Read eggon Amatiyu 7 Bible Online

Amatiyu 7 - eggon bible

Amatiyu 7

¹Aŋo o sõ arekyeŋ ombgu mbo, okyku o da Ahogbrẽ a mbo a sõ ŋo ombgu mbo.

²Okyku eshi Ahogbrẽ a mbo, á sõ ŋo ombgu ozhẽ okyekyeŋ eka boŋ o la o sõ moahwõ ombgu, nga aŋa á kpo otum la edgu odaŋ boŋ o la o kpo otum ta la lo.

³Okyku eshi aŋo o se aso eyi anóŋ, nga aŋo o dzu anyuŋ ogbuokõ la o wo eyi boŋ o zga?

⁴Aŋo o ghwo o shri edgu esõ lo, boŋ o lu mi le, Aŋo o da me e se aso eyi boŋ, ambo aŋo o wo la anyuŋ ogbuokõ eyi boŋ?

⁵Aŋo are la a la a bile ŋo! Aŋo o se ogbuokõ la o wo eyi boŋ ayga, okyku o doŋ o kpo o gbu o se aso la a wo eyi ba anóŋ.

⁶Aŋo o shri ekplo la e wo esesla o shri o da ebu mbo. Moa á zhiŋ nga á klo ambgu sha angyiŋ ka la ŋo. Aŋo o shri ézhim la e wo egbmo nzenze o shri o ta okóko mbo. Moa á dzi odzi sha e ma.

⁷Aŋo o vẽ, nga aŋo ó yga. Aŋo o klo, nga aŋo ó hwiŋ. Aŋo o ta enzi, nga moa á hwile ŋo ayizhẽ.

⁸Okyku eshi areyaŋ a mbo la a la a vẽ, á yga, areyaŋ a mbo la a la a klo nga, á hwiŋ, areyaŋ a mbo la a la a ta enzi nga, moa á hwile ŋa ayizhẽ.

⁹Agimi adimo anwye, alo ó kpo ó gbu ba akyeŋ eshki bimi a shri ezhim a shri a da anwye baŋ, o wo baŋ a vẽ ŋa agbrotsa?

¹⁰Aŋo ó shri emabi ó shri ó daŋ, o wo baŋ a vẽ ŋo atsa?

¹¹Agimi e wo abi egyagi a mbo, agimi e yi eheŋ ba o shri anzho adzadzi e shri e da moanwye bimi. Adigimi la a wo Ongyeŋ a mbo la a gre gimi, á shri ayakplo adzadzi á shri á da moa la a vẽ ŋa.

¹²Aŋo o kpo moahwõ ayakplo boŋ o klo moa a kpo ŋo. Eka he angyiŋ odaŋ ba Omusa, ta la onyenye moarehwĩ ba Ahogbrẽ a hom otum o lu.

¹³Agimi e sõ ozhẽ la o fye kpate. Ozhẽ la o sõ o gre enzheovo o hwrẽ hwla-hwla. Moare nzenze nga a la a sõ lo.

¹⁴Ozhẽ la o sõ o gre okro ba esõ, o fye kpate, nga o wo ewu o sosõ. Moare fi sha a la a sõ lo.

¹⁵Agimi e nyuŋ e kpo-kpo pa la moarehwĩ la a la a sheŋ akpro, ma Ahogbrẽ angyiŋ a hom mo otum. Moa á ba okro bimi la akpa ba ekylu egi edzi, ambo moa a wo ebuakam angyiŋ egi eshyẽ.

¹⁶Agi e nyuŋ e ka okyku edgu eda mo. Ezga e la e fu agbro anva mbo, nga eklu e la e fu agbro ebro mbo.

¹⁷Esĩ aki la e wo edzi e la e fu agbro adzadzi, nga esĩ aki la e wo ebi e la e fu agbro abi.

¹⁸Esĩ aki la e wo edzi e la e fu agbro abi mbo, nga esĩ aki la e wo ebi e la e fu agbro adzi mbo.

¹⁹Esĩ aki la e fu agbro adzi mbo, moa a la a kplu lo a ygi ovo.

²⁰Okyku eka he, agimi é ka moare la a la a sheŋ akpro ma Ahogbrẽ a hom mo otum é bmye, okyku edgu eda mo.

²¹Areyaŋ a mbo la a la a bzi a lu mi le, Adigi-odne, Adigi-odne, angyiŋ, á ba a yi Oreŋ Ongyeŋ mbo, o wo le moa la a kpo ayakplo ba Adugu la a wo Ongyeŋ a klo dne.

²²Onda mi lo o ba bgu le, moare nzenze á ba okro me á lu mi le, Adigi-odne, Adigi-odne! La eshko boŋ agi e nyum oshpa ba odlo ba Ahogbrẽ, nga la eshko boŋ, agi e se egbgabi nga e kpo ayakplo ba egbregbre!

²³Ame nga é tno mo ma é lu mi le, Agimi la e la e kpo ayakplobi, e kye e sku me, ame e yi gimi ondakyeŋ mbo!

²⁴Okyku eka he areyaŋ a mbo la a gno odlo me nga a kpaŋ lo le, aŋa á dzu eka ba are la a ka a bmye nga a mbdzi odne baŋ onmwre ongyeŋ.

²⁵Omba ba ogbu o ba, ba ehwla e bli e shka e ba akaŋ, nga omba ba ogbga ogbu o hlu odne lo, alo o kypi mbo, okyku eshi moa a mbdzi lo onmwre ongyeŋ.

²⁶Areyaŋ a mbo la a gno odlo me nga, a la a kpo otum ta la lo mbo le, moa á sko ŋa á zga eka ba are la a ka a bmye mbo nga a mbdzi odne baŋ endase.

²⁷Omba ba ogbu o ba nga, ehwla e bli e shka e gre akaŋ, ogbga o hlu odne lo osheshye, nga alo o kypi o ygi obiŋ. Okyiokypi ba odne lo o wo ekplo ba ayiekŋe.

²⁸Ambla ba Eyesu a lu odlo eka he a khwo nga, moare a ka egbregbre a gre eshri eka baŋ a la a nye moare.

²⁹Aŋa a la a nye moare eka moarehwĩ mo la a la a nye odaŋ mbo, ambo, aŋa a nye mo la ekʼpo.