbrẽ a hom otum, a lu, e bli. Aŋa a lu mi le,

¹⁸Moa a gno okũ osku ba Arama, Okũ lo o vu olo o gre eshri. Arahila nga a wu okũ okyku moanwye baŋ. Esõ e tpi ŋa ayi e gre eshri, Okyku eshi moa a bga moanwye baŋ pyeŋ.

¹⁹Ambla ba Ehirudu a kpu nga, anwyeadga ba Adigi-odne a ba okro Oyusufu la onze obiŋ ba Amasla, a lu mi le,

²⁰Aŋo o kso, o sko anwye lo ta la anaŋ, o bla o yi obiŋ moaEsrayila a mo. Okyku eshi moare la a klo o bga anwye lo a kpu bgu.

²¹Okyku eka he Oyusufu a kso nga a sko anwye lo ta la anaŋ, nga a bla a gre a yi obiŋ moaEsrayila.

²²Omba ba Oyusufu a gno ba Akelos angyiŋ a yga oreŋ adaŋ Ehirudu obiŋ ba Eyahuda nga, eyli e kpo ŋa, nga aŋa a klo o dzu ahe lo mbo. Moa a sa a lu a daŋ la onze ma aŋa a yi obiŋ ba Egalili. Okyku eka he aŋa a gre obiŋ ba Egalili,

²³nga aŋa a kpo odne baŋ osku moa a bzi lo ma Anazarata. Aŋa a kpo eka he okyku o bli ekplo ba moarehwĩ Ahogbrẽ a hom otum a lu. Moa a lu mi le, Moa á bzi ŋa Anazari.