Read eggon Amatiyu 21 Bible Online

Amatiyu 21 - eggon bible

Amatiyu 21

¹Moa a gbu anwye oskukyeŋ moa a bzi lo ma Ebefagi. Alo o wo osusku ta la Orushalima. Anwye osku lo a wo Akũ ba Olivi. Eyesu a hom moanwyeotum baŋ aha otum ahe lo, okyku o da mo a bre a yi.

²A nyuŋ mo a lu mi le, Agimi e yi anwye osku la a wo egi ayi bimi, agimi é ka ashrishri moa a dze lo. Anwye baŋ a wo ka la ŋa. Agimi e ngla mo e shri e kom me.

³Nga o wo ba arekyeŋ a zhĩ akplokyeŋ le, agimi e lu e daŋ e lu mi le, Adigi a klo lo. Nga á shri lo á ba.

⁴Ekplo he lo e kpo okyku o bli ekplo ba arehwĩ ba Ahogbrẽ a hom otum a lu. A lu mi le,

⁵Aŋo o lu o da osku ba Ezayoŋ, Ohuhuhi, Anyuŋ-areŋ boŋ a la a ba okro boŋ. Aŋa a wo la esõ ble, nga a vre ashrishri. Aŋa a vre anwye ashrishri.

⁶Moanwyeotum a bre a gre nga, moa a yi a kpo eka ba Eyesu a lu a da mo.

⁷Moa a shri ashrishri lo ta la anwye baŋ a shri a ba, moa a ngla aknye mo a shri a shki ashrishri lo, nga Eyesu a vre lo.

⁸Moare nzenze a shri aknye mo a ngla ozhẽ. Moakyeŋ nga a kplu embgu akiki a ngla ozhẽ.

⁹Moare la a wo egi ayi Eyesu, pa la moare la a wo egi ambla baŋ, moa a lu odlo angyangyeŋ a lu mi le, E hlu Anwye Adawuda eshko. Ahogbrẽ a kpo a ghwo la ŋa la a ba eshko Adigi-odne! E hlu Ahogbrẽ eshko!

¹⁰Omba ba Eyesu a gbu Orushalima nga moare ba okro-yaŋ a mbo, moa a yga akhi. Moare a zhĩ a lu mi le, Aŋa a wo ayi angyiŋ?

¹¹Eshki e tno ma e lu mi le, Aŋa a wo Eyesu arehwĩ ba Ahogbrẽ a hom otum angyiŋ. A zgi Anazarata ba Egalili.

¹²Eyesu a gre Anyuŋ-akulu nga, a se moare la a shri anzho a gbmo ma. A mu eteblo moa la a nyiŋ amgbaŋ, ta la emgba-kyiŋ moa la a shri aklungu a gbmo a ta obiŋ,

¹³nga a nyuŋ mo a lu mi le, Moa a ta Akpa ba Ahogbrẽ a lu mi ma Ahogbrẽ a lu mi le, Moa a bzi odne me ma odne olu. Ambo agimi e da lo a zhiŋ a dzu emvygi moasi!

¹⁴Moavgayi pa la moa la a buŋ adga, moa a ba okro baŋ Anyuŋ-akulu nga, a shaŋ mo.

¹⁵Moandakʼpo olu ba Aho-gbrẽ, pa la moa la a nye odaŋ, esõ e tpi mo ayi, okyku moa a ka ayakplo egbregbre baŋ a la a kpo nga, moanwye la a wo Anyuŋ-akulu, a ta enzi a lu angyangyeŋ a lu mi le, E hlu Anwye Adawuda eshko!

¹⁶Nga moa a nyuŋ Eyesu a lu mi le, Aŋo o gno ekplo moa a la a lu ma? Eyesu a tno mo ma a lu mi le, Ame e gno e gre eshri. Agimi e tsi Akpa Ahogbrẽ la a lu mi le, Agimi e nye moanwye afifi, pa la moanwye able zhezheŋ okyku o da mo a la a hlu Ahogbrẽ eshko adzadzi e ka ku-ku mbo?

¹⁷Ambla he nga, Eyesu a zgi a dzu mo a zga nga a gre anwye osku ba Ebetanya, nga a kpo okyukyku baŋ ahe lo.

¹⁸Endigiŋ onda oha nga, omba ba Eyesu a bla a yi osku lo nga, embyle e kpo ŋa.

¹⁹A ka esĩ ebro akaŋ ozhẽ. Nga a gre okũ lo, a klo agbro ma, ambo a hwiŋ emakyeŋ mbo, o wo le ayeya sha. Okyku eka he nga a nyuŋ esĩ ebro lo a lu mi le, Aŋo ó fu agbro ondakyeŋ ku-ku nga mbo! Ebuebu nga, esĩ ebro lo e kpu.

²⁰Moanwyeotum a ka eka he nga moa a ka egbregbre. Nga moa a zhĩ a lu mi le, Esĩ ebro he e kpo anyu e mom shoshoŋ eka he?

²¹Eyesu a nyuŋ mo a lu mi le, Agimi e tne e ka! O wo bimi e bmi ba adlidzi nga e fu eha esõ bimi ku-ku mbo, agimi a mbo é kpo é gbu ba gimi é kpo edgu ekplo ba ame e kpo ta la esĩ ebro he. Nga agimi é kpo ekplo la e gre ehi a mbo. O wo bimi e bmi ba adlidzi le, agimi é kpo é gbu bimi e nyuŋ akũ e lu mi le, Akũ o gʼbu o yi o gre anyuŋ-ondzu, ó dzu eka he lo.

²²O wo bimi e bmi ba adlidzi le, ekployaŋ a mbo bimi e vẽ omba bimi e fa olu le, agimi é hwiŋ lo.

²³Eyesu a sa a bla a ba Anyuŋ-akulu. Omba baŋ a la a nye moare nga, moandakʼpo olu ba Ahogbrẽ, pa la moandakʼpo moaEyahuda, moa a ba a zhĩ ŋa a lu mi le, La ekʼpo ayi aŋo o kpo ayakplo egbregbre eka he? Ayi a shri ekʼpo he lo a shri a doŋ?

²⁴Eyesu a tno mo ma a lu mi le, Ame é zhĩ gimi ekplo ekyekyeŋ sha. O wo bimi e tno me ma bgu le, ame a mbo é lu é da gimi, eka ba ame e hwiŋ ekʼpo e la e kpo ayakplo he lo.

²⁵E lu e da me, la ekʼpo ayi Eyohana a la a kpo abaptisma? La ekʼpo ba Ahogbrẽ le, la ekʼpo ba arehwĩ? Ambla he nga moa a sla emo a kla ta la emo a lu mi le, Agi é tno ŋa ma é lu la eshi? O ka, o wo bi e tno ŋa ma e lu mi ma Eyohana a hwiŋ ekʼpo baŋ okro Ahogbrẽ le, Eyesu á lu mi le, O wo eka he le, okyku eshi agimi e bmi ba adlidzi ta la Eyohana mbo?

²⁶Ambo o wo bi e lu mi le, Aŋa a hwiŋ lo okro arehwĩ angyiŋ, agi é dzu pyaŋ pa la moare mbo, okyku eshi moa a bmi adlidzi ba Eyohana a wo arehwĩ ba Ahogbrẽ a hom otum angyiŋ.

²⁷Okyku eka he nga moa a tno Eyesu ma a lu mi le, Agi e yi mbo. Eyesu a mbo a tno mo ma a lu mi le, Ame a mbo é lu ekplokyeŋ eshri ekʼpo ba ame e la e kpo ayakplo he, é da gimi mbo.

²⁸Agimi e ka, alomakyeŋ a wo ma, a wo moanwye aha ma. A gre okro ba andakʼpo eshki mo nga a nyuŋ ŋa a lu mi le, Anwye me, o yi o kpo otum agbi anye.

²⁹Anwye lo a tno ŋa ma a lu mi le, Ame e tla. Ambo ambla fi nga a nyiŋ aga baŋ nga a gre agbi lo.

³⁰Ambla he nga adimo a gre okro anwye ahwõ nga a nyuŋ ŋa eka baŋ a nyuŋ ahwõ. Anwye lo a bmi, ambo a gre mbo ku-ku.

³¹Ayaŋ eshki moanwye aha he lo, a kpo ekplo ba adimo a klo? Moa a tno ma a lu mi le, Anwye andakʼpo angyiŋ a kpo ekplo ba Adimo a klo. Eyesu a nyuŋ mo a lu mi le, Ame e lu e da gimi, moa la a yga ewaŋ, pa la moashe la a la a ri eshra, moa á yi Oreŋ Ahogbrẽ á sku gimi.

³²Okyku eshi Eyohana la a kpo abaptisma a ba okro bimi, nga a tsa gimi ozhẽ la o raŋ o gre, ambo agimi e bmi ba adlidzi ka la ŋa mbo. Ambo moa la a yga ewaŋ, pa la moashe la a ri eshra, moa a bmi ba adlidzi ka la ŋa. Omba bimi e ka eka he a mbo, agimi e ka e nyiŋ aga bimi ambla nga e bmi ba adlidzi ka la ŋa mbo.

³³Eyesu a lu mi le, Agimi e ngli atuŋ e gno egŋe ekyeŋ nganga. Areagbikyeŋ a wo ma. Aŋa a hom oso a ta agbi a kpaŋ. Nga a kpo ohwĩ esheshyẽ ba agbi lo, nga a ta atandla, moa a la a dzu ma a la a kʼpu agbi lo. A shri agbi baŋ a ghwo abgo moarekyeŋ, nga a gre odzi.

³⁴Omba moa a yla algo agbi nga, areagbi lo a hom moawaghrẽ baŋ otum okro moa la a la a kpaŋ agbi okyku o da mo a yga ogʼba baŋ a shri a kom ŋa.

³⁵Moa la a kpaŋ agbi, a vu moawaghrẽ baŋ lo nga, moa a taŋ akyeŋ andzu, nga moa a bga akyeŋ a ta okom, nga moa a tra akyeŋ ézhim.

³⁶Ambla he nga, areagbi lo a sa a da moawaghrẽ la a gre moa a baŋ a da mo a gre oriori. Moa la a la a kpaŋ agbi lo, moa a kpo mo eka ba moa a kpo moa-waghrẽ ba oriori lo.

³⁷Amom-abgo ekpyemgbyeŋ a mo nga, aŋa a da anwye baŋ a ba. A lu mi le, Adlidzi moa á fa olbi a daŋ.

³⁸Ambo omba ba moa la a la a kpaŋ agbi a ka anwye lo a la a ba nga, moa a lu ta la emo a lu mi le, Anwye areagbi lo a ba a mi. Agimi e da gi e bga ŋa, okyku o da gi e ri ogu!

³⁹Ambla he nga, moa a vu ŋa, moa a se ŋa a sku agbi lo nga, moa a bga ŋa.

⁴⁰Eyesu a zhĩ moare a lu mi le, Omba ba areagbi lo a ba le, aŋa á kpo eshi pa la moa la a kpaŋ agbi baŋ?

⁴¹Moare a tno ma a lu mi le, Ekplokyeŋ ba ofuoha e wo ma mbo, areagbi á bga abi moare la a kpaŋ agbi lo, nga á ngʼga agbi lo á ghwo moahwõ abgo. Aŋa á shri lo á da moare la á ba a kpo á gbu ba moa a shri ogʼba baŋ a shri a daŋ omba ba omba lo o bli.

⁴²Eyesu a sa a zhĩ mo a lu mi le, Agimi e tsi Akpa Ahogbrẽ e ka mbo? Alo a lu mi le, Ezhim moa la a mbdzi a tla lo a ta eka ba alo e wo la ekplokyeŋ mbo, E zhiŋ e dzu ezhim la e wo la owlama e gre pyeŋ. Ohe lo Adigi-odne angyiŋ a kpo. O wo ekplo egbregbre angyiŋ eyayi bi!

⁴³Eyesu a ta ma a lu mi le, Okyku eka he ame e lu e da gimi, moa á sko Oreŋ ba Ahogbrẽ á sku gimi, nga moa á shri lo á shri á da moa la á ba a kpo á gbu moa á ba a fu agbro nzenze la a wo adzadzi. [

⁴⁴Areyaŋ a mbo la a tsu a gbu ezhim hi lo, á gom okyukyukyku. Nga o wo ba ezhim lo e gbu arekyeŋ le, é sha ŋa rerereŋ.]

⁴⁵Moandakʼpo olu ba Ahogbrẽ, pa la moaEfarisi moa a ka lo a tspi baŋ a ta egŋe eshri mo angyiŋ.

⁴⁶Okyku eka he nga, moa a klo ozhẽ okyku o vu ŋa. Ambo moa a kpo eyli ba eshki, okyku eshi moa a lu mi ma Eyesu a wo arehwĩ ba Ahogbrẽ a hom otum angyiŋ.