Read eggon Amatiyu 8 Bible Online

Amatiyu 8 - eggon bible

Amatiyu 8

¹Eyesu a gile a sku ezhim lo nga, moare nzenze a lu ŋa ma.

²Agbueshrukyeŋ a ba okro baŋ, nga a gbyle a kʼpu obiŋ egi ayi baŋ nga a lu mi le, Andakʼpo, o wo boŋ o bmi le, aŋo o kpo o gbu boŋ o shaŋ me.

³Eyesu a ndba obgo a tka ŋa nga, a lu mi le, Ame e bmi, aŋo o shaŋ! Nga alom lo a gba a shaŋ.

⁴Eyesu nga a shĩ alom lo a lu mi le, O gno! O lu o da arekyeŋ ku-ku mbo, ambo aŋo o yi okro ba andakʼpo olu ba Ahogbrẽ okyku o daŋ a mbga ŋo a ka, nga o shri oshriondba ba ebyi o shri o di, eka ba odaŋ ba Omusa o lu, okyku o da areyaŋ a mbo a yi boŋ o shaŋ.

⁵Omba ba Eyesu a gbu Akafanahum, andakʼpoakyeŋ eshki moanwyeakyuŋ moaOroma a ba a vẽ ŋa okyku o daŋ a kpo a ghwo la ŋa.

⁶Aŋa a nyuŋ Eyesu a lu mi le, Andakʼpo, anwye-odne me a lom odne la ololo. Aŋa a kpo esku a mbo a gbu mbo. Olo o vu ŋa o gre eshri.

⁷Eyesu a tno alom lo ma a lu mi le, Ame é yi é shaŋ ŋa.

⁸Alom lo a tno Eyesu ma a lu mi le, O mbo. O ka, ame e tse ma boŋ o gre o yi odne me mbo. Aŋo o hwile anyu o lu odlo sha, ame e yi, anwye-odne me lo, á shaŋ.

⁹Ame a mbo, e wo abgo moandakʼpo la a gre me angyiŋ. Ame nga e wo moanwyeakyuŋ abgo me. O wo ba ame e hwile anyu e nyuŋ ahi e lu mi le, O yi! aŋa a la a yi. Nga o wo ba ame e sa e nyuŋ ŋa ma a ba, a la a ba. Nga o wo ba ame e hwile anyu e nyuŋ awaghrẽ me, ma a kpo eka he, aŋa a la a kpo eka he lo.

¹⁰Eyesu a ka egbregbre a gre eshri omba baŋ a gno eka he. Nga aŋa a nyuŋ moare la a la a lu ŋa ma a lu mi le, Ame e ka arekyeŋ la a wo la obmi ba adlidzi eka ba alom hi obiŋ ba Esrayila ondakyeŋ mbo ku-ku.

¹¹Agimi e ngli e gno! Moare nzenze moa á zgi egi etne, ta la egi olum-ore á ba okyku o dzu eteblo ekye-kyeŋ ta la Ebrahim, ta la Eshaku, ta la Eyakubu Oreŋ Ongyeŋ.

¹²Moare e mbi la ba alo o raŋ o gre moa a hwiŋ Oreŋ Ongyeŋ, moa á se mo á ygi egi edzi, okro la o hwĩ evbu kpyke. Ahe lo, moa á wu okũ, nga á taŋ azhga anyu.

¹³Eyesu nga a nyuŋ alom lo a lu mi le, O yi eŋo odne, nga ekplo boŋ o bmi ba adlidzi okyku lo, é kpo. Anwye-odne ba andakʼpo moanwyeakyuŋ lo, a dzu odne nga a shaŋ omba he lo.

¹⁴Eyesu a gre odne ba Ebitru, aŋa a ka anaŋ ashe Ebitru a lom obiŋ. Ogbga o vu ŋa.

¹⁵Eyesu a tka ŋa obgo nga, aŋa a shaŋ. Ashe lo a kso nga, a yi a shri algo a daŋ a ri.

¹⁶La olum-ore nga, moare a shri moare ba egbgabi e la e kpo mo ewu a shri a ba okro ba Eyesu. Eyesu nga a se egbgabi a sku moare ibu odlo baŋ, nga a shaŋ moare la a no olo.

¹⁷Aŋa a kpo eka he okyku o bli ekplo ba Eshaya arehwĩ ba Ahogbrẽ a hom otum a lu. A lu mi le, Aŋa eshrishri eŋa, a sko elolo, ta la ewu bi.

¹⁸Eyesu a ka moare nzenze la a wo osusku ka la ŋa a khwo nga, a da mo a bmyi atam a gre ongre ohwõ.

¹⁹Arekyeŋ la a nye odaŋ a ba okro ba Eyesu nga a lu mi le, Andakʼpo, ame e shri esõ me e zga, okyku o yi okroyaŋ a mbo boŋ ó ba o yi.

²⁰Eyesu a tno ŋa ma a lu mi le, Emgbeshka e wo la anzhe ma, nga awunu a mbo a wo la eygu ma, ambo Anwye Arehwĩ a wo la okro ba o dzu ma o dum mbo.

²¹Are-kyeŋ la a wo anwyeotum a sa a lu mi le, Andakʼpo, o wo boŋ o bmi le, o da me e yi e ngybi adugu ayga.

²²Eyesu a tno ŋa ma a lu mi le, Aŋo o ba o lu me ma, o da moa la a kpu a ngybi emo ababgo mo.

²³Eyesu a gre amgblami nga, moanwyeotum baŋ a gre otsotse ka la ŋa.

²⁴Nga anyuŋ ogbga ogbu o gnyu o hlu atam lo. Omba he lo, Eyesu a ndze enu.

²⁵Moanwyeo-tum a gre a yi a kso ŋa enu, nga moa a nyuŋ ŋa a lu mi le, Adigi-odne, aŋo o shla gi, agi é dga ba!

²⁶Eyesu a tno mo ma a lu mi le, Okyku eshi agimi e la e kpo eyli eka he? Obmi ba adlidzi bimi o wo otsitsi anyu eka he! A lu eka he a khwo nga a kso a shrom ogbga ta la ondzami a da mo a dum. Nga okro o dum.

²⁷Areyaŋ a mbo a ka egbregbre. Nga moa a lu mi le, Eyesu a wo eshi edgu arehwĩ hi lo nga ba ogbga, ta la ondzami a mbo a gno ŋa!

²⁸Eyesu a ba ogʼba obiŋ ba Egadarani. Alo o wo akaŋ atam la ongre ohwõ. Ahe lo aŋa a ka moare aha la a la a dzu engybi. Egbgabi e la e kpo otum pa la mo, okyku eka he, moa a la a ka moare ŋa-ŋa-ŋa sha. Moa a wo eyli a gre eshri, okyku eka he, moare a kpo eyli o sõ ozhẽ he lo.

²⁹Omba ba moa a ka Eyesu nga moa a ta enzi angyangyeŋ, a lu mi le, Aŋo Anwye Ahogbrẽ o klo eshi ka la gi? Aŋo o ba okyku o kpo gi ewu ayga o da omba lo o kpo?

³⁰Osusku ta la okro he lo, okóko nzenze o wo ma, moa a la a vgi mo ahe lo.

³¹Egbgabi lo e vẽ Eyesu e lu mi le, O wo boŋ ó ba o kyku gi le, aŋo o da gi e yi e gre egʼba okóko hi lo.

³²Eyesu a bmi nga moa a knye a gre a yi a gre egʼba okóko lo. Okó-ko lo pyeŋ o gile o gre akaŋ atam lo, nga o yi o tsu o gre atam, nga o kpu.

³³Moare la a la a kpaŋ okóko lo a knye a gre osku eshyẽ nga moa a lu oshpa ayakplo la a kpo a da moare, eka ekplo la e kpo pa la moare ba egbgabi e kpo otum pa la mo.

³⁴Ambla he nga, areyaŋ a mbo a zgi osku he lo a gre okyku o ka Eyesu. Omba ba moa a ka ŋa nga, moa a vẽ ŋa okyku o daŋ a kso a sku ogʼba obiŋ mo.