Read eggon Amatiyu 28 Bible Online

Amatiyu 28 - eggon bible

Amatiyu 28

¹Ambla ba onda Asabat a khwo nga, la endigigiŋ onda Aladi, Emeri Amagadaliya, ta la Emeri ahwõ, moa a gre okyku o kpre ongybi lo o ka.

²Omba he lo nga, obiŋ o zhga ara. Anwyeadga ba Adigi-odne a gile a zgi Ongyeŋ a ba, a byiŋ ayaŋ a sku anyu ongybi lo, nga a dzu ma.

³Eyayi baŋ e wo eka ayimom, nga aknye baŋ a kyle pse.

⁴Moa la a kʼpu ongybi a kpo eyli nzenze, nga egʼba e zhga mo ara, nga moa a zhiŋ a dzu eka ekom.

⁵Anwyeadga ba Ahogbrẽ a lu odlo pa la moashe a lu mi le, Agimi e kpo eyli mbo. Ame e yi bimi e klo Eyesu are ba moa a gŋe ŋa egŋe aki angyiŋ.

⁶A wo ahe nga mbo, aŋa a kso ongybi eka baŋ a lu. E ba ahe, e ka okro ba moa a shri ŋa a lom ma.

⁷Agimi e yi shoshoŋ nga e lu e da moanwyeotum baŋ e lu mi le, Moa a kso ŋa ongybi, nga ohuhuhi aŋa a sheŋ a gre gimi ori, a wo ozhẽ a yi Egalili a mo. A mi lo, agimi é ka ŋa! E tne aga e ka, eka ba ame e sheŋ e lu e da gimi.

⁸Okyku eka he moa a kso a sku ongybi la ovrovro. Moa a wo la eyli esõ mo, ambo moa a wo la ovye a mbo. Moa a knye a gre a yi a lu a da moanwyeotum baŋ.

⁹Ambla fi nga Eyesu a ri a sheŋ a mo, nga a nyuŋ mo a lu mi le, Opyapyaŋ ba esõ o dzu ka la gimi. Moa a ba okro baŋ nga, moa a kom adga baŋ abgo, nga moa a hlu ŋa eshko.

¹⁰Eyesu a nyuŋ mo a lu mi le, Agimi e kpo eyli mbo. Agimi e yi e nyuŋ moanime ma moa a yi Egalili, a mi lo nga moa á ka me.

¹¹Omba ba moashe a zhiŋ ogbu a gre emo a khwo bgu, moanwyeakyuŋ akyeŋ eshki moa la a kʼpu ongybi, moa a gre osku, a yi a lu ekployaŋ a mbo la e kpo a da moandakʼpo olu ba Ahogbrẽ.

¹²Moandakʼpo olu ba Ahogbrẽ, a pla emo a shki, pa la moandakʼpo, nga moa a hwim odlokyeŋ, nga a shri amgbaŋ nzenze a fu moanwyeakyuŋ ashum.

¹³Moa a fu mo ashum a lu mi le, Agimi e lu e da moare e lu mi le, Omba bi e ndze enu okyukyku, moanwyeotum baŋ a ba a si okom baŋ.

¹⁴O wo ba Ogomna a yi eka he bgu le, agi é kpo é gbu bi é gbu ŋa esõ obiŋ, nga ekplokyeŋ bimi e ngʼba esõ e wo ma nga mbo.

¹⁵Moa la a kʼpu moa a yga amgbaŋ nga, moa a kpo ekplo ba moa a tsa mo ma moa a kpo. Ma-me o ta anye he, moaEyahuda a la a tsi oshpa eka he angyiŋ a la a da moare.

¹⁶Moanwyeotum okʼpoakyeŋ, moa a gre akũ-akyeŋ obiŋ ba Egalili, ba Eyesu a lu a da mo.

¹⁷Omba ba moa a ka ŋa nga, moa a hlu ŋa eshko. Ambo moakyeŋ eshki mo a fu ŋa eha.

¹⁸Eyesu a ba osusku pa la a mo nga a nyuŋ mo a lu mi le, Moa a shri ekʼpo pyeŋ Ongyeŋ, ta la obiŋ hi a shri a da me.

¹⁹Agimi e yi okro moarehwĩ pyeŋ ayaŋ a mbo obiŋ hi, nga e zhiŋ mo e da mo a dzu moanwyeotum me. Nga, e kpo mo abaptisma eshko Ada, ta la e ba Anwye, ta la e ba Ogbgaodzi.

²⁰Nga e nye mo e da mo a kpaŋ ekployaŋ a mbo ba ame e lu e da gimi. Nga e tne aga e ka! Ame é dzu ka la gimi ombamba pyeŋ, ma-me o tsa onda amom-abgo.