Read eggon Amatiyu 27 Bible Online

Amatiyu 27 - eggon bible

Amatiyu 27

¹Endigigiŋ nga, moandakʼpo olu ba Ahogbrẽ, pa la moandakʼpo ba Eyahuda, moa a hwim odlo eshri Eyesu, okyku o da mo a sheŋ ombgu ba eku eshri baŋ.

²Moa a ta ŋa aslika, nga moa a shri ŋa a gre okro ba Ebilatu ogomna.

³Ambla ba Eyahuda la a fu eshri Eyesu a ka ba moa a sheŋ ombgu ba eku eshri ba Eyesu nga, a ghwo obiŋ nga a bla ashye ezinariya ekʼpoetra lo a shri a gre okro moandakʼpo olu ba Ahogbrẽ, pa la okro moandakʼpo.

⁴Eyahuda a lu mi le, Ame e kpo odlobi ba ame e yla are la a gbu ombgu mbo, nga e da mo a sheŋ ombgu ba eku eshri baŋ. Moa a tno ŋa ma a lu mi le, Odlo he lo o wo o bi angyiŋ mbo! Ekplo-yaŋ a mbo e wo e boŋ angyiŋ!

⁵Eyahuda a ndbi amgbaŋ he lo a ygi mo Anyuŋ-akulu nga a zhiŋ ogbu a gre, nga a yi a ghwo eŋa ondzi oto.

⁶Andakʼpo olu ba Ahogbrẽ a sko amgbaŋ lo nga a lu mi le, Amgbaŋ he, a wo amgbaŋ ba amanzhli angyiŋ, odaŋ bi o bmi ba moa a shri edgu amgbaŋ he a ta amgbaŋ ba Anyuŋ-akulu bi mbo.

⁷Ambla ba moa a hwim odlo eshri lo a khwo nga, moa a shri amgbaŋ lo a gbmo okro ba o ngybi moazhẽ ma.

⁸Okyku eka he angyiŋ, moa á bzi agbi he lo ma Agbi ba Amanzhli ma-me a bli anye.

⁹Okyku eka he ekplo ba Erimiya arehwĩ ba Ahogbrẽ a hom otum a lu e bli. Aŋa a lu mi le, Moa a sko ashye ezinariya ekʼpoetra, ba moarehwĩ ba Esrayila a bmi moa a hre okyku ŋa.

¹⁰Nga moa a shri lo angyiŋ a shri a gbmo agbi okyku o ngybi moazhẽ eka ba Adigi-odne a jygu me odaŋ.

¹¹Eyesu a tspi egi ayi ba Ogomna. Ogomna a zhĩ ŋa a lu mi le, Aŋo angyiŋ o wo Anyuŋ-areŋ moaEyahuda? Eyesu a tno ma a lu mi le, Aŋo angyiŋ o lu eka he.

¹²A lu akplo-kyeŋ ku-ku eshri odlo moandakʼpo olu ba Ahogbrẽ, ta la odlo moandakʼpo a lu eshri baŋ mbo.

¹³Okyku eka he Ebilatu a sa a zhĩ ŋa a lu mi le, Aŋo o la o gno odlo moa a lu eshri boŋ he mbo?

¹⁴Eyesu a tno ŋa ma tsitsi a mbo mbo. Okyku eka he, Ogomna a ka egbregbre a gre eshri.

¹⁵Omba moa a la a ri abgo ba Apaska, Ogomna a la a kyu oprusuna akyeŋ abgo o wo moare a vẽ ŋa.

¹⁶Omba he lo nga, oprusunakyeŋ a wo ma la a gre abgo a gre eshri, eshko baŋ e ri Abaraba.

¹⁷Okyku eka he nga, omba moare a pla emo a shki, Ebilatu a zhĩ mo a lu mi le, Agimi e klo ba ame e kyu ayi angyiŋ abgo, Abaraba le, Eyesu moa a bzi ŋa ma Ekristi?

¹⁸Ebilatu a yi zhezheŋ ba moare a shri Eyesu a ba okro baŋ, okyku moa a kpo efpu baŋ angyiŋ.

¹⁹Omba ba Ebilatu a wo akuombgu nga, ashe baŋ a hom otum a ba a lu mi le, Aŋo o ghwo abgo boŋ ombgu alom hi lo mbo ba. Aŋa a gbu ombgu akplokyeŋ mbo. Ame e ndze wayawaya eshri baŋ ore nzenze.

²⁰Moandakʼpo olu ba Ahogbrẽ, pa la moandakʼpo a vẽ eshki okyku o da mo a bmi o zhĩ Ebilatu okyku o daŋ a kyu Abaraba abgo, nga a ra Eyesu a bga.

²¹Ambo Ogomna a zhĩ mo a lu mi le, Eshki mo aha he, ayaŋ agimi e klo ba ame a kyu ŋa abgo? Moa a tno ma a lu mi le, Abaraba angyiŋ agi e klo boŋ o kyu ŋa abgo!

²²Ebilatu a zhĩ a lu mi le, Agimi e klo ba ame e kpo eshi ta la Eyesu moa a bzi ŋa ma Ekristi? Moare mvye a tno ŋa ma a lu mi le, O gŋe ŋa egŋe aki!

²³Ambo Ebilatu a zhĩ mo a lu mi le, Aŋa a gbu ombgu ba eshi angyiŋ? Omba he lo nga, moa a la a lu odlo angya-ngyeŋ a lu mi le, O gŋe ŋa egŋe aki!

²⁴Omba ba Ebilatu a ka ba alo o wo eheŋ-ekyeŋ ba o kpo akplokyeŋ nga mbo, okyku eshi a ka eka moa a kpo okpoambgu, a fu amihĩ a ndza abgo baŋ egi ayi ba eshki nga a lu mi le, Amanzhli ba alom he, a wo eshri me angyiŋ mbo, ambo alo a wo eshri bimi angyiŋ.

²⁵Eshki pyeŋ e tno ma e lu mi le, Egbre ba amanzhli baŋ a dzu eshri bi, pa la moanwye bi!

²⁶Ambla he nga, Ebilatu a kyu Abaraba abgo okyku mo. A da mo a taŋ Eyesu andzu a khwo nga, a da mo a gŋe ŋa egŋe aki.

²⁷Moanwyeakyuŋ ba Ebilatu a shri Eyesu a gre ekpazhi ba odne ba Ogomna. Moare pyeŋ nga moa a pla a shki a ta ŋa a kpaŋ.

²⁸Moa a hwro anzho baŋ a sku ŋa egʼba a khwo nga, moa a ygi ŋa arigakyeŋ la a wo abme mlemle.

²⁹Ambla he nga moa a ngybi azhli ba ezga, a shri a zga ŋa eshri, nga moa a daŋ a shri opi obgori baŋ. Moa a kʼpu obiŋ egi ayi baŋ nga, moa a lu ega a ygi ŋa. Moa a lu mi le, Ahogbrẽ a ta ŋo ma-ma, aŋo Anyuŋ-areŋ moaEyahuda!

³⁰Moa a ta akyi a ygi ŋa a khwo nga, moa a yga opi a sheŋ ŋa eshri.

³¹Ambla ba moa a lu ega a ygi ŋa a khwo nga, moa a hwro ariga a sku ŋa, nga moa a shri anzho baŋ a bla a ygi ŋa, nga moa a daŋ a zgi a gre edzi okyku o da mo a gŋe ŋa egŋe aki.

³²Omba ba moa a zgi edzi sha nga, moa a ka alomakyeŋ ba Esirini, eshko baŋ e ri Esima. Moa a vu ŋa okyku o daŋ a shri egŋe aki ba Eyesu.

³³Moa a gbu okro ba moa a bzi lo ma Oglogota, o dzu Okro ba Amgbatku Eshri.

³⁴Ahe lo, moa a shri ami abza a shri a daŋ okyku o daŋ a wa. Moa a dzum agum la a no ma. Omba baŋ a tka lo a ka a khwo nga, a tla o wa lo.

³⁵Moa a gŋe ŋa egŋe aki la okusa a khwo nga, moa a fye emvye eshri anzho baŋ.

³⁶Ambla he nga, moa a dzu obiŋ okro lo a la a ka ŋa.

³⁷La ongyeŋ ba eshri baŋ, moa a ta engla ba ombgu baŋ a shri a bre ma. Moa a ta a lu mi le, Ahi lo angyiŋ a wo Eyesu, Anyuŋ-areŋ moaEyahuda.

³⁸Omba he lo moa a gŋe moasi aha egŋe aki ta la Eyesu otsotse. Akyeŋ a wo obgori, ahwõ a wo obgoehre.

³⁹Moare la a bre okro lo a yi, moa a kaŋ eshri mo nga, moa a lu ega a ygi Eyesu.

⁴⁰Moa a lu mi le, Aŋo o lu ma aŋo ó kypi Anyuŋ-akulu nga, ma aŋo ó bla alo ó mbdzi ambla elum etra ma! O shla eshri boŋ ohuhuhi, o wo boŋ o wo Anwye ba Ahogbrẽ! Nga, o gile o sku egŋe aki!

⁴¹Moandakʼpo olu ba Ahogbrẽ, pa la moa la a nye odaŋ, pa la moandakʼpo a mbo, moa a lu ega a ygi ŋa ekakahelo.

⁴²Moa a lu mi le, Aŋa a kpo a gbu baŋ a shla moahwõ, ambo a kpo a gbu baŋ a shla eshri baŋ mbo! Aŋa angyiŋ a wo Anyuŋ-areŋ ba Esrayila mbo? O wo baŋ a gile egŋe aki a gbu ohuhuhi angyiŋ le, agi é bmi ba adlidzi ka la ŋa!

⁴³Aŋa a bmi ta la Ahogbrẽ nga, a la a lu mi ma aŋa a wo Anwye Ahogbrẽ angyiŋ. O wo ba alo o wo eka he angyiŋ bgu le, agi é ka ba Ahogbrẽ á ba a shla ŋa ohuhuhi!

⁴⁴Moasi ba moa a gŋe mo egŋe aki ta la Eyesu a mbo a lu ega a ygi ŋa ekakahelo.

⁴⁵Omba ba olum o vu eshri, obiŋ pyeŋ o gnyu o hwĩ evbu, ma-me eka awa atra.

⁴⁶La amgbaŋ atra nga, Eyesu a wu okũ angyangyeŋ a lu mi le, Eloyi, Eloyi, olama asabaghtani? O dzu, Ahogbrẽ me, Ahogbrẽ me, okyku eshi aŋo o dzu me o zga?

⁴⁷Moarekyeŋ la a tspi ahe lo a gno baŋ a la a lu eka he nga, moa a lu mi le, Aŋa a la a bzi Eliya.

⁴⁸Akyeŋ eshki mo a knye a yi a sko asusku, nga a shri lo a ghwo ami abza, nga a tpi lo aki nga a shri lo a daŋ, okyku o daŋ a wa.

⁴⁹Ambo moakyeŋ a lu mi le, Agimi e dzu tki okyku o da gi e ka, o dzu mbo, Eliya á ba a shla ŋa!

⁵⁰Eyesu a sa a wu okũ angya-ngyeŋ nga a kyu ayaŋ baŋ abgo.

⁵¹Omba he lo, oknye ba ayizhẽ ba Anyuŋ-akulu o tsa o gʼba aha, o zgi ongyeŋ ma-me o ba o fu obiŋ.

⁵²Obiŋ o zhga ara, nga ézhim e tsa wre, engybi nzenze nga e hwile, moare nzenze la a lu Ahogbrẽ ma, moa la a sheŋ a kpu, moa a kso ongybi omba he lo.

⁵³Moa a kso a sku engybi, nga ambla ba Eyesu a kso eku, moa la a kso ongybi he lo a gre Osku Ba Esesla, nga moare nzenze a ka mo.

⁵⁴Omba ba andakʼpo ba moanwyeakyuŋ, pa la moanwyea-kyuŋ la a kʼpu Eyesu ka la ŋa, moa a ka ba obiŋ o zhga ara, ta la ayakplo egbregbre la a kpo nga, moa a kpo eyli nzenze. Nga moa a lu mi le, Adlidzi angyiŋ baŋ a wo Anwye Ahogbrẽ.

⁵⁵Moashe nzenze a wo okro lo omba he lo. Moa a la a lu Eyesu ma a zgi Egalili angyiŋ a ba. Moa a tspi ogyugyuŋ a ka ayakplo la a kpo.

⁵⁶Eshki moashe he lo, Emeri Emagadaliya, ta la Emeri anaŋ Eyakubu, ta la Oyusufu, ta la animoanwye ba Azabadi moa a wo ma.

⁵⁷La olum-ore nga, alomakyeŋ la a wo angyiŋ a zgi osku ba Arimatiya. Eshko baŋ e ri Oyusufu. Aŋa a mbo a wo anwyeotum ba Eyesu.

⁵⁸A gre okro Ebilatu nga a vẽ ŋa okyku o daŋ a bmi a daŋ a sko okom Eyesu. Ebilatu a bmi okyku o da mo a shri okom Eyesu a shri a daŋ.

⁵⁹Okyku eka he nga, Oyusufu a sko lo, nga a kpmye lo oknye ohe. Oknye lo o wo elili angyiŋ.

⁶⁰A kpo nga a ngybi ŋa ongybi baŋ a kʼpa lo ezhim. Omba baŋ a kʼpa lo o gyuŋ a wo mbo. A byiŋ ayaŋ a shki anyu ongybi lo a khwo nga a zhiŋ ogbu a gre eŋa.

⁶¹Emeri Amagadaliya, ta la Emeri ahwõ, moa a dzu osusku ta la ongybi lo.

⁶²Onda oha ba Ojuma nga, moandakʼpo olu ba Ahogbrẽ, pa la moaEfarisi moa a yi a ka Ebilatu,

⁶³nga moa a lu a daŋ a lu mi le, Andakʼpo, agi e sheŋ e yi ba asheŋakpro mi a lu omba baŋ a yi a wo ma, ma aŋa á kso olum ba otra ambla baŋ a kpu.

⁶⁴Okyku eka he aŋo o shri ekʼpo o di okyku o da mo a kʼpu ongybi lo ma-me o tsa onda olum ba otra, okyku o da moanwyeotum baŋ a yi a si ŋa mbo, nga a su a ygi moare ma moa a kso Eyesu. Akpro he lo á tpi okro ayi á gre akpro a ba oriori a mbo nganga.

⁶⁵Ebilatu a nyuŋ mo a lu mi le, Agimi e sko are la a kʼpu e daŋ a yi a kʼpu eka bimi e klo.

⁶⁶Ambla he nga, moa a zhiŋ ogbu a gre emo, moa a shri alamba ba ekʼpo a bre ezhim lo okykũ o da arekyeŋ a hwile lo mbo, nga moa a da mo a kʼpu ongybi lo.