Read eggon Amatiyu 20 Bible Online

Amatiyu 20 - eggon bible

Amatiyu 20

¹Oreŋ Ongyeŋ o wo eka ba areagbi la a zgi endigigiŋ a gre okyku o klo moare la á ba a kpo ŋa otum.

²Areagbi a hwim ba o hre moare eka ekplo moa a la a hre. Egbre mo e wo eyiamgbaŋ angyiŋ olum. Aŋa a da moare a gre o yi o kpo ŋa otum agbi baŋ.

³La amgbaŋ atronyi nga, a gre ekyku a hwiŋ moarekyeŋ la a tspi ototno, moa a wo la otum ma mbo.

⁴Nga a nyuŋ mo a lu mi le, Agimi a mbo e yi e kpo otum agbi me. Ame é hre gimi ekplo la e raŋ e gre.

⁵Ambla he nga moa a gre agbi lo. Omba amgbaŋ otsko, ta la amgbaŋ atra aŋa a kpo ekakahelo.

⁶Omba baŋ a gre ekyku osusku la amgbaŋ atno nga, a sa a ka moarekyeŋ a la a tspi ahe lo, a zhĩ mo a lu mi le, Okyku eshi agimi e tpi omba ayi eka he?

⁷Moa a tno ma a lu mi le, Agi e tpi omba ayi okyku ba arekyeŋ a shri otum a da gi mbo. Areagbi a nyuŋ mo a lu mi le, O wo eka he bgu le, agimi a mbo e yi e kpo otum agbi me.

⁸La olum-ore nga, areagbi a nyuŋ andakʼpo eshki moare la a kpo ŋa otum lo, a lu mi le, Aŋo o pla moare la a kpo otum o shki nga, o hre mo amgbaŋ mo. Aŋo o zga esĩ o hre moa la a ba amom-abgo ori, nga o sa o hre moa la a ba ori amom-abgo.

⁹Moare la a ba la amgbaŋ atno a mbo, moa a hre mo eyiamgbaŋ.

¹⁰Omba ba moare la a ba otum oriori a ba a yga amgbaŋ mo nga, moa a ka ma o dzu mbo le, ma moa á hre mo a gre moahwõ, ambo moa a hre mo a mbo eyiamgbaŋ ekakahelo.

¹¹Moa a yga amgbaŋ mo nga, moa a yi a nyi agla egi ayi areagbi.

¹²Moa a nyuŋ ŋa a lu mi le, Moa la a ba amom-abgo hi, moa a kpo otum okyku awa akyeŋ sha, agi nga e wa olum okyku olum okyeŋ, ambo ekakahelo, aŋo o hre gi otsotsotse!

¹³Areagbi a tno mo ma a lu mi le, Agimi anáŋ, ame e pyi gimi tsi a mbo mbo, okyku eshi agimi e bmi ba ame é ba e hre gimi eyiamgbaŋ angyiŋ okyku olum okyeŋ.

¹⁴Okyku eka he agimi e yga amgbaŋ bimi nga e yi odne ohuhuhi. O wo ba ame é klo le, ame e kpo e gbu ba ame e hre moa la a ba amom-abgo otsotsotse ka la gimi.

¹⁵Ame e wo la ekʼpo ma eshri amgbaŋ me mbo? Agimi e ta efpu okyku ba ame e wo areodlodzi?

¹⁶Okyku eka he nga, moare ba ori, moa á dzu moa ba ambla, nga moa ba ambla moa á dzu moa ba ori.

¹⁷Omba ba Eyesu a bre a yi Orushalima nga, a da moanwyeotum baŋ otsko a gbga a gre agba ka la ŋa. A lu odlo shu pa la mo omba ba moa a la a dzi.

¹⁸A nyuŋ mo a lu mi le, Agimi e ngli e gno, agi é yi Orushalima. Ahe lo nga, moa á vu Anwye Arehwĩ á shri ŋa á da moandakʼpo olu ba Ahogbrẽ, pa la moa la a nye odaŋ. Nga moa á sõ ŋa omgbu ba eku.

¹⁹Nga moa á shri ŋa á da moa la a wo moaEyahuda mbo, nga moare hi lo á lu ega á ygi ŋa, nga moa á taŋ ŋa andzu, nga moa á kũ ŋa okusa egŋe aki. Ahogbrẽ nga á kso ŋa ongybi olum ba otra.

²⁰Ambla he nga ashe Azabadi a ba okro Eyesu pa la moanwye baŋ aha. A kʼpu obiŋ egi ayi Eyesu nga a vẽ ŋa okyku o daŋ a kpo a ghwo la ŋa.

²¹Eyesu a zhĩ ŋa a lu mi le, Aŋo o klo eshi? A tno ma a lu mi le, Ame e klo boŋ o hwim boŋ ó da moanwye aha me hi, ba akyeŋ a dzu obgori boŋ, nga ba ahwõ a dzu obgoehre boŋ omba boŋ ó dzu Anyuŋ-areŋ.

²²Eyesu a tno mo ma a lu mi le, Agimi e yi ekplo bimi e vẽ okyku lo mbo. Ewu ba moa á ba a kpo me, agimi é kpo lo é gbu? Moa a tno ŋa ma a lu mi le, Agi é kpo lo é gbu.

²³Eyesu a tno mo ma a lu mi le, Adlidzi angyiŋ, edgu ewu ba ame é ba e kpo lo, agimi a mbo é kpo lo. Ambo ame e wo ekʼpo ma ba o sla are la á ba a dzu obgori me, o mbo le ogboehre me mbo. Ekro he lo e wo okyku moarehwĩ ba Adugu a kpo lo okyku mo angyiŋ.

²⁴Omba ba moanwyeotum ahwõ a gno eka he nga, esõ e tpi mo ayi pa la moanáŋ aha he lo.

²⁵Okyku eka he Eyesu a bzi mo pyeŋ nga a nyuŋ mo a lu mi le, Moare la a ri ekʼpo, a wo la ekʼpo eshri moare la a wo abgo mo, moandakʼpo mo nga a la a ri ekʼpo eshri mo.

²⁶Ambo edgu hi angyiŋ é ba e kpo ka la gimi mbo. O wo ba akyeŋ eshki bimi a klo o dzu andakʼpo le, aŋa á dzu awaghrẽ moahwõ pyeŋ.

²⁷Nga o wo ba akyeŋ eshki bimi a klo o dzu a ba ori le, aŋa á dzu awaghrẽ bimi.

²⁸Anwye Arehwĩ a ba okyku o da mo a hlu ŋa eshko angyiŋ mbo, ambo okyku o kpo ewu okyku moahwõ, nga okyku o shri esõ baŋ o shri o di okyku o shla moare nzenze.

²⁹Omba ba moa a zgi Ejeriko a yi nga, moare nzenze a lu Eyesu ma.

³⁰Moavgayi aha akyeŋ moa a dzu obiŋ akaŋ ozhẽ. Moa a gno omba ba Eyesu a ba a yi nga, moa a ta enzi angyangyeŋ a lu mi le, Aŋo Anwye Adawuda! O ka gi ayiekŋe!

³¹Moare a shrom mo nga a nyuŋ mo ma moa a dzu tki. Ambo moa a ta enzi a ta ma-ma o ta angyiŋ. Moa a lu mi le, Anwye Adawuda! O ka gi ayiekŋe!

³²Eyesu a tspi nga a bzi mo a lu mi le, Agimi e klo ba ame e kpo gimi eshi?

³³Moa a tno ma a lu mi le, Andakʼpo, agi e klo boŋ o hwile gi ayi!

³⁴Eyesu a ka mo ayiekŋe nga a tka ayi mo. Omba he lo nga ayi mo a hwile, nga moa a lu Eyesu ma.